بوگون کابل غربی‌ده اویوشتیریلگن اوچ پارتلش، ملی و خلق‌ارا عکس‌العمل‌لرگه روپه‌رو بولگن. افغانستانده بیرلشگن ملت‌لر تشکیلاتی نینگ اورین باسرلیک هیأت دفتری یا یوناما، بوگون بیر خبرنامه ترقه‌تیب، کابل غربی‌ده کیتمه-کیت اویوشتیریلگن پارتلش‌لرگه واکنش کورسه‌تیب و اونی محکوم قیلگن. مذکور نهاد اوشبو واقعه عامل‌لری عدالت گه تارتیلیشینی سوره‌گن.
یوناما نینگ یازیشیچه: «یوناما بوگون کابل‌ده ایکی مکتب‌ده اویوشتیریلگن دهشتلی هجوم‌نی محکوم قیله‌دی. واقعه عاملی و باله‌لرنی نشانگه آله‌دیگنلر، عدالت گه تارتیلیشی کیره‌ک. بیرلشگن ملت‌لر تشکیلاتی نینگ افغانستان اوچون مخصوص نماینده‌سی دیبرا لاینز، قربانی‌لر نینگ عایله اعضالری بیلن قیغوداشلیک بیلدیریب و یره‌لنگنلر تیزلیک بیلن ساغه‌یشلرینی آرزو قیله‌دی.»
بیرلشگن ملت‌لر تشکیلاتی نینگ افغانستان اوچون انسان پرورلیک ایشلرنی هماهنگ قیلووچی رامیز الکبروف، بوگونگی دهشتلی حادثه‌لرنی قتیق شکلده محکوم قیلگن. اونینگ ایتیشیچه، «مکتب‌لر یا اطرافیده‌گی زوروانلیک کیچیریلمس جنایت دیر.»
بیزلرنینگ فیسبوک صحیفه‌میزگه باش اورینگ!
او ترقه‌تگن بیانیه‌سیده ایتیشیچه، ۴۰ ییل اوروش‌نی تجربه قیلگن افغانستان خلقی اوچون، مکتب‌لر تینچ مکان بولیب و باله‌لر اوییرده تعلیم و تربیه کوریش‌لری کیره‌ک. اونینگ تأکیدلشیچه، تینچ اهالی و غیر نظامی آست قورمه‌لر جمله‌دن مکتب‌لرگه قرشی هجوم‌لر، خلق‌ارا انسان پرورلیک قانون-قاعده‌لرگه قرشی دیر.
عین‌حالده، افغانستانده بشر حقوقی وضعیت‌لرینی تیکشیریش اوچون بیرلشگن ملت‌لر تشکیلاتی نینگ مخصوص گزارش‌گری ریچارد بنت، مذکور هجوم‌نی قاره‌لب و عامل‌لری جواب‌گرلیککه تارتیلیشینی طلب قیلگن. او توییتری‌ده یازیشیچه: «کابل غربی‌ده هزاره‌لر نینگ مکتب اوقووچیلرینی نشانگه آلیب و نتیجهده اونلب اوقووچی اولیب و یره‌لنگن بوگونگی هجوم‌نی محکوم قیله‌من. مین اولگن‌لر نینگ عایله اعضالری‌گه قیغوداشلیک بیلدیریب عامل‌لری جواب گرلیککه تارتیلیشینی ایسته‌یمن.»
کابل‌ده‌گی ایلچیخانه‌لردن قطاری جمله‌دن آمریکا ایران ایلچیخانه‌لری، بوگونگی حادثه‌لرنی محکوم قیلگنلر. افغانستان اوچون آمریکا ایلچیلیگی نینگ نماینده‌سی یان مک‌کری، اوز توییتری‌ده تعلیمی مرکزلر نشانگه آلینیشیدن تأسف بیلدیریب ایتیشیچه، « بوتون افغان‌لر تینچ فکر و قورقمسدن تحصیلات‌‌لریگه دوام بیریش‌لری کیره‌ک.»
کابل‌ده ایران ایلچیخانه‌سی توییتری‌ده یازیشیچه: «کابل‌ده ایران ایلچیلیگی کابل غربی‌ده اویوشتیریلگن خودکش هجوم که نتیجهده افغان مسلمان‌لری و روزه‌دارلر اینیقسه مظلوم و گناه‌سیز اوقووچیلر اولیب و یره‌لندی محکوم قیلیب، حادثه قربانی‌لری گه غفران الهی و قالگن عایله اعضالری و قرینداش‌لری گه صبر و چیدم طلب قیله‌دی.»
ایران تشقی ایشلر وزیرلیگی نینگ سوزلاوچیسی سعید خطیب‌زاده، توییتری پیامیده، کابل غربی قسمیده اویوشتیریلگن بوگونگی خودکش هجوم‌نی محکوم قیلیب و اسلامی امارت مسئول‌لریدن، اوشبو واقعه عامل‌لرینی قولگه آلیب و جزالنتیریشلرینی سوره‌گن.
شونینگدیک ناروی مهاجرلر کینگشی بیر بیانیه ترقه‌تیب ایتیشیچه، افغانستان باله‌لر تعلیمی اوچوم اینگ دهشتلی مملکت دیر. مذکور شورا نینگ اورغولشیچه، تینچ‌سیزلیک، مستقیم هجوم‌لر، قشاق‌لیک و قیزلر نینگ مکتب‌لری یاپیق قالیشی، مینگلب اوقووچی نینگ بیرینچی حقوقینی سلب قیلگن.
