هرات شهریده بیر عیال، تورلیخیل ترشی تیارلش و اونی بازار گه چیقریش بیلن، عایلهسینینگ نیازلرینی تامین قیلهدی.
۱۰ ییل آلدین اوییده ترشی تیالش بولیمیده ایشگه باشلهگن ثریا قربانینینگ ایتیشیچه، هر هفته قریب ۲۰۰ کیلوگرام ترشی تیارلب و بازار گه چیقرهدی. «بوندن آلدین تیکووچیلیک قیلهر ایدیم؛ لیکن تیکووچیلیک قیلهدیگن کیشیلر سانی کوپهیگنیدن کیین، ترشی تیارلشگه یوز کیلتیردیم.»
ثریانینگ کوپهیتیریشیچه، شور سالاد، سریمساق ترشیسی، رُب و المه سرکیسینی تیارلب و ساتیش بیلن، یخشیراق درآمد قولگه کیلتیرهدی. «حاضر مادهلر قیمتی آشگنی بولسهده، ینه هم قولگه کیلتیرهدیگنیم درامد یخشی دیر.»
ترشی تیارلش اوچون مناسب محیط یوقلیگی و کتهراق بازارلردن فایدهلنه آلمسلیک سبب، ثریانینگ کیچیک تجارتی کمراق رواجلنگن. مذکور عیال گه کوره: «بوندن آلدین کوپینچه دکان گه آلیب بارهر ایدیم؛ بیبی سمیه مارکیتیده غرفهم بار ایدی و عیاللر کوپراق کیلهر ایدی؛ لیکن حاضر عیاللر کمراق کیلهدی.»
ایشینی رواجلنتیریش اوچون سعیوحرکت قیلهدیگن ثریا قربانی، باشقه عیاللرگه خطاب ایتیشیچه: «هر ایشگه که قیزیقهدیلر، صفردن باشلهسینلر؛ اوز ایاقلریده توختهسینلر. آدم اوزی تاپگن پولنینگ باشقه بیر حسی بار؛ هر قنچه چرچهگن بولسه هم ینه، چرچهگنی یادیدن چیقیب کیتهدی.»
ثریانینگ حکایهسی، عیاللر گه مناسب حمایت، اورگهتیش و بازاردن فایدهلنیش امکانیتی یرهتیلگنی صورتده، اولر عایلهلرینینگ اقتصادی یوکینی کمهیتیریب و خودکفالیک سری مستحکمراق آدیملرنینگ آلالیشلرینی کورستهدی.
