تخار ده آلتین کانی نینگ ناقانونی و ستندردسیز شکلده قازیب چیقریلیشی، کوپینچه پیت کانچیلر نینگ اولیمی و یره‌لنیشی گه سبب بوله‌دی که ینگی‌لیکده، اوشبو ولایت‌ده آلتین کانی نینگ چپه بولیشی عاقبتیده، اوچ کانچی هلاک بولگن.
مذکور واقعه چهارشنبه کونی ۱۹-میزان، تخار ولایتی خواجه‌غار تومنی نینگ «هموارسای» منطقه‌سیده، ۶۰ متر چقورلیگی بولگن آلتین بیر کان‌ده کانچیلر نینگ ایشلش چاغیده یوز بیرگن.
کانچی و اولگن کانچیلر نینگ هم‌کارلریدن بیری محبوب‌الله گه کوره، اولر ایش‌سیزلیک و قشاق‌لیک سبب، مذکور کان‌ده ایشله‌یدیلر و باشقه بیر تامان‌دن، اولیم خطری بیلن روپه‌ره‌لر. اونینگ ایتیشیچه: «قریب ۵۶-۶۰ متر ییر نی قازه‌میز و اوندن کیین، جغل چیقه‌دی، تونل توزه‌ته‌میز و کیین او ییرده ۸-۱۲ کیشی ایشله‌یمیز. حیات خره‌جتی نی تامین‌لش اوچون مجبورمیز. بعضی کون‌لر ۱۰۰-۳۰۰ افغانی تاپه‌میز و بعضی کون‌لر ایسه بوش قول بیلن قیته‌میز.»
بیزلرنینگ «ایکس» ترماغی ده هم تعقیب قیلینگ!
شونینگدیک تخار ده آلتین کان چپه بولگنی عاقبتیده قربان بولگنلردن بیری نینگ یقین‌داشی حمید‌الله گه کوره، کانچیلر نینگ حیات وضعیتی یامان دیر و حکومت اولر گه توجه قیلیشی کیره‌ک. اونینگ ایتیشیچه: «نیازمند عایله‌لر گه یاردم بیریلیشی نی ایسته‌میز؛ چونکه ایش‌سیزلر و وضعیت‌لری یامان دیر؛ بو خطر بیلن ییر آستیده ایشله‌ش گه مجبور بولمه‌سلیکلری اوچون اولر گه ایش زمینه‌سیز یره‌تیلیشی کیره‌ک.»
شونده‌ی بیرحالده، تخار کان‌لر و پترولیم رئیسی عبدالناصر حقانی، هموارسای منطقه‌سیده یشاوچیلر آرقه‌‌لی کان‌لر نینگ ستندردسیز و ناقانونی شکلده قازیب چیقریلیشی نی تصدیق‌لب سلام‌وطندار گه ایتیشیچه: «بو ایش نینگ انجام بیرمه‌سلیک‌لری نیچه مرته ایتگن‌میز؛ بیراق قشاق‌لیک شدتی کوپلیگی سبب، اهالی اوزی نی اوشه ایش گه مصروف قیله‌دی و اوندن هیچ بیر درآمد هم قولگه کیلتیرمه‌یدی.»
عین حالده، کان‌لر و پترولیم وزیرلیگی مسئوللری نینگ ایتیشلریچه، کان‌لر نینگ ناقانونی و ستندردسیز شکلده قازیب چیقریلیشی آلدی آلینیشی اوچون سعی و حرکت قیله‌دیلر؛ چونکه کان‌لر نینگ ناقانونی و ستندردسیز شکلده قازیب چیقریلیشی، کانچیلر اولیمی نینگ اصلی سبب‌لریدن حساب‌لنه‌دی.
مذکور وزیرلیک سوزلاوچیسی همایون افغان نینگ ایتیشیچه: «بوندن آلدین کانلردن کوپینچه‌سی اوز باشیمچه‌لیک شکلده قازیب چیقریله‌ر ایدی و بو اوزی کوپینچه اولیم گه سبب بوله‌دی. افغانستان نینگ برچه کان‌لری قانونی و ستندرد شکلده قازیب چیقریلیشی اوچون سعی و حرکت قیله‌میز و بو ایش بیراز کنترول هم بولگن.»
بیزلرنینگ فیسبوک صحیفه‌میزگه باش اورینگ!
گرچند کان‌لر و پترولیم وزیرلیگی مسئوللری، بیتیم امضالنگن شرکت‌لر بیلن کان‌لر نینگ قازیب چیقریلیشی بیتیمی‌ده، کانچیلر نینگ جانی مصونیتی قنچه نظر گه آلینگنی حقیده هیچ نرسه دیمه‌یدیلر؛ بیراق بو مسئله خصوصیده جدی توجه‌لری بولگنی گه تاکید قیله‌دیلر.
بوندن آلدن هم، تخار کان‌لر ریاستی مسئولری، مذکور ولایت‌ده بیش آی ایچیده آلتین کان‌لری چپه بولیشی عاقبتیده ۳۰ کانچی نینگ اولگنی نی ایتگن ایدیلر.
تخار محلی مسئوللری نینگ آماری اساسیده، ۱۴۰۱-ییل‌ده مذکور ولایت‌ده آلتین کان‌لری نینگ ستندردسیز شکلده قازیب چیقریلیشی عاقبتیده، ۱۰۰ کانچی هلاک بولگن ایدی.
