سونگی کونلر ایران وضعیتی، اهالینینگ کینگ کولملی ناراضلیگی و بازاردهگی برقرارسیزلیکنی بیلدیرهدی. حکومت امنیتنینگ کنترول بولیشیگه تاکید قیلگنی بیرحالده، اعتراضچیلر سرکلرده ناراضلیک نمایشلرگه دوام بیرماقده.
ییتینچی جدی، تهران ده ناراضلیک نمایشلرنینگ باشلنگنیدن اون کون اوتگن. ییتکرمهلر و بشری حقوق نهادلرینینگ گزارشی اساسیده، حاضرگچه ایران یشاوچیلریدن قطاری اولیب و یوزدن آرتیق کیشی قولگه آلینگن.
ایران شهرلریدن کوپ قطارینینگ سرکلری مدنی ناراضلیکلر محیطیگه اَیلنگن. اوشبو ناراضلیک نمایشلر باشلنگنیدن اون کون اوتیب و خوفسیزلیک کوچلرینینگ جدی یاندهشوولری بیلن، ینه هم بو وضعیت تورلی شهرلرگه کوچهیگن. نارسمی گزارشلر اساسیده، خوفسیزلیک کوچلرینینگ آتیشمهسی نتیجهسیده، حاضرگچه قریب ۳۰ کیشی اولیب و بیر قطار کیشی یرهلنگن همده بو واقعه، خلقارا کینگ کولملی عکسالعمللر بیلن روپهره بولگن.
ایران جمهور باشلیغی مسعود پزشکیان، یشاوچیلر سوزلری ایشیتیلیشی و صحبت قیلینیشیگه تاکید قیلگنی بیرحالده، ایران رهبری و خوفسیزلیک نهادلری ناراضلیک نمایشلرگه نسبت قاطعیت بیلن یاندهشیلیشینی طلب قیلماقده.
ایران رهبری علی خامنهای، ناراضلیکلر دوامیگه عکسالعمل بیلدیریب و ایتیشیچه، ترتیبسیزلیککه سبب بولگنلرنینگ توختهتیلیشی کیرهک.
شوندهی بیرحالده خلقارا سطحده، امریکا و اروپا بیرلشمهسی اَیری عکسالعمللر آرقهلی اعتراض قیلووچیلر بیلن ایران حکومتینینگ زورهوانلیک یاندهشووینی قارهلب و سیاسی قولگه آلینگنلرنینگ آزاد بولیشینی ایستهگنلر.
امریکا جمهور باشلیغی دونالد ترامپ، خبرچیلرنینگ سوراقلریگه جواب اولهراق آگاهلنتیریشیچه، اعتراضچیلرنینگ اوققه توتیلیشی دوام قیلگنی صورتده، واشنگتننینگ عملی اقدام قیلیشی ممکن. شونینگدیک اروپا بیرلشمهسی، ایران ده بشری حقوق وضعیتیدن خواطر بیلدیریب، حبسگه آلینگنلرنینگ آزاد بولیشینی ایستهگن.
ایران اوتمیشی اهالینینگ ناراضلیکلرینی باستیریش و سیاسی تنقیدچیلرگه نسبت خوفسیزلیککه اساسلنگن یاندهشوو بیلن باغلیق دیر. بو مملکت رسمیلری ناراضلیک حرکتلریدن کوپ قطارینینگ اساساً خوفسیزلیک یاندهشووی آرقهلی بهالهیدی. شوندهی بیرحالده، ایران رهبرلرینینگ اورغولشیچه، ناراضلیک نمایشلر چیتایللیک دشمنلر تاثیری آستیده شکللنگن؛ لیکن بو ادعالر نیچه مرته اعتراضچیلر و مستقل کوزهتووچیلر آرقهلی رد بولگن.
خلقارا سیاست بوییچه تدقیقات استادی مطیعالله آرینپورنینگ ایتیشیچه، اوشبو ناراضلیکلر اصلی عاملی ایچکی مسئلهلر دیر. «شاهد بولگنیمیز ناراضلیکلرنینگ سببی، اقتصادی و سیاسی قیینچیلیکلر دیر. ایران ده تورم انقراضی قریب ۴۸.۶ فایز گه ییتیشگن که بو رقم کوپ یوقاری دیر. اوتگن اون ییلده ریال ارزشی قریب ۹۰ فایز کمهیگن و بو اورته و قویی طبقهگه آغیر باسیم کیلتیرگن. بو بحران خوفسیزلیک یاندهشوو بیلن قولهی بیر شکلده حل بولمهیدی.»
گرچند ایران ده ناراضلیک نمایشلرنی توختهتیش ینگی بیر موضوع ایمس، بیراق منطقهای اوزگریشلر و تشقی باسیملر کوپهیشی، ایران رهبرلری خواطرینی کوپهیتیرگن.
