طالبان پنجشیر نی نظارت گه آلگن‌لرینی ادعا قیلگنیدن بیر نیچه ساعت اوتگنیدن کیین، ملی مقاومت جبهه قومندانی احمد مسعود سیسلی بیر پیام آرقه‌لی، افغانستان اهالیسی نی طالبان گه قرشی عمومی مقاومت قیلیش گه چقیرگن.
احمد مسعود مذکور پیام ده ایتیشیچه، هر کیم هر بیر شکل گه قیام قیله آلگن صورتده، ملی مقاومت جبههسی اوندن حمایت قیله‌دی. شونینگدیک اونینگ توییتر ده یازیشیچه، پنجشیر ده توریب و مقاومت گه دوام بیره‌دی.
ملی مقاومت جبهه قومندانی گه کوره، ملی مقاومت جبههسی قوراللی کوره‌شه آلگن کیشیلرنینگ یانیده توره‌دی و شونینگدیک مذکور جبهه مدنی ناراضلیک یولی آرقه‌لی طالبان گه قرشی کوره‌شه‌دیگن کیشیلرنینگ آوازی بوله‌دی.
بیزلرنینگ فیسبوک صحیفه‌میزگه باش اورینگ!
احمد مسعود مذکور پیام ده اورغولشیچه، اوتگن کون پنجشیر اوستیده‌گی طالبان هجومی «بیگانه حربیلر» اوتمیشدن طالبان نینگ یانیده حضور تاپگنی کورسته‌دی. اونگه کوره، افغانستان اهالیسی بوگون کوره‌دی که افغانستان نینگ واقعی دوست‌لری قیسی مملکتلر دیر.
کورینیشیچه، بو پیام ده اونینگ اشاره‌سی پاکستان گه ایکن که قطار گزاشلر اساسیده، مذکور مملکت پنجشیر ده ملی مقاومت جبههسی اوستیگه هوایی هجوم اویوشتیرگن.
احمد مسعود دنیا جماعه‌چیلیگی گه خطاب ایتیشیچه، «طالبان گه ناتوغری سیاسی فرصت ایجاد قیلگنلر، طالبان بو فرصت دن فایده‌لنیش بیلن هم سیاسی جرأت تاپگن و دنیا گه اوزگرگن‌لرینی کورستماق ایسته‌گن.» بیراق مسعود گه کوره، طالبان هیچ اوزگرمه‌گن، بلکیم اوتمیش گه نسبتن ظالم‌راق، افراطی‌راق و متعصب‌راق بولگن.
احمد مسعود پیامی نینگ بیر بولیمیده طالبان صفیده موجود بولگن کیشیلرگه خطاب ایتیشیچه، حاضرگی فرصتدن اوتمیش خطالرینی جبران قیلیش اوچون استعمال قیلیش‌لری کیره‌ک.
