تورکیه «ییلدیریمخان» ایلک «قاره پیما» بالستیک راکتهسینی نمایش قیلدی.
تورکیه ییتکرمهلرینینگ معلوماتیگه کوره، استانبول شهریده اوتکزیلهیاتگن کورگزمهده بو مملکتنینگ اینگ ایلغار حربی تکنالوژیلریدن بیری «ییلدیریمخان» قاره پیما بالستیک راکتهسی ایلک بار نمایش ایتیلدی.
رسمی معلوماتلر گه کوره، بو بالستیک راکته ۶۰۰۰ کیلومترگچه بولگن مصافهنی اوریش گه قادر. متخصصلرنینگ فکریچه، تورکیه بو امکانیت بیلن قارهلر ارا صلاحیتینی آشیریشی ممکن.
تورکیه ملی مدافعه وزیری یشر گولر راکتهنینگ استراتیژیک اهمیتیگه توختهلیب، ضرورت توغیلگنده اوندن فایدهلنیشدن «تارتینمسلیگینی» بیلدیرگن.
معلوم قیلینیشیچه، راکته اروپا، آسیا و افریقا قارهلرینینگ کتته قسمینی قمرهب آلوچی کینگ استراتيژیک مصافه گه ایگه. شونینگدیک، اونینگ تأثیری روسیهنینگ کتته حدودلری، یقین شرق، شمالی افریقا همده چین و هندوستاننینگ غربی قسملرینی هم اوز ایچیگه آلهدی.
تخنیک جهتدن ییلدیریمخان راکتهسی فراصورت تیزلیککه ایگه بولیب، نشانگه یقینلشگنده تاووشدن ۲۵ برابر تیزراق حرکت قیلیشی ممکن. او موجود هوا مدافعه تیزیملرینی چیتلب اوتیش قابلیتیگه ایگه قورال صفتیده بهالنماقده. ینگی راکته تورکیهنینگ حربی تکنالوژیک مستقللیگینی مستحکملش و مدافعه ساحهسیدهگی کوچینی ینگی باسقیچگه آلیب چیقیشگه قرهتیلگنی قید ایتیلماقده.