ایکینچیلیک، سووغاریش و چارواچیلیک وزیرلیگی، بغلان ولایتیده «قاوون و تربوز» حاصلی ۱۵ فایز گه آشگنینی معلوم قیلدی.
اوشبو وزیرلیک، بوگون (۲۱ سرطان/۱۲ جولای، یکشنبه) بیر بیانیه ترقهتیب، بغلان ولایتیده قاوون و تربوز حاصلی اوتگن ییل گه قرهگنده سیزیلرلی درجهده آشگنینی بیلدیردی.
بیانیه گه کوره، بغلانده قاوون و تربوز بیش مینگ ۵۰ هکتار ییرده ایکیلگن و اوشبو ییرلردن ۱۵۹ مینگ ۷۵ متریک تُن حاصل آلینیشی کوتیلهدی.
ایکینچیلیک وزیرلیگی بیانیهسیده، اوتگن ییلده بغلانده قاوون و تربوز تورت مینگ ۶۵۸ هکتار ییرده ایکیلگن ایدی و اوندن جمعی ۱۳۸ مینگ ۱۲۴ متریک تُن حاصل آلینگندی. ایکی ییل حاصلی گه قرهگنده بو ییل دییرلی ۱۵ فایز آشگنیدن درک بیرهدی.
بغلانده قاوون و تربوز کوپراق بو ولایت مرکزی، دندغوری، دهنهغوری، مرکزی بغلان و دوشی تومنلریده ییتیشتیریلهدی.
