هییت بیرمی عرفه‌سیده، افغانستان ده عیاللردن قطاری ینه بیر مرته سرپرست حکومت‌دن اولرگه یره‌تیلگن تعلیمی و ایش چیکلاو‌لری‌نینگ بیکار قیلینیشی نی ایسته‌گنلر. افغانستاننینگ تورلی ولایت‌لری‌دن بولمیش ۳۱ عیال، سلام‌وطندار بیلن اوتکزگنلری صحبت‌لریده تاکید قیلیشلریچه، عیاللر یوزیگه مکتبلر و بیلیم یورت‌لر ایشیگی آچیلیشی و ایش فرصت‌لری یره‌تیلیشی، بو مناسبت‌ده اولر‌نینگ اینگ اونملی ایسته‌کلری‌دن دیر.
مذکور عیاللر‌گه کوره، اسلامی حکومت هییت بیرمی کونلریده اوز اهالی‌سی اوچون ایجابی آدیم‌لرنی آله‌دی و شونینگدیک افغانستان سرپرست حکومتی هم عیاللر برابریده‌گی چیکلاولرنی بیکار قیلیش بیلن جمعیت وضعیتی یخشی‌لنیشی اوچون آدیم کوتاره آله‌دی. اولر‌نینگ ایشانچی‌گه کوره، بو کبی بیر اقدام افغانستان اهالی اوچون هییت خوشلیگینی نیچه برابر قیلیشی ممکن.
سرپرست حکومت آرقه‌لی تعلیمی چیکلاولر یره‌تیلگنی سبب تحصیلی‌نی دوام بیره آلمه‌گن کابل یشاوچیسی بولمیش ۲۳ یاشر شکوفه‌نینگ ایتیشیچه، تعلیم و ایش توغریسیده تقدیر‌سیزلیک‌دن کیین هییت بیرم‌لری کبی مناسبتی کون‌لرده یوره‌ک‌دن خوش بوله آلمه‌یدی.
بیزلرنینگ «ایکس» ترماغی ده هم تعقیب قیلینگ!
اونینگ ایشانچی‌گه کوره، بیللی بیر تقدیر و پارلاق کیله‌جک بیلن روپه‌ره بولگنی پیتده، حیاتی‌گه حقیقی هییت بیرمی کیلیشی ممکن. «قیزلر برابریده ایش و تحصیلی چیکلاولر بیکار قیلینیشی بیلن حقیقتا یخشی و خوش بیر هییت گه ایگه بولیشی‌میز ممکن. هییت اوزی خوش خبر‌لیک و حکومت تامانیدن مکتبلر آچیلیشی و ایجابی قرارلر کبی باشقه خوش خبرلیک‌لرنی ایشیتگنی‌میزده خوش بوله‌میز. یالغیز قیزلر مکتبلر و بیلیم یورت‌لرگه باره آلسه‌لر و شونینگدیک اولرگه قیته ایش فرصت‌لری یره‌تیلسه، جوده‌یم یخشی بوله‌دی.»
شونینگدیک هرات یشاوچیسی ۲۴ یاشر اسما، رمضان هییت بیرمی ییتیب کیلیشی بیلن، عیاللر برابریده‌گی تحصیلی چیکلاولر بیکار قیلینیشی‌‌نی سوره‌یدی. او سرپرست حکومت‌دن جمعیت‌نینگ فعال‌راق و کوچلی‌راق بولیشی مقصد افغانستان ده عیاللر برابریده‌گی چیکلاولر توغریسیده فکری‌نی اوزگرتیریشی‌نی ایسته‌ب و اورغولشیچه، هییت «افغانستاننینگ مسلمان خلقی» خصوصیده ایجابی قرار آلینیشی اوچون یخشی بیر فرصت دیر.
اسما‌نینگ کوپه‌یتیریشیچه: «افغانستان ده خوش‌لیک بیر جشن بولگن هییت بیرمی ییتیب کیلیشی بیلن، هر بیر قیز‌نینگ ایسته‌گی یالغیز بیر کلمه دیر، تحصیل! مکتب‌ده بولگن کیشیلر و مکتب‌نی بیتیرگن کیشیلر و مینگ‌لرچه آرزو بیلن بیلیم یورت تامان باره‌دیگن کیشیلر. دولت‌دن عیاللر تحصیلی توغریسیده‌گی فکری‌نی اوزگرتیریشی‌نی ایسته‌یمیز که فعال‌راق بیر جمعیت‌گه ایگه بوله‌یلیک. جبران قیلیش اوچون اصلا کیچ ایمس، قنچه یخشی بوله‌دی که هییت بیرمی بیلن قیزلر تحصیلی توغریسیده ایجابی قرار آلینسه.»
