سمنگان مرکزیده تدقیقات منبعلری کملیگی و تومنلریدن قطاریده عامه کتابخانهلر یوقلیگی، کتاب اوقیش فرهنگی رواجلنیشی و تعلیمی بولیمده جدی قیینچیلیکلردن بیریگه اوزگرگن. کون اوتیشی بیلن علمی منبعلر و ینگی کتابلرگه یاشلر و طلبهلر نیازی کوپهیشی بیرحالده، کتابخانه امکانیتلری چیکلنگنی سبب، مطالعه گه قیزیققنلردن قطاری ایشانچلی منبعلرگه قول تاپیش اوچون قیینچیلیکلر بیلن روپهره بولهدیلر.
سمنگان ده فرهنگی مسئوللرنینگ ایتیشلریچه، کتابخانهلرنی کوچهیتیریش اوچون سعیوحرکتلرنینگ دوامی بار؛ بیراق یاشلر و طلبهلردن قطارینینگ اورغولشیچه، بار امکانیتلر اولرنینگ تدقیقات احتیاجلرینی قاندیره آلمهیدی.
سمنگان ده تعلیم و تربیه بولیمی طلبهسی بولمیش ۲۱ یاشر مهرابالدیننینگ ایتیشیچه، مطالعه یاشلر بیلیمی آشیشی و فکری رشد قیلیشیده مهم اورینگه ایگه دیر. او، کتابخانهلر و تدقیقات منبعلری کملیگینی یاشلرنینگ کتابدن فایدهلنیش امکانیتینی چیکلاوچی عامللریدن بیری صفتیده بیلهدی.
اونینگ کوپهیتیریشیچه، مکتبلر، مدرسهلر و فرهنگی مرکزلرده تورلی بولیملرگه تیگیشلی تورلی کتابلر بیلن کتابخانهلر قوریلیشی کیرهک. «کتابلرنینگ فرقلی تاثیرلری بار. هر بیر مکتب و مدرسه اینیقسه معلومات و مدنیت ریاستیده، عمومی و تخصصی کتابلر اجتماعی، علمی و باشقه بولیملرده بولیشی کیرهک. حاضر ایسه مرکزده یالغیز ایکیته کتابخانهمیز بار؛ دولتدن کوپینچه کتابخانهلرنینگ توزهتیشینی سورهیمیز.»
اقتصاد بولیمی طلبهسی بولمیش ۲۲ یاشر ادریس، شونینگدیک کتابخانهلر کملیگینی تدقیقات منبعلرگه یاشلرنینگ قول تاپیشی بوییچه اصلی توسیقلردن بیری صفتیده بیلهدی. اونگه کوره، ییترلیچه کتابخانهلر یوقلیگی اینیقسه تومنلرده، کتاب اوقیش فرصتی و یاشلر بیلیم سطحی آشیشینی کمهیتیرگن.
اونینگ ایتیشیچه: «کمیده هر بیر تومنده ایکی-اوچ ته کتابخانه قوریلسین؛ چونکه کتابخانه بولمهگنیده، یاشلر تاریخ، بیولوژی و کیمیا کبی بولیملردهگی معلوماتلردن کوپینچهسیدن محروم قالهدی. یاشلرنینگ فایدهلنه آلیشی اوچون مرکزده هم کوپینچه کتابخانهلر قوریلیشی کیرهک.»
طلبهلر یانیده، اوقیتووچیلر هم تعلیم صفتی یخشیلنیشی و اورگهنیش جریانی کوچلنیشیده کتابخانهلر اهمیتیگه تاکید قیلهدیلرو سمنگان ده تعلیم و تربیه بولیمی استادی نرگس احمدیگه کوره، کتابخانه یوقلیگی اوقووچیلر و طلبهلردن مطالعه و تدقیق امکانیتینی آلیب، اولرنینگ علمی و فکری رشدیگه سلبی تاثیر قویهدی.
اونینگ کوپهیتیریشیچه: «کتابخانهلر قوریلیشی تعلیم توزیمیگه جودهیم کوپ یاردم بیرهدی. کتابخانه یوقلیگی تعلیموتربیه جریانی، اوقووچیلرنینگ علمی و فکری رشدیگه سلبی تاثیری بار. اوقووچیلر درسی کتابلر موضوعلریدن تشقری مطالعه و تدقیق قیلیشگه نیازلری بار و بو توغریده کتابخانهلر آچیلسین. اونینگ بولمهگنی، بو امکانیتنی اولردن آلهدی.»
