افغانستان ده عیاللردن کوپ قطاری اوچون هییت بیرمی یالغیز بیر مراسم ایمس؛ بلکیم عایلهلرنی بیرلشتیریش، مناسبتلرنی ینگیلش و نسللر دوامیده مملکت مدنیتیده ریشهسی بولگن عنعنهلرنی سقلهب قالیش امکانیتی دیر. هییت بیرمی ییتیب کیلیشی بیلن اویلر باشقه بیر تورلی سیمانی اوزیگه آلیب و عیاللر اشتیاق بیلن مهماندوستلیک، مهر-محبت و قدیمی عنعنهلرنی سقلش رمزی حسابلنهدیگن دسترخوانلرنی تیارلش اوچون سعیوحرکت قیلهدیلر.
بامیان، دایکندی، بلخ، تخار، ننگرهار، قندهار، فاریاب، بدخشان، بغلان، سمنگان، کاپیسا، پروان و جوزجان ولایتلریده ۲۷ عیال، سلاوطندار بیلن اوتکزگنلری صحبتلریده ایتیشلریچه، هییت بیرمیده هییت دسترخوانلری اوچون کیک و کلچه، گوشفیل، روغنجوشی و قتلمه کبی شیرینلیکلرنی تیارلهیدیلر.
مذکور عیاللرگه کوره، اقتصادی باسیملر بولگنی بیلن ینه هم اویده شیرینلیک پیشیریش و هییت دسترخوانلرینی تیارلش بیلن، محلی عنعنهلرنی سقلهب قالیش اوچون سعیوحرکت قیلهدیلر.
بلخ یشاوچیسی بولمیش ۳۳ یاشر عزیزهنینگ ایتیشیچه، هییت بیرمی کونلری و مهمانلرینی کوتیب آلیش اوچون تورلیخیل شیرینلیکلرنی تیارلهیدیلر. اونینگ کوپهیتیریشیچه: «اوزیمیز هییت دسترخوانی اوچون تورلیخیل شیرینلیکلرنی پیشیرهمیز. بادام، چاکلیت، نخود و سیمیان کبی باشقه نرسهلرنی بازاردن ساتیب آلهمیز.»
جوزجان یشاوچیسی بولمیش ۲۱ یاشر فریبانینگ ایتیشیچه: «اویده خجور، کیک و کلچه پیشیرهمیز. مهییز، نخود، بادام، پسته، چاکلیت و سیمیان کبی نرسهلرنی هم بازاردن آلهمیز.»
گوشفیل و شور کلچه، تخار ولایتیگه تیگیشلی هییت بیرمی شیرینلیکلریدن حسابلنهدی. اوشبو ولایت یشاوچیسی بولمیش لیدا میرزاییگه کوره، اویده مذکور شیرینلیکلرنی پیشیریش بیلن هییت بیرمی دسترخوانینی تیارلهیدی. «هییت دسترخوانی اوستیگه مهییز، نخود، بادام و پسته کبی نرسهلرنی قویهمیز؛ لیکن اویده پیشیریلهدیگن نرسهلرنینگ اورنی جودهیم اونملی دیر و اهالیدن کوپ قطاری اونی یخشی کورهدی.»
شونینگدیک ۲۵ یاشر مروهنینگ ایتیشیچه، اولر هییت بیرمی دسترخوانی اوستیگه اویده پیشگن نرسهلر، قوروق میوه و شیرینلیکلرنی تیرهدیلر. «هییت بیرمی اوچون اویده کیک و کلچه همده قوروق میوه، تازه میوه و شیرینلیکلرنی تیارلهیمیز.»
شوندهی بیرحالده، قیمتلر آشیشی و اقتصادی قیینچیلیکلر سبب، عیاللردن قطاری هییت بیرمینی اوتمیش کبی نشانله آلمهیدیلر.
پروان یشاوچیسی بولمیش ۲۳ یاشر زینبنینگ ایتیشیچه، اقتصادی قیینچیلیکلر سبب بو ییل رمضان هییتیده کوپینچه شیرینلیک تیارله آلمهگن. زینب گه کوره: «بو ییل اونچهلیک نرسه ساتیب آلالمهدیم، چونکه اقتصادیمیز اوتگن ییلگه قرهگنده ضعیفراق بولگن.»
ننگرهار یشاوچیسی مروه ساداتنینگ ایتیشیچه: «بوندن آلدینگی ییللرده اهالی کوپراق دوستلرینینگ کوریش اوچون کیتهر ایدیلر؛ بیراق حاضر بیر قطار نرسه تغییر قیلگن. باریب-کیلیش کمهیگن. شونینگدیک نرسهلر قیمتی هم کوپهیب و بو بیراز تاثیر قویگن.»
بو بیلن بیرگه، اجتماعی ایش بیلرمانلر و عیال حقوقی فعاللریدن قطارینینگ ایتیشلریچه، هییت عنعنهلرینی سقلش توغریسیده عیاللر اورنی کوپ مهم بولیب و انه شوو سبب، مذکور عنعنهلردن قطاری حاضرگچه جمعیتده سقلهنیب قالگن.
اجتماعی ایش بیلرمانلردن شعیب احمدیگه کوره: «هییت اوچون تیارگرلیکده عیاللر اورنی کوپ دیر، چونکه اویدهگی مسئولیتلردن کوپ قطاری اولرنینگ بوینیگه دیر. اوینی تازهلشدن تورلیخیل آوقت و ینگی کییم تیارلشگچه. عایلهلر آرهسیده عنعنهلرنی سقلش کوپراق عیاللر مسئولیتی دیر.»
عیال حقوقی فعالی ذکیه علیزادهنینگ ایتیشیچه: «کورهمیز که عیاللردن کوپ قطاری هییت اوچون تیارگرلیک آلهدیلر. اوشبو تیارگرلیک آلیش اوزی بیر عنعنه بولیب و عایله و جمعیتده عیاللرنینگ اورنی کوپ بولیب و تاثیرلی دیر.»
هییت بیرمی، افغانستان ده دینی و فرهنگی اینگ مهم مناسبتلردن بیری بولیب و هر ییلی بیر قطار شیرینلیکلرنی پیشیریش، قوروق میوه، ینگی کییم کییش و یقینداشلر همده دوستلر اوییگه باریب-کیلیش بیلن نشانلهیدیلر؛ بو مراسمنینگ سقلهنیب قالیشیده عیاللر اورنی مهم دیر.
