افغانستان ده‌گی خاتین قیزلر قریب ایکی ییل دن بویان تورلی چیکلاولر اینیقسه تعلیم، تحصیل و ایش گه باریش حقی دن محروم بولگنلر. وظیفه‌لرینی قولدن بیرگن بیر قطار عیاللر نینگ ایتیشلریچه، ایریم قیینچیلیک‌لر سبب هییت بیرمینی یخشی‌لیک بیلن اوتکزه آلمه‌گنلر. اولر اسلام امیرلیگی دن، هییت بیرمی مناسبتی بیلن خاتین قیزلر گه یره‌تیلگن چیکلاولرنی بیکار قیلیشینی سوره‌یدیلر.
میدیالر دن بیری و خارجی نهادلر ایشلاوچیسی بولمیش سحر رحیمی نینگ ایتیشیچه، ایش‌سیزلیک و اقتصادی قیینچیلیک باعث، هییت بیرمی اوچون تیارگرلیک کوره آلمه‌گن. «سابق هییت بیرمینی خوش‌لیک بیلن کوتیب آلر ایدیک؛ بیراق بو ییل بیز اوچون هییت یوق. نه کییم_کیچیک قیلگن‌میز، نه قربان‌لیک آلگن‌میز و نه هم هییت دسترخوانی اوچون نرسه آلگن‌میز. چونکه ایش دن محروم بولگن‌میز.»
اولکه یشاوچیلریدن باشقه بیری ثریا روحی، خاتین قیزلر گه یره‌تیلگن چیکلاولر دن کیین ایش‌سیز بولگن ایتیشیچه، ایش گه قیتیب و جمعیت ده حضور تاپگندن کیین هییت کبی مناسبتی کون‌لردن نشانلشی ممکن. او نینگ کوپه‌یتیریشیچه: «جمعیت ده خاتین قیزلر گه حق بیرسین‌لر. عیاللر جمعیت ده قیته دن فعال بولیش اوچون اولر گه ایش و تعلیم زمینه‌سینی یره‌تسین‌لر.»
بیزلرنینگ فیسبوک صحیفه‌میزگه باش اورینگ!
باشقه تاماندن، حاضر هم ایش بیلن مصروف عیاللر گه کوره، خاتین قیزلر گه یره‌تیلگن چیکلاولر و حاضرگی وضعیت باعث هییت کون‌لرینی امیدسیزلیک و ناخورسندلیک بیلن اوتکزماقده‌لر. اولر، اسلام امیرلیگی دن ایرکک‌لر و عیاللر حقوقی تینگ‌لیگی، تعلیم، ساغلیک، تکنالوژی، اقتصادیات و فرهنگ ساحه‌لریده سعی‌وحرکت قیلیشینی طلب قیله‌دیلر.
خصوصی نهادلردن بیری نینگ ایشلاوچیسی سوریا یوسفی، اسلام امیرلیگی دن هییت بیرمی مناسبتی بیلن، قیز اوقووچیلر یوزی گه مکتب‌لر و بیلیم یورت‌لر ایشیک‌لرینی آچیشنی ایسته‌یدی. او نینگ کوپه‌یتیریشیچه: «اسلام امیرلیگی هییت بیرمی مناسبتی بیلن قیز اوقووچیلر یوزی گه بیلیم یورت‌لر، مکتب‌لر و دم‌آلیش ایشیک‌لرینی آچیش گه امیدوار میز.»
ساغلیک مرکزلردن بیری نینگ شفاکاری نجم‌السما شفاجو گه کوره، ایریم ساحه‌لر اینیقسه نسایی_ولادی بولیمیده عیاللر نینگ حضوری جدی نیاز دیر. او حاضرگی حکومت دن، جمعیت ده خاتین قیزلر نینگ حضوری گه زمینه یره‌تیشنی طلب قیله‌دی. «جمعیت ده هر ساحه ده خاتین قیزلر نینگ حضوری مهم دیر. خاتین‌لر بولمسه مؤفقیت بولمس. نسایی_ولادی بولیمیده عیاللر حضوری مهم دیر. بو بولیم ده‌گی عیاللر هردایم یشاوچیلر خذمتی ده دیر.»
