مرکزی بانک ایشلاوچیسی یما سیاووش نینگ موتریگه بمب جایلشتیریلگنی خصوصده مرکزی بانک قانون‌نی ایاق آستی قیلگنی و امنیتی نهادلر نینگ ایشی آهسته-سیکن دوام ایتیشی توغری سیده کوپینچه ناراضلیک‌لر اورته‌گه چیقنیدن کیین، جمهور رئیس بیرینچی اورین باسری امرالله صالح، فیسبوک صحیفه‌سیدن بیر اعلامیه ترقه‌تیب، یما سیاووش نینگ قضیه‌سی خصوصده بعضی معلومات‌لرگه قول تاپگنیدن خبر بیرگن.
گرچند جناب صالح، معلومات نیمه‌لردن عبارت بولگنی خصوصده هیچ قندی فکر بیلدیرمه‌گن، بیراق واقعه خصوصده‌گی معلومات‌لرنی کینچه‌لیک خلق بیلن شریک قیلیشی نی بیلدیرگن.
جناب صالح نینگ تأکید ایتیشیچه، افغانستان رسانه‌لری نینگ ” ویدیو نشر بولسین” دیگن ایستگی نی عملگه آشیره آلمسلیگی نی بیلدیریب، لیکن انده-سانده اوشبو خصوصده معلومات بیره‌دی.
جمهور رئیس بیرینچی اورین باسری نینگ ایتیشیچه: ” قولگه آلگن بوتون ریجه‌لری یعنی تروریستی گروه‌لر نینگ فعالیتیدن خلق نی آگاه‌لنتیریش و تکنالوژی بولیمی عملگه آشیریلیب بارماقده دیر”.
نظامی و خوفسیزلیک ایش بیلرمان‌لر نینگ ایتیش‌لریچه، ترور و پارتلش واقعه‌لرنی تیکشیریش قضیه‌سی کوپینچه زمان آله‌دی.
نظامی ایش بیلرمان و مملکت ایچکی ایشلر وزیرلیگی نینگ سابق اورین باسری میرزا محمد یارمند گه کوره، مرکزی بانک ایشلاوچی‌لری نینگ موتریگه جایلشتیریلگن بمب قضیه‌سی جوده قیین قضیه بولگن و انه شوباعث قضیه‌نی تیکشیریش کوپینچه زمان آله‌دی.
انه‌شوحالده یما سیاووش نینگ آته‌سی محمد داوود سیاووش توییتر صحیفه سیدن یازیشیچه: “مرکزی بانک ده‌گی اژدرلر یما سیاووش نی یوتدی” یما سیاووش نینگ آته‌سیگه کوره، قاتل‌لرنی تاپیش اوچون بیریلگن مدتدن ۱۵ کون قالگن.
یما سیاووش نینگ عایله‌سی، او اولگنیدن کیین بیر اعلامیه ترقتیب، اگرده یما سیاووش نینگ قضیه‌سی تیکشیریلمه‌گن حالده، قضیه تیکشیریلیشی اوچون دنیا محکمه‌سیگه باش اوریش‌لرینی بیلدیرگن ایدی.
بوندن آلدین نماینده‌لر کینگش اعضالری تامانیدن یما سیاووش نینگ قضیه‌نی تیکشیریش اوچون تنلنگن هیأتلر گه، قضیه‌نی تیکشیریشدن قول تارتیش‌لری خصوصده آگان‌لنتیریلگن ایدیلر.
مرکزی بانک ایشلاوچیسی یما سیاووش و ۲ یولداشی نینگ اولگنیدن ۲۴ کون اوتیشی بیلن هم حاضر گچه بمب موترگه قندی جایلشتیریلگنی، مرکزی بانک نینگ امنیتی کمره‌لریگه تیگیشلی ویدیولر و موتر تعقیب ایتوچی سیستم و باشقه لازمی معلوماتلر، امنیتی و کشفی نهادلر بیلن شریک ایتیلمه‌گن.
اوتگن کونی مرکزی بانک بیر اعلامیه ترقه‌تیب، بوتون لازمی معلومات‌لرنی امنیتی و کشفی نهادلرگه تاپشیرگنیدن خبر بیرگن ایدی.
