طبیعی آفت‌لرنی باشقریش ایشلری بوییچه دولت وزیرلیگی مسئوللری نینگ ایتیشلریچه، سونگی اوچ کون جریانیده ۷ ولایت‌ده یوز بیرگن سوو تاشقینلر نتیجه‌سیده، ۲۱ کیشی اولیب و ۱۹ کیشی ایسه یره‌لنگن.
شونده‌ی بیرحالده بدخشان، بغلان و فاریاب محلی مسئوللری نینگ ییتکرمه‌لر بیلن شریک قیلگنلری معلومات اساسیده، سونگی اوچ کون جریانیده اوشبو ولایتلر‌ده یوز بیرگن سوو تاشقینلر نتیجه‌سیده، ۱۰۰دن آرتیق کیشی اولگن.
بیزلرنینگ «ایکس» ترماغی ده هم تعقیب قیلینگ!
طبیعی آفت‌لرنی باشقریش ایشلری بوییچه دولت وزیرلیگی سوزلاوچیسی محمد‌عبدالله جان سایق نینگ ایتیشیچه، بدخشان، بغلان، بامیان، سمنگان، تخار، فاریاب و ننگرهار ولایت‌لریده یوز بیرگن اوشبو سوو تاشقینلر نتیجه‌سیده، ۸۳۹ یشش اوی بوتونلی و قسمی شکلده ویران بولیب و ۵ مینگ چاروه تلف بولگن.
جناب سایق نینگ کوپه‌یتیریشیچه: «اوتگن اوچ کون جریانیده ییتی ولایت‌ده یوز بیرگن سوو تاشقینلر نتیجه‌سیده، ۲۱ کیشی اولیب و باشقه ۱۹ کیشی ایسه یره‌لنگن. ۸۳۹ یشش اوی بوتونلی ویران بولیب، ۵ مینگ چاروه تلف بولگن.»
سونگی سوو تاشقینلردن زیان کورگن عایله‌لردن قطاری نینگ ایتیشلریچه، حاضرگچه سرپرست حکومت تامانیدن هیچ قنده‌ی یاردم قولگه کیلتیرمه‌گنلر.
بدخشان ولایتی یمگان تومنی یشاوچیسی خالد احمد نینگ ایتیشیچه: «حاضرگچه بیزلر گه یاردم بیریمه‌گن و اهالی یامان وضعیت‌ده دیر. اهالی نینگ باش‌پنه‌سی یوق و آچیق هوا‌ده حیات کیچیره‌دی. سوو تاشقینی نینگ زیانی بیحد کوپ، ۱۰۰ یشش اوی ویران بولیب و چاروه‌لر تلف بولگن.»
شونینگدیک بغلان ولایتی دوشی تومنی نینگ یکه‌توت قیشلاغی یشاوچیسی عبدالرحیم نینگ ایتیشیچه: «حاضرگچه بیزلر گه یاردم بیریلمه‌گن. حکومت آرقه‌لی بیزلر گه یشش اوی بیریلیشی نی ایسته‌یمیز. کیچه و کوندوز نی تاش‌لر اوستیده اوتکزه‌میز.»
باشقه بیر تاماندن، بیرلشگن ملتلر تشکیلاتی نینگ انسان‌پرورلیک یاردم‌لر نی هماهنگ قیلووچی دفتری (اوچا) گه کوره، غور و فاریاب ولایت‌لریده یوز بیرگن سونگی سوو تاشقینلر نتیجه‌سیده، ۱۳۴ کیشی اولیب و ۷۸۷۰ یشش اوی ویران بولگن.
شونده‌ی بیرحالده، غور مرکزی فیروزکوه شهری نینگ «گلدره» قیشلاغی یشاوچیسی بی‌بی‌خان خداداد نینگ ایتیشیچه: «سیل کیلگنی‌دن حیران بولیب قالدیک و ایرکک‌لریمیز یوق ایدی. برچه نرسه‌میز سیل گه کیتدی.»
بیزلرنینگ فیسبوک صحیفه‌میزگه باش اورینگ!
بوندن آلدین طبیعی آفت‌لرنی باشقریش ایشلری بوییچه دولت وزیرلیگی مسئوللری، ۲۱دن ۳۱-ثور‌گچه سوز بیرگن سوو تاشقینلر نتیجه‌سیده، ۲۹۴ کیشی نینگ اولیب و ۲۶۶ کیشی نینگ یره‌لنگنی نی ایتگن ایدی.
ایتیش کیره‌ک که، طبیعی آفت‌لرنی باشقریش ایشلری بوییچه دولت وزیرلیگی مسئوللری نینگ ایتیشیچه، اوتگن نیچه آی‌ده مملکت بویلب سوو تاشقین‌لریدن زیان کورگن ۵۰ مینگ عایله گه یاردم ترقه‌تیب و بو پروسه نینگ دوامی بار.