مملکت‌ده سیاسی و تانیقلی سیمالردن قطاری، بوگونگی پارتلش‌لرگه واکنش کورستگن‌لر. افغانستان نینگ سابق جمهور باشلیغی حامد کرزی، بو هجوم‌لرنی «بشرگه قرشی جنایت» دیب و اونی قتیق شکلده قاره‌له‌گن. جناب کرزی اوشبو هجوم‌لرنی بیلیم گه دشمن‌لیک و مملکت نینگ تعلیم کورگن نسلی‌دن قورقیش عنوان قیلگن.
سابق دولت ملی یره‌ش عالی کینگش باشلیغی عبدالله عبدالله، کابل غربی قسمیده اویوشتیریلگن پارتلش‌لرنی محکوم قیلگن. جناب عبدالله فیسبوک صحیفه‌سیده یازیشیچه، «دهشتلی بو گَل ایش صلح و ثبات دشمن‌لری نینگ ایشی دیر.»
افغانستان خلقی اسلامی وحدت حزب رهبری محمد محقق، اوز پیامیده، کابل غربی‌ده اویوشتیریلگن بوگونگی پارتلش‌لرنی نسل کش‌لیک و بشریت گه قرشی جنایت دیگن.
بوگون ایرته‌لب کابل غربی قسمی، اوچ پارتلش گواهی ایدی. ایکی پارتلش «شهید عبدالرحیم» مکتبی یقینیده و اوچینچی پارتلش ایسه «ممتاز» اوقوو مرکزی‌ده یوز بیرگن.
منبع‌لر بیرقطار میدیالرگه ایتیشلریچه، اوشبو حادثه‌لرده چمه‌سی ۳۰ کیشی که اکثریتی اوقووچیلر دیر هلاک بولگن. بیراق ساغلیق‌نی سقلش وزیرلیگی نینگ سوزلاوچیسی جاوید هژیر نینگ سلام‌وطندارگه ایتیشیچه، حاضرگچه ۵ اولیم و ۲۰ یره‌لی کابل کسلخانه‌لری گه انتقال بیریلگن.
حادثه گواه‌لری، اوشبو پارتلش‌لر تلفاتینی رسمی رقم‌دن کوره کوپ دیدیلر، اما کابل امنیه قوماندان‌لیگی سوزلاوچیسی خالد زدران نینگ سلام‌وطندارگه ایتیشیچه، دستلبکی معلومات‌لری اساسیده، آلتی کیشی هلاک بولگن و ۱۱ کیشی ایسه یره‌لنگن.
واقعه گواه‌لریدن بیرقطاری نینگ سلام‌وطندارگه ایتیشلریچه، مذکور پارتلش‌لر اوقووچیلر مکتب‌دن رخصت بولگن چاغده اویوشتیریلیب و کوپ قربان‌لیک آلگن. اوشبو پارتلش‌لرده محل‌ده‌گی تورر حولی‌لر نقصان کورگن.
واقعه عینی گواه‌لریدن بولمیش نسرین نینگ ایتیشیچه: «اوی‌ده اولتیرگن ایدیک که قتیق پارتلش یوز بیردی، کوچه ایشیگینی آچدیم مردم ییقیلیب یاتگندی، بوتون کوچه‌نی قان باسگن ایدی.»
عینی گواه‌لردن باشقه بیری شعیب گه کوره: «یره‌لرنی انتقال بیرر ایدیلر، دروازه میز یقینیده نیچه کیشی ییقیلیب یاتگندی، مکتب اوقووچیلری نینگ رخصت بولیش تایمی ایدی، آنم شیشه یقینده اولتیرگندی، ایاغ‌دن ضررلندی، برچه نینگ وضعیتی وخیم ایدی، اوییمیز نینگ شیشه‌لری توکیلیب توشگن.»
حادثه محلی‌ده حضوری بولگن شهید عبدالرحیم مکتبی نینگ اوقووچیلریدن معارف نینگ ایتیشیچه، صنف‌داش لریمدن ایکیته‌سی اولیب و یره‌لندی. اونینگ کوپه‌یتیریشیچه، «پارتلش یوز بیردی، آلدینراق ایدیم، ایکی صنف‌داشیم میندن کیین‌راق ایدیلر. سیس چیقدی، اوزیم چاپ‌دیم، بیری شهید بولدی و باشقه بیری یره‌لندی.»
بیزلرنینگ توییترده هم تعقیب قیلینگ!
کابل غربی قسمیده اویوشتیریلگن بوگونگی پارتلش‌لر مسئولیتینی حاضرگچه هیچ بیر گروه یا شخص زمه‌سیگه آلمه‌گن. بو عین‌حالده، اسلامی امارت متصدی‌لری، مملکت بویلب امنیت برقرار ایتیلیشیدن سوز یوریته‌دیلر.
کابل غربی‌ده نیچه مراتبه خودکش و پارتلش یوز بیرگن. بوندن آلدین پایتخت نینگ اوشبو قسمیده جایلشگن تعلیمی مرکزلر نشانگه آلینیب و کوپ قربان‌لیک آلگن.
