نماینده‌لر کینگشی عضوی مهدی راسخ نینگ ایتیشیچه، اوتگن “سه‌شنبه” کونی میدان‌وردک ولایتی نینگ بهسود تومنیده اونگه قرشی صورت تاپگن هجوم دموکراسی و ملت اویی‌گه قرشی هجوم دیر.
جناب راسخ نینگ بوگون “چهارشنبه” اوشبو کینگش عمومی ییغینیده ایتیشیچه، حکومت او و قوروقچی‌لرینی نابود قیلیش اوچون دسیسه توزه‌تگن.
او، نماینده‌لر کینگشیدن اوشبو واقعه‌نی جدی شکلده تیکشیریشی‌نی سوره‌ب و اهالی ایسته‌گی گه دقت بولمه‌گن صورتده، نماینده‌لر کینگشی عضویتی‌دن استعفا قیلیشی ممکن‌لیگی‌نی بیلدیرگن.
نماینده‌لر کینگشی اوشبو عضوی نینگ کوپه‌یتیریشیچه، امنیتی کوچلر ملی اردو باش قومندانی و مدافعه وزیرلیگی سرپرستی یاسین ضیا نینگ هدایتی آرقه‌لی اونینگ موتری‌گه قرشی اوق آتگن. جناب راسخ نینگ ایتیشیچه، مذکور واقعه‌ده قوروقچی‌لریدن بیری یره‌لنگن.
بوتوغریده ملی مدافعه وزیرلیگی فکرینی آلیش اوچون سعی و حرکت قیلدیک، لیکن موفق بولمه‌دیک.
عین‌حالده، نماینده‌لر کینگشی باشلیغی میررحمان رحمانی نینگ ایتیشیچه، قانون‌نی عملگه آشیریش و اهالی خوفسیزلیگی‌نی تامین‌لش پولیس و ملی اردو کوچلری نینگ مسوولیتی دیر، بیراق اولردن بیرقطاری حربی کییم دن فایده‌لنیش بیلن ملی و سیاسی شخصیت‌لر و نماینده‌لر کینگشی اعضالریگه حرمت‌سیزلیک قیله‌دی.
جناب رحمانی، نماینده‌لر کینگشی نینگ مصونیت و ایچکی ایشلر کمیسیونی‌گه مذکور واقعه‌نی تیکشیریب نتیجه‌نی نماینده‌لر کینگشی عمومی ییغینیده تقدیم قیلیش اوچون بویروغ بیرگن.
شونینگدیک، نماینده‌لر کینگشی اعضالریدن بیرقطاری، مهدی راسخ گه قرشی صورت تاپگن هجوم‌نی اوشبو کینگش گه قرشی حرمت‌سیزلیک عنوان قیلیب و بونده‌ی هجوم‌لر توخته‌تیلیشینی سوره‌گنلر.
اوشبو کینگش اعضالریدن بیری ریحانه آزاد نینگ ایتیشیچه، ملت وکیل‌لری اوز حیثیت‌لریدن دفاع قیله آلمه‌گن صورتده، اهالی حقوق‌لریدن دفاع قیله آلمه‌دیدی.
