بیرلشکن ملت‌لر تشکیلاتی باش کاتبی آنتونیو گوتریش، دوحه ییغینی نینگ ایکینچی و یکونلی کونیده، خبری بیر ییغین اوتکزیب ایتیشیچه، بو ییغین اشتراکچی‌لری افغانستان گه برقرارلیک تامین ایتیلیشی اوچون، اسلام امیر‌لیگی بیلن بولگن علاقه‌لرده مشترک و فایده‌لی بیر یانده‌شوو تنلَنیشی خصوصیده سعی و حرکت قیلگنلر.
جناب گوتریش نینگ کوپه‌یتیریشیچه، دوحه ییغینی نینگ برچه اشتراکچی‌لری، افغانستان گه برقرارلیک تامین ایتیلیشی خصوصیده خواطرلر گه جواب بیروچی و فایده‌لی بیر یانده‌شوو تنلَنیشی توغریسیده هم کیلیشگن‌لر.
گوترش نینگ بیان قیلیشیچه: «اوشبو جلسه خلق‌ارا قوشمه یانده‌شوو ایجاد بولیشی حقیده ایدی، اسلام امیر‌لیگی رسمی‌لری نی رسمیت گه تانیش اوچون ایمس ایدی. قوشمه ایش برچه‌میز نینگ فایده‌میز گه بولگنی خصوصیده کیلیشدیک. برچه اشتراکچیلر افغانستان برقرار‌لیگی‌دن خواطرده‌لر و اوشبو جدی خواطرلر نی بیان قیلگنلر.»
بیزلرنینگ فیسبوک صحیفه‌میزگه باش اورینگ!
بیرلشگن ملت‌لر تشکیلاتی باش کاتبی گه کوره، افغانستان ده ترورچی گروه‌لر حضوری اوشبو مملکت بیلن منطقه خصوصیده بیر تهدید دیر.
عین حالده، دوحه ییغینی‌ده اسلام امیر‌لیگی کوچلریدن دعوت بولمه‌گن ایدی و اوشبو مسئله کابل ده سرپرست حکومت نینگ تنقید‌لری بیلن روپه‌ره بولگن.
اسلام امیر‌لیگی سوزلاوچیلریدن بلال کریمی نینگ سلام‌وطندار گه ایتیشیچه، افغانستان اصلی تامان‌لری نینگ حضوری بولمه‌سدن، ایجابی نتیجه بیریشی ممکن ایمس. جناب کریمی نینگ کوپه‌یتیریشیچه: «اصلی تامان‌لر نینگ اشتراکی بولمه‌سدن، بیللی بیر موضوع که، یخشی بیر نتیجه بیرمه‌یدی. حاضر ایسه اوشبو ییغین یولگه قوییلدی و ایجابی بولیم‌لری هم بار ایدی که، اسلام امیر‌لیگی بیلن تعامل قیلیش ایجابی بیر آدیم دیر. افغانستان ایچکی موضوع‌لری خصوصیده بولگنی موضوع‌لر اوچون افغانستان اهالی‌سی نینگ قراری گه حرمت قایل بولینیشی کیره‌ک. افغانستان نینگ ایچکی مسئله‌لری سیاسی بولمه‌یشی کیره‌ک. افغانستان نینگ سرحد‌لری و چیگره‌لری محفوظ دیر. توپراغی‌میزده بیران دفتر یا-ده سنگر نینگ موجود‌لیگی خصوصدیه هیچ قنده‌ی سند یوق.»
باشقه بیر تامان‌دن، خلق‌ارا رابطه‌لر بیلرمان‌لریدن قطاری نینگ ایتیش‌لریچه، حاضر ایسه بیرلشگن ملت‌لر تشکیلاتی و قدرت‌لی مملکت‌لر اسلام امیر‌لیگی نینگ رسمیت گه تانیش اوچون آدیم آلیش نی ایسته‌گنلر.
بیلیم یورت اوقیتووچیسی سید‌شفیق‌الله سادات، بو کبی ییغین‌لر یولگه قوییلیشی نی اسلام امیر‌لیگی نینگ رسمیت گه تانیلیشی خصوصیده زمینه سازلیک بیله‌دی.
جناب سادات نینگ ایتیشیچه: «بیرلشگن ملت‌لر و قدرت‌لی مملکت‌لر اسلام امیر‌لیگی نینگ رسمیت گه تانیلیشی اوچون آدیم‌لری نی باشلگنلر. بو رسمیت گه تانیلیش اوچون زمینه سازلیک دیر. حاضرگچه مستقیم شکلده رسمیت گه تانیلیش نی باشلمه‌گنلر، بیراق بونی باشلنیش اوچون بیر آدیم دیه آله‌میز.»
بیزلرنینگ توییترده هم تعقیب قیلینگ!
شونده‌ی بیرحالده، خلق‌ارا خوفسیزلیک تدقیقات‌چیسی علی‌سجاد مولایی نینگ ایتیشیچه، سونگی اعتراض‌لر و اوشبو ییغین نینگ یولگه قوییلمه‌گنی‌دن آلدین بیرلشگن ملت‌لر تشکیلاتی آدرسی گه یوباریلگن مکتوب‌لر، ییغین موضوع‌لری گه تاثیر قویگن دیر.
اونینگ کوپه‌یتیریشیچه: «سونگی اعتراض‌لر، تنقید‌لر و بیرلشگن ملت‌لر تشکیلاتی گه یوباریلگن مکتوب‌لر، جلسه گه بیراز تاثیر قویگن؛ انه شوو سبب، جلسه درست بیر شکلده اوتمه‌گن. جناب گوترش نینگ سوزلری نی کوردیک که، کوپ احتیاط و آرام‌لیک بیلن جلسه یکونی حقیده صحبت قیلدی.»
شونینگدیک بیرلشگن ملت‌لر تشکیلاتی باش کاتبی نینگ ایتیشیچه، دوحه ییغینی گه شرکت قیلووچیلر تامانیدن افغانستان ده برچه بولیم‌لرده عیال‌لر و قیزلر برابریده معنالی مشارکت سوره‌لگن و اوشبو تشکیلات خوفسیزلیک کینگش قطع‌نامه‌سی حمایتی بیلن، دوحه‌ده مذکور سوزلشوو گه وارد بولگنلر. اونینگ کوپه‌یتیریشیچه، کیینگی آدیم‌لر خصوصیده سوزلشوو اوچون، بیرلشگن ملت‌لر تشکیلاتی تامانیدن تیزلیککه ینه بیر ییغین یولگه قوییلیشی ممکن.