هندوستان سودا و صناعت اتاقی، افغانستانده دارو ایشلب چیقریش، لوژستیک، ترانسپورت و باشقه ساحهلرده همکارلیک قیلیش وعدهسینی بیرگن.
افغانستان سودا و سرمایه کیریتیش اتاقی بوگون (۳ سرطان/۲۴ جون، چهارشنبه) ایکس صحیفهسیده بیر بیانیه ترقهتیب، اوشبو اداره باشلیغی سیدکریم هاشمی ینگی دهلیده هندوستان سودا و صناعت اعضالری همده رهبریتی بیلن اوچرهشیب، کابل و ینگی دهلی اورتهسیدهگی اقتصادی علاقهلر مستحکملنیش مسئلهلری حقیده بحث ایتگنینی معلوم قیلگن.
بیانیه گه کوره، اوشبو اوچرهشووده ایکی تامانلمه سودا آلیش-بیریش کینگهیتیریلیشی، قوشمه سرمایه کیریتیشلرنی رواجلنتیریش، تکنالوژی، صناعتی همکارلیکلر همده افغانستان و هندوستان خصوصی بولیملری اورتهسیدهگی سودا آلیش-بیریشنی کوچهیتیریش مسئلهلری بحث گه آلینگن.
افغانستان سودا و سرمایه کیریتیش اتاقی باشلیغی، افغانستانده ایکینچیلیک، کانلر، قالین، قیمتبها تاشلر، زعفران، قوروق میوه و انشاآت مادهلری بولیمیده سرمایه کیریتیش فرصتلری بارلیگیگه تأکیدلب و هندوستان تجارلریدن بوندهی فرصتلرنی باریب تیکشیریشلرینی سورهگن.
شو بیلن بیرگه، هندوستان سودا و صناعت اتاقی افغانستانده دارو ایشلب چیقریش، لوژستیک، ترانسپورت، صناعتی تولیدلر و باشقه ساحهلرده همکارلیک قیلیش وعدهسینی بیریب و یقینده ۲۰ کیشیلیک سودا هیئتی افغانستان گه باریشیدن خبر بیرگن.