شونینگدیک سمنگان مکتبلریدن بیریدهگی اوقووچیلردن نجیبالله نهضتنینگ ایتیشیچه، تکنولوژی رواجلنیشی بیلن کتاب و کتابخانه شونینگدیک تعلیمی توزیمنینگ اساسی نیازلریدن دیر. «کتابخانه اوقووچیلر، طلبهلر و یاشلر رشدیده مهم رول اوینهیدی. اولر نیازلریدن کوپینچهسینی کتابخانهلر آرقهلی حل قیله آلهدیلر. اوقووچیلرنینگ کتابخانهلر آرقهلی قولگه کیلتیرهدیگن نرسهلر، دایم درسی کتابلر و حتا دیجیتالی منبعلردن قولی بیر شکلده تاپیلمهیدی. شهر و تومنلر مکتبلریده کتابخانهلر آچیلیشینی تکلیف بیرهمیز.»
دولتی نهادلر یانیده، محلی فرهنگی نهادلردن قطاری هم آز امکانیت بیلن مطالعه فرهنگی رواجلنیشی و کتاب گه یاشلرنینگ قول تاپیشی کوپهیشی اوچون سعیوحرکت قیلماقده.
«راه دانش» نهادی مدیری ۲۲ یاشر تبریزنینگ ایتیشیچه، سمنگان دهگی کتابخانه امکانیتلری یاشلر مطالعهسی نیازلریگه جواب بیرمهیدی. اونینگ کوپهیتیریشیچه: «منطقهمیزده عمومی کتابخانه بار و اوندن فایدهلنهمیز؛ بیراق کوپینچه کتابخانهلر یوقلیگی سبب، طلبهلر ییترلی منبعلرگه قول تاپه آلمهیدیلر. مسئوللرگه پیامیمیز بو که کتابخانهلر کوپهیسین. بیر ولایت اوچون بیرته کتابخانه ییترلی ایمس؛ یاشلر درسی، رمان، حکایه، شعر و ادبیات کتابلریگه قول تاپه آلسینلر.»
شوندهی بیرحالده، سمنگان معلومات و مدنیت ریاستیده مسئوللرنینگ ایتیشلریچه، عامه کتابخانهلر رواجلنیشی و تدقیقاتی منبعلرگه یشاوچیلرنینگ فایدهلنیشی کوپهیشی اوچون بیرقطار برنامهلر بار. سمنگان معلومات و مدنیت ریاستی عامه کتابخانهلر عمومی مدیری جانمحمد امیرینینگ ایتیشیچه، حاضر بو ولایت مرکزیده ایکی کتابخانهنینگ فعالیتی بولیب و تومنلردن قطاریده هم کتابخانهلر فعال دیر.
اونینگ کوپهیتیریشیچه: «بیزلرگه مراجعت قیلهدیگن یاشلر کوپراق ینگی کتابلر یوقلیگی و کتابخانهلر کملیگیدن شکایت قیلهدیلر. بو موضوعنی تیگیشلی وزیرلیک بیلن اورته گه قویدیک که مرکز و تومنلرده کتابخانهلر سانی کوپهیسه و اهالی کوپراق مطالعه و کتاب اوقیش فرهنگی رواجلنیشیگه یوز کیلتیرسهلر.»
سمنگان معلومات و مدنیت ریاستینینگ فرهنگ و هنر آمری عبدالخلیل جاوید شریفی، جمعیت فکری رشدیده کتابخانهلر اورنیگه تاکید قیلیب و ایتیشیچه: «تورلی منبعلرگه ایگه کتابخانهلر، جمعیتده مهم اورینگه ایگه دیر؛ چونکه اولرده بیلیملردن قطاری توپلنگن. کتابخانهلر اوقووچیلر، یاشلر و اوسمیرلر فکری رشدی اوچون جودهیم ضرور دیر و اولرنینگ یوقلیگی، جمعیتنینگ بیلیم سطحیگه سلبی تاثیر قویه آلهدی.»
بیرلشگن ملتلر تشکیلاتینینگ تعلیم، بیلیم و فرهنگ تشکیلاتی (یونسکو)، کتابخانهلرنی حیات جریانیده اورگهنیش و تعلیم رواجلنیشی بوییچه اساسی پایهلردن دیگن. مذکور تشکیلاتنینگ اورغولشیچه، کتاب، علمی منبعلر و کتابخانه خذمتلریگه برابر قول تاپیش، سواد کوپهیشی، مطالعه فرهنگی مستحکملنیشی، تنقیدی فکر رواجلنیشی و جمعیتگه یشاوچیلرنینگ بیلیش بیلن شرکت قیلیشده مهم اورینگه ایگه دیر.
