شمالی اتلانتیکده سونگی کونلرده دقتنی تارتگن واقعه یوز بیرماقده؛ امریکا روسیه بیراغی آستیگه اوتگن نفت تانکرینی حبس گه آلگنینی معلوم قیلدی.
ییتکرمهلرنینگ معلوماتیگه کوره، کیمه ایکی هفتهدن آرتیق وقت دوامیده کوزهتوو و تعقیب آستیده بولگن، کیین ایسه بیریلگن حکم اساسیده حبس گه آلینگن.
تانکر تعقیب جریانیده «ایز قالدیرمسلیک» که اورینگنده – نامینی المشتیرگن و روسیه بیراغینی کوترگن. ایلگری او «بیلا ۱» صفتیده تنیلگن بولسه، کیینچهلیک «مارینرا» دیب قیته رویخطدن اوتگنی ایتیلماقده.
معلوم بولیشیچه، حبس گه آلیش عملیاتی اتلانتیکده، ایسلند یقینیده عملگه آشیریلگن. امریکا رسمیلری بو حرکتنی ونزویلا نفت صادراتینی توسیش گه قرهتیلگن تحریم وباسیم کمپنیهسی بیلن باغلهیپتی.
رویترز یازیشیچه، عملیات وقتیده روسیه حربی کوچلری هم حدود اطرافیده بولگن، حتا تانکر «روسیه سوو آستی کیمهسی» تامانیدن سایه کبی کوزهتیب باریلگنی هم تیلگه آلینهدی. توقنشوو بولگنی حقیده معلومات یوق.
مسکو هم سکوت سقلهماقده. روسیه تامانی «مارینرا» بیلن علاقه اوزیلگنینی بیلدیرگن، ایریم سیاستچیلر ایسه بو حالتنی کیسکین قارهلب، «دینگیزدهگی آچیقچه اوغریلیک» دیگن.
اینگ مهمی بو حادثه بیتته تانکر تقدیری بیلن چیکلنمهیدی؛ بو نفت تانکری اتلانتیک یونهلیشدهگی کتته سیاسی-اقتصادی اویینلر، تحریملر و دینگیزدهگی نظارت کیمنینگ قولیده ایکنی اوچون «سیناو» گه اوخشهیپتی. کیینگی باشقیچده کیمه قییر گه آلیب کیتیلیشی، ایش قندهی رسمیلشتیریلیشی و مسکو قندهی جواب قدم تشلشی مهم مسئله بولیب توریبدی.
