باشنده‌گان جوزجان بیست قطعۀ زمین را به گونۀ رایگان به معارف این ولایت اهدا کرده‌اند. مسئولان ریاست معارف ولایت جوزجان می‌گویند، شماری از باشنده‌گان شهر شبرغان و برخی از ولسوالی‌های این ولایت بیست قطعه زمین را که ۱۰ جریب می‌شود به گونۀ رایگان برای ساخت‌وساز مکتب در اختیار این ریاست قرار داده‌اند.
صالح‌محمد صالح، سرپرست ریاست معارف جوزجان می‌گوید، قرار است این ریاست سال آینده بر گسترۀ این ده جریب زمین ۲۰ بسازد. آقای صالح می‌افزاید که افزون بر این ریاست معارف ۳۹۵ جریب زمین را از نزد غاصبان زمین نیز گرفته است.
مسئولان ریاست معارف جوزجان از این اقدام باشنده‌گان این ولایت استقبال کرده و بر ادامۀ این‌گونه همکاری‌ها تأکید می‌کنند.
شماری از باشنده‌گان جوزجان می‌گویند که با ایجاد مکتب‌های تازه مشکلات دانش‌آموزان در عرصۀ نبود امکانات و مکتب تا اندازه‌یی حل خواهد شد.
آنان می‌گویند که کمک و همکاری در بخش معارف بر نهادینه‌شدن فرهنگ همدیگر پذیری در کشور اثرهای مثبتی می‌گذارد.
شماری از آموزگاران در جوزجان با استقبال از اهدای زمین برای معارف این ولایت می‌گویند که باشنده‌گان این ولایت با کمک به معارف فرزندان خود را از جهالت و بدبختی نجات می‌دهند.