عین‌حالده، عیال حقوقی فعاللری نینگ ایتیشلریچه، تورلی ساحه‌لرده عیاللر نینگ حضوری و رولی مهم دیر، اولر نینگ حضورسیزلیگی بیلن هیچ بیر مملکت رواجنلمه‌یدی.
عیال حقوقی فعالی پروانه بارکزی نینگ ایتیشیچه: «کوپ سانده عیاللر شفاکارلیک، انجنیرلیک، اوقیتووچیلیک و باشقه ساحه‌لرده کوپ زحمت چیککنلر. عیاللر قوللب_قوتلنیشی کیره‌ک.»
عیال حقوقی فعالی دیوه پتنگ گه کوره، خاتین قیزلر نینگ ساغلیک، خوفسیزلیک و تعلیم و تربیه ساحه‌لریده حضورلری مهم دیر. او نینگ ایتیشیچه: «جمعیت ده خاتین قیزلر گه کوپراق حصه بیریلگن مملکت‌لر، کوپراق رواجلنگن. حکومت مملکت آبادانچیلیگی اوچون ایشله‌یدیگن عیاللر گه زمینه یره‌تیشی کیره‌ک.»
بیزلرنینگ توییترده هم تعقیب قیلینگ!
باشقه تاماندن، «عیاللر اوچون عیاللر» مؤسسه‌سی باشلیغی فریدالدین نوری، اسلام امیرلیگی دن هییت کونی مناسبتی بیلن خاتین قیزلر گه یره‌تیلگن چیکلاولر نی بیکار قیلیب و اولر گه ایش زمینه‌سینی یره‌تیشنی ایسته‌یدی. «اسلام امیرلیگی دن یشاوچیلر و دولت ارا بوش‌لیککه چیک قوییش اوچون خاتین قیزلر نینگ تعلیم و ایشی گه یره‌تیلگن چیکلاولرنی بیکار قیلیشینی ایسته‌یمیز. مملکت نینگ ۵۰ فایز اهالیسی نی عیاللر تشکیل بیره‌دی، کیله‌جک اوچون اولر نینگ رولی مهم دیر. بو توغریده زمینه یره‌تیش اسلام امیرلیگی نینگ بورچی دیر.»
بونگه علاوه، اسلام امیرلیگی امر معروف و نهی منکر وزیرلیگی سوزلاوچیسی عاکف مهاجر نینگ سلام‌وطندار گه ایتیشیچه، عیاللر حقوقینی ایاغ آستی قیلیش گه هیچ کیم نینگ حقی یوق دیر. او هییت بیرمی مناسبتی بیلن بولگن قوتلاو پیامی ده عیاللر گه ایتیشیچه: «پیامیم یشاوچیلر اینیقسه عیاللر گه بو دیر که، حقوق‌لری ایاغ آستی بولگنلر، میراثی بیریلمه‌گنلر یاکه زوردن تورموش گه چیقریلگن‌لر، امر معروف و نهی منکر وزیرلیگی گه مراجعت قیلیشی ممکن. اولر نینگ حقوقینی ایاغ آستی قیلیش گه هیچ کیم نینگ حقی یوق دیر.»
عین‌حالده، اسلام امیرلیگی لیدری هبت‌الله آخوندزاده قربان هییت بیرمی مناسبتی بیلن بولگن پیامیده، هییت بیرمینی قوتلوغ‌لشگه قوشیمچه، اسلام امیرلیگی حاکمیتیدن کیین، عیاللر نینگ برچه «شرعی حقوقی» تأمینلنگن و برچه اداره‌لر اولر نینگ حقوقینی تأمینلش گه مکلف بولگنینی ایتگن.
