«افغانستان-مرکزی آسیا» بیرینچی مصلحتی ییغیلیشی، بوگون (۱۶ حمل/۵ اپریل، یکشنبه) اسلام امیرلیگی تشقی ایشلر وزیرلیگی تشبثی و اوزبیکستان، قرغیزستان، تورکمنستان، تاجیکستان و قزاقستان ییریک رسمیلرینینگ اشتراکی بیلن کابلده اوتکزیلدی.
مملکت تشقی ایشلر وزیری امیرخان متقی، بو ییغیلیش سیاسی مذاکرهلر مستحکملنیشی، ینگی امکانیتلر قیدیریلیشی، منطقهوی همکارلیکلر کینگهیتیریلیشی همده افغانستان و مرکزی آسیا مملکتلری آرهسیده دیپلماتیک اویغونلیکلر مستحکملنیشی مقصدیده اوتکزیلگنینی بیلدیردی.
او شوندهی دییدی: «بو ییغیلیش سیاسی مذاکرهلر مستحکملنیشی، اسلام امیرلیگی و مرکزی آسیا مملکتلری آرهسیده دیپلماتیک اویغونلیک، افغانستان و اوشبو مملکتلر اورتهسیده همکارلیک ینگی امکانیتلر قیدیریلیشی، اقتصاد گه دایر منطقهوی همکارلیکلرنی کینگهیتیریش مقصدیده اوتکزیلدی.»
متقینینگ کوپهیتیریشیچه، داعش تهدیدلری، بنگیوار مادهلر قاچاق ایتیلیشی، چیگرهدن تشقری جنایتلر، افغانستان و مرکزی آسیا مملکتلرینینگ قوشمه تشویشلریدن حسابلنهدی.
اوشبو ییغیلیشده تشقی ایشلر وزیرلیگی رسمیلری، قوشمه امنیتی معمالر و تشویشلرنی حساب گه آلیب، افغانستان و مرکزی آسیا دولتلری اورتهسیده موافقلشتیریلگن خوفسیزلیک یاندهشووی حقیده مذاکره آلیب باریلیشی ضرورلیگینی تأکیدلهدیلر.
اسلام امیرلیگی تشقی ایشلر وزیرلیگینینگ سیاست بوییچه اوچینچی باشلیغی ذاکر جلالی شوندهی دییدی: «اسلام امیرلیگی اقتصاد گه یونهلتیریلگن سیاستی و یاندهشوویدن الهاملنگن حالده، اوشبو اوچرهشوو افغانستان و مرکزی آسیا دولتلری اورتهسیدهگی عمومی جهتلر و مسئلهلرنی محاکمه قیلیش مقصدیده اوتکزیلدی.»
امیرخان متقی، کیلهسی ۳-۴ ییل دوامیده افغانستان و مرکزی آسیا دولتلری اورتهسیده سودا آلیش-بیریش مقداری دییرلی ۱۰ میلیارد دالر گه آشیشگه امیدوارلیک بیلدیردی.
