بدخشان ولایتی ارگو تومنیدهگی چاروهچیلردن قطاری، چاروهلری آرهسیده نابیللی بیر کسللیکنینگ ترقهلگنیدن خواطر بیلدیرگنلر. اولرنینگ ایتیشلریچه، اوشبو کسللیک سونگی کونلر نیچه باش چاروهلرینینگ تلف بولیشیگه سبب بولیب و بو وضعیتنینگ دوام قیلگنیده اولرگه کوپینچه زیان ییتیشیشی احتمالی بار.
مذکور تومن «چشمهی حصار» قیشلاغی یشاوچیسی محمدلطیفنینگ سلاموطندار گه ایتیشیچه: «نیچه باش چاروهم بو کسللیککه چلیندی و بیر سیگیریم تلف بولدی. علایمی ایسه اشتهاسیزلیک و روده آغریغی دیر. ساغلیق مرکزلرگه مراجعت قیلگنیمیز و دوالنیش آستیده بولگنی بیلن، هیچ نتیجه آلمهدیک. بیر سیگیریم بیر کیچه کسل بولدی، رودهلری قاره بولیب و اولدی. دوالهدیک؛ بیراق هیچ فایده قیلمهدی. قوشنیلریمیزدن بیرینینگ سیگیری هم بو کسللیککه چلینیب و تلف بولدی.»
شونینگدیک ارگو تومنی یشاوچیلریدن باشقه بیری رحیمنینگ ایتیشیچه، سونگی هفتهلرده چاروهلری آرهسیده نابیللی بیر کسللیک ترقهلیب و حاضرگچه اونینگ سببینی بیله آلمهگنلر. اونینگ کوپهیتیریشیچه: «چاروهلریمیز اشتهاسیز بولگن، قان کیتیش و قبض بولیشگه چلینگنلر. بو تومنده نیچه عایلهنینگ چاروهسی اوشبو کسللیککه چلینگن؛ بیراق هیچ کیم اونینگ اصلی سببینی بیلمهیدی. مینی بیر ایشک و بیر سیگیریم بو کسللیککه چیلیندی که مذکور کونلر تلف بولیشی احتمالی بار.»
بدخشان ولایتی ارگو تومنی یشاوچیلری، مسئول نهادلر آرقهلی بو کسللیکنینگ تیزلیک بیلن تیکشیریلیشی و اونینگ ترقهلیشی آلدی آلینیشینی ایستهگنلر. باشقه بیر تاماندن مذکور تومن یشاوچیلریدن محمد، چاروهلری آرهسیده بو کبی کسللیک ترقهلگنیدن خبر بیریب و بو توغریده همکارلیک ایستهگن. «چاروهلریمیزنینگ بو کسللیککه چیلینیشی، اولرنینگ اشتهاسی کمهیشی، قان کتیشگه چلینگنی و کون اوتیشی بیلن ضعیفلنیشیگه سبب بولگن. اوشبو قیشلاغیمیزده تورت-بیش سیگیر تلف بولدی. اوشبو کسللیکنینگ دقیق شکلده تشخیص بولیشی اوچون تیزلیک بیلن بیر متخصص یوباریلیشی، حل یول کورسهتیلیشی و فایدهلی دارو بیریلیشیگه نیازیمیز بار.»
بیزلرنینگ فیسبوک صحیفهمیزگه باش اورینگ!
شوندهی بیرحالده، ارگو تومنیدهگی چاروهلر بولیمی شفاکاری امرالله مشفقنینگ ایتیشیچه، تیکشیریشلر اساسیده، چاروهلر آرهسیده «انتروتوکسیمیا» آتیده بیر کسللیک ترقهلگن. اونینگ کوپهیتیریشیچه، بو کسللیک نادرست آوقتلنیش و هوا افلاسلیگی سبب باشقه چاروهلرگه اوتهدی.
اونینگ آگاهلنتیریشیچه: «توجه بولمهگنی صورتده، بو کسللیک آز مدتده منطقهدهگی چاروهلردن کوپ قسمینی تلف قیلیشی و چاروهچی عایلهلر اقتصادیگه آغیر زیان ییتیشتیریشی ممکن. شونینگدیک چاروهلرنینگ درست آوقتلنیشی، یخشی آذوقه بیریلیشی و چاروهلر ساغلیق سیستمی کوچلنیشی و یخشی شکلده مراقبت بولیشی، اولرنینگ بو کسللیککه چلینیشینی کنترول قیله آلهدی.»
بولرگه علاوه، بدخشان ایکینچیلیک، چاروهچیلیک و سووغاریش ریاستینینگ چاروهلر ساغلیگی مرکزینی تیکشیریش بوییچه مدیری احمد جاویدنینگ ایتیشیچه، برفکی ایسیتمه کسللیگی «FMD»، چاروهلر آرهسیده کوریلگن کسللیکلردن دیر که ییللر مملکتنینگ تورلی بولیملری اینیقسه بدخشان ده بولیب و بعضا ترقهلهدی.
اونگه کوره، مذکور کسللیک بعضی موسوملرده کوپهیب و توجه بولمهگنی صورتده، چاروهچیلرگه کوپینچه اقتصادی زیان ییتیشتیرهدی. «بدخشان ایکینچیلیک ریاستی بو کسللیک ترقهلیشی آلدین آلینیشی اوچون جبرلنهدیگن تومنلرگه سیار واکسناسیون تیملرینی یوبارهدی و چاروهچیلرگه آگاهیلیک بیریش برنامهلیرنی اوتکزهدی. بونگه علاوه، دولتی و نادولتی حیوانی کلینیکلر مسئوللری هر بیر تومنده موظفلر که، چاروهچیلرگه بو کسللیک آلدی آلینیشی، دوالنیشی و چاروهلرنینگ یخشی آوقتلنیشینی اورگتسهلر.»
ایتیش کیرهک که، چاروهچیلیک بدخشان ولایتی ارگو تومنی اهالیسی اوچون اصلی درآمد منبعلریدن بیری حسابلنهدی. ایش بیلرمانلرنینگ ایشانچیگه کوره، برفکی ایسیتمه و انتروتوکسیمیا کبی چاروهلر آرهسیده ترقهلهدیگن کسللیکلر، نه فقط چاروهلر ساغلیگی بلکیم محلی عایلهلر اقتصادینی هم خوف آستیده قویهدی. محلی مسئوللر، کوپینچه زیان آلدی آلینیشی اوچون چاروهلرنینگ منظم واکسین بولیشی، کسللیکلرنینگ وقتیده تشخیص بولیشی و چاروهدارلر آگاهیلیگی کوپهیتیریلیشیگه تاکید قیلهدیلر.
