اوشبو حادثه بوگون (دوشنبه ۲۱- میزان) ایرته‌لب قندوز شهری گه تیگیشلی «شورابی» قیشلاغیده یوزبیرگن.
قربانیلر اقارب‌لری نینگ سلام وطندراگه ایتیش‌لریچه، مذکور هاوان اصابتی باعث بیر عیال، ایکی باله و بیر یاش ایرکک شامل بیر عایله نینگ ۴ اعضاسی هلاک بولگن.
اولرگه کوره، امنیتی کوچلر و طالبان گروهی آره‌سیده آتیشمه یوزبیرگن بیرچاغده، مذکور هاوان بو یشش اویده اصابت قیلگن. اوشبو عایله اقارب‌لری نینگ کوپه‌یتیریش‌لریچه، مذکور هاوان امنیتی کوچلر یا-ده طالبان گروهی تامانیدن آتیلگنی حاضرگچه بیللی بولمه‌گن.
بیراق قندوز ولایتیدن ایشانچلی بیر امنیتی منبع آتی فاش ایتیلیشی نی ایستمه‌ی سلام‌وطندارگه ایتیشیچه، امنیتی کوچلر تامانیدن عملیات یولگه قویلگن بیر حالده مذکور هاوان طالبان گروهی تامانیدن بو قیشلاق اوستیگه آتیلگن. منبع گه کوره، بو حادثه‌ده بیر عایله نینگ اوچ اعضاسی شامل ۴ کیشی هلاک بولگن. منبع نینگ کوپه‌یتیریشیچه، اوشبو حادثه‌ده بیر باله تن جراحتی کوتارگن.
بیراق قندوز پولیسی سوزلاوچیسی هجرت‌الله اکبری نینگ ایتیشیچه، مذکور هاوان طالبان جنگری‌لری تامانیدن آتیلگن کیم نتیجه‌ده، عیاللر و باله‌لر شامل ۵ تینچ‌اهالی هلاک بولگن. اونگه کوره، بو حادثه‌ده عیاللر و باله‌لر شامل باشقه ۷ کیشی یره‌لنگن.
طالبان گروهی حاضرگچه بو حقده فکر بیلدیرمه‌گن.
