امریکانینگ بوگون (۱-سرطان، یکشنبه) ایرتهلب تانگ پیتلری ایراننینگ فردو، نطنز و اصفهان شامل هستهای سایتلری گه هجومیدن کېین، بیرلشگن ملتلر تشکیلاتی، پاکستان، لبنان، سعودی عربستان، عمان، ونزوئلا، کوبا، کلمبیا، نیوزیلند و باشقه بعضی مملکتلر، یقین شرقده اوروش کېنگهیشیدن خواطر بیلدیریب و اوروش تامانلریدن بو کېسکینلیکنی دیپلماتیک یول بیلن حل قیلیشلرینی سورهگنلر.
ایران تشقی ایشلر وزیری سیدعباس عراقچی، امریکا قۉشمه ایالتلرینینگ ایران هستهای مرکزلریگه هجومینی، بیرلشگن ملتلر تشکیلاتی منشوری و خلقارا قاعدهلرنی بوزیش اتهب، بو حرکت یامان عاقبتلر گه آلیب باریشی حقیده آگاهلنتیرگن.
اونگه کوره: «بیرلشگن ملتلر تشکیلاتی خوفسیزلیک کینگشی دایمی اعضاسی بولگن امریکا قۉشمه ایالتلری، بیرلشگن ملتلر تشکیلاتی منشوری و خلقارا قاعدهلرنی بوزدی. بوگون ایرتهلبکی تحمل قیلیب بولمس واقعه یامان عاقبتلر گه آلیب باریشی ممکن؛ ایران اۉز حاکمیتی و خلق منفعیتیدن دفاع قیلیش اوچون برچه ورینتلرنی محفوظ بیلهدی.»
بیزلرنینگ فیسبوک صحیفهمیزگه باش اورینگ!
بیرلشگن ملتلر تشکیلاتی باش کاتبی آنتونیو گوترش، ایکس صحیفهسیده بیر بیانیه ترقهتیب امریکانینگ ایران هستهای سایتلریگه هجومینی، صلح و خلقارا امنیت اوچون مستقیم تهدید اتهگن. «بو توقنشوولر تیزلیک بیلن کنترولدن چیقیب، تینچ اهالی، منطقه و دنیا اوچون یامان و فاجعهلی عاقبتلر گه آلیب باریشی ممکن. اعضا مملکتلردن اېستهی من کېسکینلیکلرنی کمهیتیریب و بیرلشگن ملتلر تشکیلاتی منشوری و خلقارا قاعدهلرنی رعایت قیلسینلر.»
امریکانینگ ایران هستهای سایتلریگه هجومیدن سۉنگ، اسرائیل باش وزیری بنیامین نتانیاهو ایکس صحیفهسیده بونی تاریخی و جسارتلی حرکت دیگن.
اونینگ کوپهیتیریشیچه: «تاریخده ثبت بولهدی – ترامپ اۉزینینگ قطعی قراری بیلن دنیادهگی اېنگ خوفلی رژیمنی اېنگ خوفلی قوراللر گه ایگه بولیشینی توختهتدی؛ اونینگ بوگونگی حرکتی دنیاده بوریلیش نقطهسینی یرهتدی و بو یقین شرقنی تینچلیک سری یېتکلشی ممکن.»
آسترالیا، نیوزیلند، مکزیک، سعودی عربستان و لبنان، اوروش تامانلریدن کېسکینلیکنی دیپلماتیک یول بیلن حل قیلیش گه تأکیدلهگنلر. اوشبو مملکتلر ارا ونزوئلا و کوبا بو هجوملرنی قارهلشگن.
بیزلرنینگ «ایکس» ترماغی ده هم تعقیب قیلینگ!
حماس و یمن حوثیلری امریکانینگ ایران هستهای سایتلریگه هجومینی قارهلب، اسرائیل و امریکا برابریده ایراننی قۉللب-قوتلشلرینی اېتگنلر.
افغانستانده هم مملکت سابق جمهور باشلیغی حامد کرزی و جمهوریت توزومیده یرهش عالی کینگش باشلیغی عبدالله عبدالله، امریکانینگ ایران هستهای سایتلریگه هجومینی منطقه اوچون کوتیلمهگن یامان عاقبتلر گه امکانیت یرهتیش عنوان قیلگنلر.
حامد کرزی، فیسبوک صحیفهسیده یازیشیچه: «بو هجوم بیرلشگن ملتلر تشکیلاتی منشوری و قاعدهلری گه ضد دیر، منطقهده اوروش کېنگهیب و خلقارا خوفسیزلیگی خطر بیلن دوچ بولیشی ممکن، ایران اتمی فعالیتلری گه دایر معمالر خلقارا مسئول ادارهلر تامانیدن منطقی یوللر بیلن اېزلنیب و حل بولیشی کېرهک.»
امریکا قۉشمه ایالتلرینینگ ایران هستهای سایتلریگه هجومیدن کېین، ایران بالستیک راکتهلر بیلن اسرائیلنینگ تورلی شهرلری جملهدن تلآویو و حیفانی نشانگه آلگن، بو هجوملر عاقبتیده چمهسی ۱۶ کیشی یرهلنگن.
بو هجوملر گه جواب، اسرائیل هم ایران غربی حدودلریده حربی آست قورمهلر گه هجوم اویوشتیرگن.
