تورکیه و اوزبیکستان دولت رهبرلری رجب طیب اردوغان و شوکت میرضیایف، بو ایکی مملکت اورتهسیدهگی دوستلیک و همکارلیکلرنی مستحکملش و کینگهیتیریش مقصدیده، تورلی ساحهلرده شرطنامه امضالهدیلر.
اوزبیکستان جمهورلیک ریاستی گه کوره، اوشبو شرطنامهلر، بوگون تورکیه پایتختی انقره شهریده، عالی درجهدهگی استراتیژیک همکارلیک کینگشینینگ تورتینچی ییغیلیشی یکونیده امضالنگن.
معلوماتلر اساسیده، بوندن تشقری کوپ قیرهلی شیریکلیکنینگ تورلی یونهلیشلرینی قمرهب آلوچی ایکی تامانلمه حجتلر توپلمی خصوصاً ساغلیقنی سقلش، تعلیم و حربی طبیات، اقتصادی و مالیهوی همکارلیک، کانچیلیک صناعتیده اوزارا همکارلیک، خلقارا ترانسپورت یولَکلرینی رواجلنتیریش، یدراو (هستهای) خوفسیزلیگی، جسماً (فیزیکی) حمایه قیلیش، مهاجرلر گه کمکلشیش و فقرالرنی اوز مملکتی گه قیتریش، اوزبیکستان یینگیل صناعتنی رواجلنتیریش آژانسی و تورکیه عالی تعلیم کینگشی اورتهسیده بیاننامه و باشقه ساحهلرده شرطنامه امضالنگن.
بو اوچرهشووده، اوزبیکستان و تورکیه ییتکچیلری کوپ قیرهلی شیریکلیکنی ینهده کینگهیتیریش گه قطعی اینتیلیشلرینی تصدیقلهگنلر. اوزبیکستان – تورکیه کینگ قمراولی استراتیژیک شیریکلیک مناسبتلرینی خصوصاً سیاسی، سودا-اقتصادی، مدنی و انسان پرورلیک ساحهلرده ینهده کینگهیتیریش مسئلهلری اطرافلیچه محاکمه قیلینگن.
شونینگدیک، اوزارا سودا حجمی، قوشمه کارخانهلر، مملکتلر اورتهسیدهگی هوایی قتناولرنینگ سانی آشیشی، منتظم روشده قوشمه مدنی تدبیرلر اوتکزیلیشی بحث گه آلینگن.
شو بیلن بیرگه، بو ایکی دولت ییتکچیلری خلقارا و منطقهوی کون ترتیبی گه دالضرب مسئلهلر یوزهسیدن هم فکر المشتیرگنلر.
اوزبیکستان جمهور باشلیغی شوکت میرضیایف بوگون (۹ دلو/ ۲۹ جنوری، پنجشنبه) انقره شهریده اوتکزیلیشی ریجهلشتیریلگن استراتیژیک همکارلیک کینگشینینگ تورتینچی ییغیلیشیده اشتراک ایتیش اوچون تورکیه بارگن.
