تهران و واشنگتن مناسبتیده نسبی تینچلیک دوری یکونی و یقین شرقده ماجرالر قیته باشلنگنیدن سونگ، والاستریت ژورنال نشری امریکا عملدارلریگه اساسلنیب ایتیشیچه، امریکا جمهور باشلیغی دونالد ترامپ، تهران گه باسیم کیلتیریش و واشنگتن ایستکلرینی قبول قیلیش اوچون ایران گه قرشی ینگی هجوم اویوشتیریش بویروغینی بیرگن.
سیبیاس ییتکرمهسی هم، امریکا ایراننینگ انرژی آست قوریلمهلریگه قتیق ضربه بیریشگه تیارگرلیک کورهیاتگنینی و اوشبو احتمالی حربی عملیاتده اسرائیلنینگ هم اشتراک ایتیشینی آچیقلهگن.
شو بیلن بیرگه، دونالد ترامپ ینگی بیاناتیده، واشنگتن ایران گه «قتیق» ضربه بیریشینی ایتگن. او ینه بیر بار ایراننینگ حربی قوتی جدی ضربه کورگنینی بیلدیریب و تهران بیلن صلح کیلیشوو امکانی بارلیگینی تأکیدلهگن.
او شوندهی دیگن: «اولر دایم مذاکره قیلیشنی خواهلهیدی، بیراق کوپ حاللرده اوز سوزی و وعدهلریگه عمل قیلمهیدی. اولر ۱۰ دقیقهده حل ایتیلیشی ممکن بولگن مسئله گه ۷ ساعت وقت صرفلهیدی. امریکا ایران قرشیلیک کورسهتیش امکانیتینی یوقاتگنیگه قدر اونی جوده کوچلی بمباردمان قیلهدی. شونگه قرهمی، ایران بیلن کیلیشوو گه ایریشیش امکانیتی حلی هم بار. ویتکاف، کوشنر، جی دی ونس و روبیو ایران بیلن باغلیق مذاکرهلرنی ایلگری سورماقده.»
ترامپ شونینگدیک، امریکانینگ ایران بیلن قرمه قرشیلیکدهگی موفقیتی حماسنی قورالسیزلنتیریش بوییچه کیلیشوو گه ایریشیشده بیواسطه مهم رول اوینهگنینی تأکیدلهگن.
امریکا تشقی ایشلر وزیری مارکو روبیو هم، تهران ایندی مذاکرهلر گه هیچ قندهی عاقبتلرسیز قیته آلمسلیگینی بیلدیرگن. او شونینگدیک، ترامپ دولتی ایران مسئلهسیده اولگیسیدن فرقلی سیاست یوریتهیاتگنینی معلوم قیلگن.
تهرانده تسنیم نشری ایران اسلامی جمهوریتی عملدارلریگه اساسلنیب ایتیشیچه، بو مملکت هر قندهی ینگی هجومگه قتیق جواب قیتریب امریکا و اسرائیلنینگ هر قندهی احتمالی هجوملریگه تولیق تیارگرلیک کوریلگن.
ایران ملی خوفسیزلیک کینگشی کاتبی محمدباقر ذوالقدر، امریکانینگ هجومی و باسیملری دوام ایتیشی هرمز بوغوزی یاپیلیشیگه آلیب کیلیشی حقیده آگاهلنتیرگن.
او شوندهی دیب یازگن: «امریکا رژیمینینگ دینگیز محاصرهسی و هجوملری دوام ایتیشی نهفقط هرمز بوغوزیدهگی وضعیتنی ینهده کیسکینلشتیرهدی، بلکی باشقه استراتیژیک بوغوزلرنینگ هم یاپیلیشیگه آلیب کیلیشی ممکن. بونینگ عاقبتلری اوچون ایسه جهان اقتصادیاتی، انرژی بازاری و امریکا سیلاوچلری تاوان تولهیدی.»
شو بیلن بیرگه، کویت اردوسی بو مملکت هوا مدافعه تیزیملری ینه بیر بار ایران درانلرینی یوق قیلیش اوچون ایشگه توشیریلگنینی اعلان قیلگن.
شونینگدیک، بریتانیانینگ دینگیز سوداسی عملیاتی تشکیلاتی عمان سوولریده ایکیته دینگیز حادثهسی صادر بولگنینی معلوم قیلگن بیر پیتده، ایران تشقی ایشلر وزیرلیگی، بو مملکت تشقی ایشلر وزیری سیدعباس عراقچی بریتانیا تشقی ایشلر وزیری اد میلیبند بیلن تلفون آرقهلی ملاقات قیلگنینی بیلدیرگن. عراقچی صحبت دوامیده لندننینگ ایران گه قرشی احتمالی هر قندهی هجومده اشتراک ایتیشینی مطلقا قبول قیلیب بولمهیدیگن حالت دیب بهالهگن.
