ایچکی ایشلر وزیرلیگی نینگ ایتیشیچه، جمهور رئیس بویروغی بیلن مملکت قماقخانه‌لریدن آزاد ایتیلگن قطار طالبان قیته‌دن اوروش میدانی گه بارگن.
بوگون (سه‌شنبه ۲۰- عقرب) ایچکی ایشلر وزیرلیگی سوزلاوچیسی طارق آرین ویدیوی بیر پیام آرقه‌لی، قماقخانه‌دن آزاد ایتیلگن ۵۸۰ دن آرتیق طالب قیته‌دن اوروش میدانی گه بارگنی نی بیلدیرگن.
جناب آرین گه کوره، قوییب یوباریلگن طالبان قیته‌دن اوروش میدانی گه باریشی طالبان تامانیدن بیریلگن وعده گه قرشی دیر.
ایچکی‌ایشلر وزیرلیگی سوزلاوچیسی نینگ کوپه‌یتیریشیچه، طالبان گروهی اوروش تکتیکی نی اوزگرتیرگن و اولر ماین ییرلشتیریش و پارتله‌تیش بیلن کوپینچه امتیاز قولگه کیلتیریش نی ایسته‌یدی.
اوتگن کونی جمهور رئیس ایکینچی اورین باسری محمد سرور دانش هم، قماقخانه‌دن آزاد ایتیلگن قطار طالب اوروش میدانی گه باریب، افغانستان امنیتی کوچلری گه قرشی اوریشگنی نی ایتگن ایدی.
جمهور رئیس ایکینچی اورین باسری گه کوره، طالبان تینچ‌لیک پروسه‌سی آلغه کیتیشی اوچون اصلی توسیق دیر.
نیچه پیت آلدین افغانستان دولتی ۶ مینگ‌دن آرتیق طالب نی مملکت قماقخانه‌لریدن آزاد قیلدی. طالبان محبوس‌لری آمریکا و مذکور گروه آره‌سیده امضالنگن کیلیشوونامه اساسیگه قوییب یوباریلدی.
لیکن طالبان گروهی، قماقخانه‌دن آزاد ایتیلگن محبوس‌لری نینگ اوروش میدانی گه قیتگنی نی هردایم رد قیلگن.