اسلام امیرلیگی باش وزیرینینگ اقتصادی اورین باسری عبدالغنی برادر، دنیا همجمعیت و خلقارا نهادلردن افغانستان گه قوییلگن بانکی و مالی چیکلاولرنینگ یکونلنتیریلیشینی ایستهگن.
او، بوگون (۱۵-سنبله، شنبه)، «افغانستاننینگ برق سکتورینی قوللب-قوتلش و سرمایه یاتقیزیلیشنی جذب قیلیش» توغریسیدهگی کنفرانسده ایتیشیچه، اوشبو چیکلاولر مملکتده تشقی سرمایه یاتقیزیلیش جریانیگه تاثیر قویگن.
برادر گه کوره، افغانستان سوو، شمال و قویاش برقینی ایشلب چیقریش اوچون کینگ کولملی منبعلرگه ایگه بولیب و اوندن یخشی شکلده فایدهلنیلیشی، مملکتنی برق ایشلب چیقریش ساحهسیده خودکفالیک تامان آلیب باریشی و حتا باشقه مملکتلرگه انرژی صادراتیگه امکانیت یرهته آلیشی ممکن.
مذکور کنفرانس، کابل ده اسلام امیرلیگی کابینه اعضاسی، اوزبیکستان و تورکمنستان انرژی بوییچه وزیرلری، بیر قطار مملکتلر نمایندهلری، بیرلشگن ملتلر تشکیلاتی، دنیا بانکی، آسیا بوییچه ترقیات بانکی، ایلچیخانهلردن قطاری، ایچکی و تشقی خصوصی سکتور مسئوللری، نادولتی نهادلر و قیته تیکلنووچی انرژینینگ قوللب-قوتلاوچی نهادلر نمایندهلری حضوری بیلن اوتکزیلگن.
بو ییغیلیشدن مقصد، افغانستان برق سکتوریده سرمایه یاتقیزیش فرصتلری و امکانیتلرینی تانیشتیریش، ایچکی تشقی سرمایه یاتقیزووچیلرنینگ دایمی جذب قیلیش، قیینچیلیکلرنی انیقلش و عملی ییچیم یوللرنی کورسهتیش، برق سکتوریده تخصصی بیلیمنینگ رواجلنتیریش، همکارلیکنی مستحکملش و دولتی و خصوصی سکتورلر آرهسیده هماهنگلیک و شونینگدیک برقنینگ منطقهای باغلهنیش امکانیتینی یرهتیش دییلگن.
