بوگون ۲۰-جون، خلقارا قاچقینلر کونیگه ماس دیر. اوشبو کون مناسبتی بیلن بیرلشگن ملتلر تشکیلاتینینگ قاچقینلر ایشلری بوییچه عالی کمیسارلیگی، مملکتگه قیتگنلرنینگ محلی جمعیتلرگه قیته قوشیلیشینی قوللب-قوتلش ضرورلیگیگه تاکید قیلگن.
شونینگدیک تورلی مملکتلردهگی افغانستانلیک قاچقینلردن قطارینینگ ایتیشلریچه، حاضر باشقه هر وقتگه قرهگنده کوپراق مهاجرتی قیینچیلیکلر بیلن روپهره بولگنلر.
بو آرهده، تاجیکستان دهگی افغانستانلیک قاچقینلردن بیری خاطرهنینگ ایتیشیچه، قیینچیلیکلر بولگنی بیلن ینه هم قاچقینلر دوسیهلریگه ییتیشیش جریانی و شرایطی یخشیلنیشیگه امیدوار دیر. «بو ییرده کوپینچه قیینچیلیک بیلن روپهرهمیز. یشش قانونی حجتیگه ایگه بولمسلیک، بیللی ایش تاپه آلمسلیک و ایش امنیتی کملیگی اصلی قیینچیلیکلریمیزدن دیر. بعضی وقتلر ایش تاپیلهدی، بیراق دواملی ایمس و هر لحظه ایشسیز بولیشمیز ممکن.»
پاکستان دهگی افغانستانلیک قاچقینلردن مدینه، بو مملکتده کون اوتیشی بیلن قاچقینلر قیینچیلیگی کوپهیشی توغریسیده شوندهی دیدی: «پاکستان هر کونی اینیقسه یشش حجتی توغریسیده قیینچیلیکلر کوپهیماقده. ایش امنیتیگه ایگه ایمسمیز و هر دقیقه ایشسیز بولیش یا-ده ایش محلیدن چیقریلیش امکانی بار. بعضا ایش محیطیده نامناسب یاندهشوو بیلن روپهره بولهمیز و حقوقیمیز نظرگه آلینمهیدی. اوشبو قیینچیلیکلر بولگنی بیلن ینه هم حیات خرهجتینی تامینلش گه مجبورمیز، لیکن کیلهجگیمیز هیچ معلوم ایمس.»
باشقه بیرتاماندن ایسه ییلر یا-ده آیلر اوتیب اوز اولکهسیگه قیتگن قاچقینلر بولیب، اولرنینگ جمعیتگه قیته قوشیلیشی یولیده کوپلب معمالر موجود. اوی-جای، ایش اورینلری و حیات اوچون ضرور بولگن دستلبکی امکانیتلرنینگ ییتیشمسلیگی انه شوو معمالرنینگ بیر قسمی دیر.
ینگیلیکده عایلهسی بیلن افغانستان گه قیتگن نگینهنینگ ایتیشیچه: «مملکت گه قیتیش، اوی تاپیش و حیاتنینگ نیازلرینی تامینلش مینی اوچون قیین ایدی. حاضرگچه وضعیت بوتونلی یخشی بولمهگن. اوی-جای تاپدیک، بیراق حاضرگچه ایش و یخشیراق امکانیتگه قول تاپه آلمهگنمیز.»
شوندهی بیرحالده، اسلام امیرلیگی قاچقینلر وزیرلیگی سوزلاوچیسی عبدالمطلب حقانینینگ ایتیشیچه، اوشبو وزیرلیک مملکت گه قیتگنلر اوچون بیر قطار دستورلر اینیقسه مسلک اورگهتیش دستورلرنی قولگه آلگن.
اونگه کوره، مملکت گه قیتگنلر اوچون ییر ترقهلیش جریانی هم دوام قیلماقده. «اوتگن بیر ییلده ۵۲۲ مینگ ۵۴ عایله اوشبو وزیرلیک یاردملریدن فایدهلنگن که یاردملر توپلمی ۳ میلیارد ۵۴۳ میلیون افغانیگه ییتیشهدی. مذکور یاردملر دستلبکی مادهلر، باشپنه، ساغلیقنی سقلش خذمتلری و نقد پولدن عبارت دیر. شونینگدیک مملکت گه قیتگنلر اوچون ییر ترقهلیش جریانی هم دوام قیلماقده.»
بو بیلن بیرگه، بیرلشگن ملتلر تشکیلاتینینگ انسانسیورلیک یاردملرنی هماهنگ قیلووچی ادارهسی (اوچا) گه کوره، ۲۰۲۳-ییل سپتمبر آییدن بویان، ایران و پاکستان دن آلتی میلیوندن آرتیق کیشی مملکت گه قیتگن. بولرگه علاوه، باشقه یوزلب مینگ کیشی اقلیم اوزگریشلری، طبیعی واقعهلر و اوروشلر سبب آواره بولگن. بیرلشگن ملتلر تشکیلاتی ترقیاتی دستورینینگ آگاهلنتیریشیچه، افغانستان حاضر دنیا ده اینگ ییریک آوارهلیک انقراضلریدن بیری بیلن روپهره دیر.
