افغانستان فوتبال فدراسیونینینگ فوتسال کمیتهسی و «ملی سپورت» تلویزیونی آرهسیده، کابل فوتسال لیگهسی ییتینچی دور بیلهشوولرینینگ جانلی یایینلنیشی مقصد، همکارلیک شرطنامه امضالنگن. مذکور شرطنامه بوگون (۲۳-جدی، سهشنبه)، کابل ده افغانستان فوتسال کمیتهسینینگ اداری مدیری خلیل یعقوبی و افغانستان ملی تلویزیونینینگ پلان و پالیسی مسئولی محمدفهیم رامکی آرهسیده امضالنگن.
مذکور برنامهده افغانستان فوتبال فدراسیونی نشرات مسئولی مصطفا هاشمینینگ ایتیشیچه، کیلهسی ییتی کونگچه کابل فوتسال لیگهسینینگ ییتینچی دور بیلهشوولری، افغانستان فوتبال فدراسیونی فوتسال کمیتهسی جمنازیومیده اوتکزیلهدی. «بوگون افغانستان فوتبال فدراسیونی فوتستال کمیتهسی و ملی سپورت تلویزیونی آرهسیده همکارلیک شرطنامه امضالندی. کابل فوتسال لیگهسی بیلهشوولرینینگ ییتینچی دوری ۲۰۲۶-ییل ۲۰-جنوری رسمی شکلده باشلنهدی. بیلهشوولر افغانستان فوتبال فدراسیونی فوتسال کمیتهسی جمنازیومیده اوتکزیلهدی.»
افغانستان فوتبال فدراسیونی فوتسال کمیتهسینینگ اداری مدیری خلیل یعقوبیگه کوره، بو بیلهشوولرگه ۱۱ جماعهنینگ شرکت قیلیشی ممکن. «کابل فوتسال لیگهسینینگ ییتینچی دوری افغانستان ملی تلویزیونینینگ حمایتی بیلن اوتکزیلهدی و اوشبو بیلهشوولرگه ۱۱ جماعه شرکت قیلهدی. معلوماتلرگه کوره یخشی و یاش اویینچیلر قتنشگن. اویینچیلرینینگ ۱۷ یاشنی تولدیرمهگن جماعهلرگه یخشی بیر خبر بار؛ چونکه افغانستاننینگ ۱۷ یاشنی تولدیرمهگن ملی تیرمه جماعهسی خلقارا المپیک بیلهشوولریگه یول تاپگن، مذکور بیلهشوولرده ایکی جماعه قهرمان و نایبقهرمان بولیب و بو بیلهشوولردن افغانستان زونلری بوییچه قهرمانلیک بیلهشوولریگه یول تاپهدی.»
شوندهی بیرحالده، افغانستان ملی تلویزیونی پلان و پالیسی مسئولی محمدفهیم رامکی، مذکور بیلهشوولرنینگ جانلی یایینلنیشیدن مقصد، ملی و خلقارا میدانلرده افغانستان فوتسالینینگ رواجلنیشی عنوان قیلگن. «ملی تلویزیونینینگ فوتسال کمیتهسی بیلن ایکی تامانلمه همکارلیکاری دوامیده، مقصدی فوتسال رواجلنیشی دیر. ملی و خلقارا میدانلرده کابل فوتسال بیلهشوولری اوشبو ییتینچی لیگهسینینگ یخشیراق صفت و فرقلی شکلده افغانستان بویلب جانلی و مستقیم یایینلشگه سعیوحرکت قیلهمیز.»
افغانستان فوتبال فدراسیونی معلوماتی اساسیده، اوشبو بیلهشوولر ۲۸ کون دوام قیلیب و هر کونی ایکی مسابقه اوتکزیلیشی ممکن.
