سرپل ده اسلام امیرلیگی حاکمیتیدن کیین «استقلال» عنوانیده بیرینچی مرته فرهنگی_ادبی شعرخوان‌لیک مراسمی یولگه قوییلدی. اوشبو شعرخوان‌لیک مراسمی شنبه کونی، ۲۵ سنبله، بیر قطار شاعرلر، یازووچیلر و ییگیت‌لر حضوری بیلن سرپل معلومات و مدنیت ریاستی تامانیدن یولگه قوییلگن.
مذکور فرهنگی مراسم ده اشتراک ایتگن شاعرلر و یازووچیلر، شعر و مقاله‌لرینی اوقیش گه علاوه، سرپل معلومات و مدنیت ریاستی مسئوللری دن کتاب‌لری و علمی مقاله‌لری چاپ ایتیلیشی اوچون یاردم بیریش‌لرینی طلب قیلگنلر.
جوزجان شاعرلر و یازووچیلر اویوشمه‌سی باشلیغی علیشیر انتظار، ییگیت‌لر آره‌سیده کتاب اوقیش فرهنگی رواجلنیشی اوچون بو کبی برنامه‌لر یولگه قوییلیشینی تأثیرچن عنوان قیلیب ایتیشیچه: «افسوس بیلن اقتصادی قیینچیلیک باعث شاعرلر و یازووچیلر اوز کتاب‌لرینی چاپ ایته آلمه‌گنلر.»
بیزلرنینگ فیسبوک صحیفه‌میزگه باش اورینگ!
سرپل و جوزجان ده‌شاعرلر و یازووچیلر، اسلام امیرلیگی و نهادلردن ییگیت‌لر نینگ مهارت‌لرینی آشیریش و باشقه ییگیت‌لر نی ترغیب قیلیش اوچون، یاردم بیریش‌لرینی طلب قیلگنلر.
سرپل ده شاعر صفی‌الله ندیم نینگ ایتیشیچه: «اسلام امیرلیگی و نهادلردن بو کبی برنامه‌لرنی کوپراق یولگه قوییب و شاعرلر و یازووچیلرنی قوللب قوتلشینی ایسته‌یمیز.»
عین‌حالده مذکور مراسم ده، سرپل و جوزجان معلومات و مدنیت ریاست‌لری مسئوللری، اوشبو ولایت‌لرده شاعرلر و یازووچیلر نینگ قیینچیلیک‌لری حلی اوچون سعی‌وحرکت قیلیش‌لریدن ایشانچ بیرگنلر.
سرپل معلومات و مدنیت باشلیغی فخرالدین عمیر سرپلی گه کوره، مذکور ولایت ده شاعرلر و یازووچیلر نینگ برچه قیینچیلیک‌لرینی معلومات و مدنیت وزیرلیگی بیلن شریک قیلگن. او نینگ کوپه‌یتیریشیچه: «بیر ییرده توپلنگنیمیز دن خورسند من. شاعرلر نینگ قیینچیلیک‌لری حلی و کتاب و مقاله‌لرینی چاپ قیلیش اوچون تلاش قیله‌یپمیز.»
بیزلرنینگ توییترده هم تعقیب قیلینگ!
باشقه تاماندن، جوزجان معلومات و مدنیت باشلیغی سیف‌الدین معتصم گه کوره، مذکور برنامه اتحاد و اویغون‌لیک پیامی گه قوشیمچه، ییگیت‌لر اوز مهارت‌لرینی آشیریش و یره‌تیلگن فرصت‌لر دن فایده‌لنیش اوچون ییگیت‌لر و اوسمیرلر گه اویغانیش پیامی بار. او نینگ کوپه‌یتیریشیچه: «بو برنامه نینگ اتحاد و اویغون‌لیک پیامی بار. شاعرلر و یازووچیلر بو کبی برنامه‌لرده اشتراک ایتیش اوچون ولایت‌لر آره‌سیده فاصله‌نی قیسقرتیرگن. بو تینچلیک و ثبات ثمره‌سی دیر.»
سرپل و جوزجان معلومات و مدنیت ریاست‌لری مسئوللری نینگ ایتیشلریچه، اوشبو ولایت ده کیله‌جک‌لرده فرهنگی_ادبی برنامه‌لر یولگه قویلیشی ممکن.
