ایران دن افغانستان‌لیک قاچقینلر نینگ قیتیشی و جبری شکلده چیقریلیشی کوپه‌یگنی بیلن بیرگه، خلق‌ارا قاچقینلر تشکیلاتی بیر گزارش آرقه‌لی ایتیشیچه، اوتگن بیر آیده ایران دن ۲۳۰ مینگ‌دن آرتیق کیشی افغانستان گه قیتگن.
اوشبو تشکیلات نینگ معلوماتی اساسیده، قاچقینلردن ۵۰ فایزی داوطلب‌لیک و باشقه ۴۳ فایزی ایسه مذکور مملکت پولیسی آرقه‌لی جبری شکلده قولگه آلینیب و افغانستان گه قیتریلگن.
ینگی‌لیکده ایران دن مملکت گه قیتگن افغانستان‌لیکلردن قطاری نینگ ایتیشلریچه، مذکور مملکت پولیسی و یشاوچیلری قاچقینلر بیلن یامان یانده‌شیب و اولرنینگ ایران دن چیقرگنلر.
بیزلرنینگ فیسبوک صحیفه‌میزگه باش اورینگ!
تورت کون آلدین جبری شکلده ایران دن چیقریلیب و حاضر هرات ده حیات کیچیره‌دیگن نصرت‌الله نینگ ایتیشیچه، ایران خوفسیزلیک کوچلری اونینگ ایش ییریدن قولگه آلیب و کیین ایسه چیقرگن. «بیر دفعه مامورلر شرکت گه کیردیلر. برچه‌میز نی قولگه آلدیلر. جوده‌یم یامان یانده‌شدیلر. کلتک‌له‌دیلر. اولکه‌ده ایش یوق، بولگنی‌ده نیگه اهالی مملکتی گه باره‌یلیک. او ییرده بیزلر گه هر نرسه دیب و کلتک‌له‌یدیلر.»
سکیز ییل عایله‌سی بیلن ایران ده حیات کیچیریب و ینگی‌لیکده ایران دن قیتگن ذبیح‌الله محمدی نینگ ایتیشیچه، ایش‌سیزلیک و اقتصادی قیینچیلیکلر سبب ایران گه کیتگن ایکن؛ بیراق ایران دن قیتگنی‌دن کیین، قیته ایش‌سیزلیک و کمبغل‌لیک بیلن روپه‌ره بولگن.
حاضر نیمروز ده حیات کیچیره‌دیگن محمدی نینگ کوپه‌یتیریشیچه، باله‌لری هم الکترونیکی کیم‌لیگی بولمه‌گنی سبب، مکتب باره آلمه‌یدی. اونگه کوره: «تعلیم بولیمی‌ده قیغو بیلن زمینه یره‌تیلمه‌گن. قیغو بیلن باله‌لریمیز مکتب باره آلمه‌یدی. ساغلیق بولیمی بیراز یخشی؛ بیراق ینه هم اونچه‌لیک زمینه یره‌تیلمه‌گن. باله‌لر و کسل‌لر گه کوپ کوشش قیلمه‌یدیلر.»
ینگی‌لیکده ایران دن قیتگن قاچقینلردن باشقه بیری حبیب‌الله نینگ ایتیشیچه، اوزی ایش ییریدن قولگه آلینیب و افغانستان گه قیتریلگن؛ بیراق عایله‌سی ایران ده قالگن.
حاضر هرات ده حیات کیچیره‌دیگن حبیب‌الله نینگ کوپه‌یتیریشیچه: «عایله‌م او ییرده قالگن و اوزیم بو ییرگه مین. عایله سرپرستی ایدیم. حاضر بیلمه‌یمن که نیمه قیله‌ی. حاضر ایران وضعیتی کوپ یامان و کوپ اذیت قیله‌دیلر. قیتیش هم درد گه یره‌مه‌یدی.»
شونینگدیک سونگی کونلر ایران دن چیقریلگن یشاوچیلردن باشقه بیری عبدالکریم نینگ ایتیشیچه، یامان اقتصادی وضعیت اوچون مذکور مملکت گه بارگن ایکن؛ بیراق مملکت گه قیتیش بیلن اوتگن وضعیتی گه روپه‌ره بولگن.
بیزلرنینگ «ایکس» ترماغی ده هم تعقیب قیلینگ!
اونینگ ادعا قیلیشیچه، کمپلر و یوللرده ایران خوفسیزلیک مامورلری اولردن پول هم آلگن. «بیزلردن پول آله‌ر ایدیلر. ظلم کوپ ایدی. ایکی مرته چیگره‌‌گچه باردیک، بیزلرنی قیته کمپ گه قیتردیلر. اوتگن کون هرات گه ییتیشدیک.»
ایران دولتی ییتکرمه‌لری نینگ معلوماتی اساسیده، افغانستان‌لیکلر ایران ده‌گی تشقی یشاوچیلردن ۹۰ فایزینی تشکیل بیره‌دی که اولردن کوپینچه‌سی، اعتبارلی حجتلری بولمسدن بو مملکت گه بارگنلر.
مذکور گزارش‌ده قاچقینلر وزیرلیگی بیلن ایران ده افغانستان ایلچیخانه‌سی فکرینی آلیش ایسته‌دیک؛ بیراق کیت‌مه-کیت قونقیراق بیلن موفق بولمه‌دیک.