باشقه بیرتاماندن، کابل یشاوچیسی ۲۲ سمیه و بلخ یشاوچیسی ۲۱ یاشر ارغوان، رمضان هییتی ییتیب کیلیشی بیلن سرپرست حکومت‌دن بولگن ایسته‌کلرینی بو رقم بیان قیله‌دیلر.
سمیه‌نینگ ایتیشیچه: «مین کوپینچه آرزولر‌یم‌گه ییتیشمه‌دیم و قیسی آرزو‌مگه ییتیشیب و ییتیشمه‌‌گنیم‌نی سیزلرگه ایته آلمه‌یمین. هیچ بیر آرزو‌م گه ییتیشمه‌دیم دیب ایته آله‌من؛ چونکه مینی برچه آرزو‌لریم بیلیم یورت و ایشیم ایدی. هییت بیرمی حکومت گه یخشی ایجابی بیر فرصت بوله‌دی که عیاللر برابریده‌گی چیکلاولرنی بیکار قیلسه.»
شونینگدیک ارغوان‌نینگ ایتیشیچه: «قیزلر‌نینگ شخصی و اجتماعی رواجلنیش و ترقیات‌گه قول تاپیش‌لری اوچون اولرگه تعلیمی فرصت‌لری یره‌تیلیشی، حکومت‌دن بولگن اونملی ایسته‌گیم دیر. عیاللر‌نینگ ایش بیلن شغللنیشی اوچون کوپینچه فرصت‌لر یره‌تیلسین که جمعیت‌ده فعال بولسینلر. حکومت چیکلاولرنی بیکار قیلگنی صورت‌ده، بو عیاللر حقوقی‌گه آزاد‌لیک حرمت معناسی‌گه بولیشی و هییت بیرمی خوشلیگینی بیزلرگه نیچه برابر قیلیشی ممکن.»
شونینگدیک عیال حقوقی فعاللری، اوشبو چیکلاو‌لر‌نینگ بیکار قیلیشی‌گه تاکید‌لب و ایتیشلریچه، سرپرست حکومت‌دن هییت بیرمی ییتیب کیلیشی بیلن ایجابی آدیم صفتیده، عیاللر برابریده چیکلاولرنی کمه‌یتیره آله‌دی.
بیزلرنینگ فیسبوک صحیفه‌میزگه باش اورینگ!
عیال حقوقی فعالی فروزان داوود‌زی‌نینگ ایتیشیچه: «افغانستان جمعیتی‌نینگ بویوک بیر قسمی‌نی عیاللر تشکیل بیره‌دی. بیر جمعیت‌ده سواد‌سیز عیاللر قرانغو و جمعیت‌نینگ رواجلنمسلیگی‌گه سبب بوله‌دی. اسلامی حکومت‌دن بو چیکلاولرگه جدی توجه قیلیشی‌نی ایسته‌یمن که یخشی کیله‌جک و ثبات‌لی بیر مملکت‌گه ایگه بوله‌یلیک.»
عیال حقوقی فعاللریدن باشقه بیری تهمینه منگل‌نینگ ایتیشیچه: «هیچ بیر جمعیت عیاللر‌نینگ فعالی حضوری بولمس‌دن رواجلنه آلمه‌یدی. رمضان هییتی ییتیب کیلیشی بیلن، حکومت‌نینگ آله‌دیگن اینگ یخشی قراری قیزلر یوزیگه مکتبلر و بیلیم یورت‌لر ایشی‌نی آچیشی و عیاللر ایشی برابریده توسیق‌لیک‌نی بیکار قیلیشی دیر. بو اقدام کوپ یخشی بوله آله‌دی؛ نه فقط عیاللر، بلکیم بوتون جمعیت اوندن فایده‌لنه آله‌دی.»
ایتیش کیره‌ک که، سرپرست حکومت تامانیدن یره‌تیلگن چیکلاولر سبب ۲.۵ میلیون‌دن آرتیق قیز تحصیل‌دن محروم قالیب و هر ییلی اولر سانی کوپه‌یه‌دی.
