چای، سوت، قیماق و توز، بیر-بیریگه ارهلشهدی و عصرلر دوامیده شمالشرق اینیقسه بدخشانده مهماندوستلیک و رسمورواجلر دوام قیلیشینینگ رمزی صفتیده یشب کیلماقده. بدخشان یشاوچیلریدن قطارینینگ ایتیشلریچه، شورچای یالغیز بیر ایچیملیک ایمس، بلکیم دسترخوانلرینینگ چیرایلیگی و فرهنگنینگ بیر بولیمی دیر.
بدخشان دهگی عایلهلردن کوپ قطاریده، هر ایرتنگ شورچای تیارلنیب و مخصوص کلچهلر بیلن دسترخوان اوستیگه قوییلهدی. اوشبو ولایت یشاوچیلریدن بیری فردوس عالمینینگ ایتیشیچه، آوقتلنیش وقتلریدن بیریده شورچای بولمهگنی صورتده، کون بویی اوزلرینی چرچهگن و آرغین حس قیلهدیلر. اونینگ ایشانچیگه کوره، شورچای بدخشاننینگ قدیمی ایچیملیکلریدن بولیب و استه-سیکین قوشنی ولایتلرده هم رواجلنگن.
بیزلرنینگ فیسبوک صحیفهمیزگه باش اورینگ!
عالمی، مذکور ایچیملیکنی بدخشانلیکلر فرهنگیدن اوزاقلشتیریلیب بولمهگنی بیر بولیم دیهدی که، اهالینینگ مهاجرت قیلیشی بیلن بیرگه اوزاق یورتلرگه ییتیب بارگن. «شورچایدن فایدهلنیش فرهنگینینگ حاضرگچه دوام قیلیب کیلگنی سبب، بلکیم مذکور ایچیملیکنینگ قدیمی و اوزون مدتلی تاریخگه ایگه بولگنی دیر. هر کیم اوز ولایتی و اوز منطقهسیدهگی بیر نرسهنی باشقهلرگه ایتیب و اونینگ دوام قیلیشینی ایستهیدی.»
بدخشان دهگی اجتماعی فعال بیکمحمد احمدینینگ ایتیشیچه، شورچای اوزینینگ ایسیق بوغی، شور طعمی، یانغاقلر و قیماغی بیلن عصرلر دوامیده خلقنینگ دسترخوانیده بولیب کیلگن افسانهلر، بیرهملر و ماتملرنی ایسلهتیب تورماقده.
احمدینینگ کوپهیتیریشیچه، بدخشان ده شورچای یالغیز آچلیکنی باسیش اوچون ایمس، بلکیم بیردملیک و مهماندوستلیک رمزی بولیب، اجتماعی صمیمیتنی هم اوزیده مجسم قیلهدی. «هر جای گه بارسهک هم، بدخشان دن بولگنیمیز اوچون شورچای ایچهسیزلر می دیب سورهیدیلر، یعنی اولر بیلهدیلر که بدخشان اهالیسی شورچای دایم فایدهلنهدی. شورچای اهالی کیملیگی و فرهنگینینگ بیر بولیمی دیر و باشقه بولیملر فرهنگیگه قرهگنده فرق قیلهدی و شورچایده حکایهلر بار، قصهلر بار و کتابلر یازیلگن.»
شونینگدیک بدخشان یشاوچیلریدن باشقه بیری عبدالباطن خراسانینینگ ایشانچیگه کوره، شورچای ییللردن بیری مذکور ولایت یشاوچیلرینینگ یقینلشتیرگن صمیمت رمزی دیر. اونینگ ایتیشیچه، اوشبو قدیمی ایچیملیک ساده بولگنی بیلن بیراق اهالینینگ اجتماعی حیاتیده مهم رول اوینهگن.
بیزلرنینگ «ایکس» ترماغی ده هم تعقیب قیلینگ!
خراسانینینگ کوپهیتیریشیچه: «بیز بدخشانلیکلر قولیمیزدهگی بیر پیاله شورچاینی اوتگن تاریخیمیز کبی کورهمیز و اونده بیردملیگیمیز نی کورهمیز. عایلهوی بیر ییغیلیشیمیز بولسه شورچای ایچهمیز و اولتیریب اوتمیشدن قصه قیلهمیز. مثلا هییت کونلری، توی یا-ده مهمانلیکلرده قدیمی فرهنگیمیز شورچایدن فایدهلنهمیز.»
زمانهوی تیز تیارلنهدیگن و تورلیخیل طعاملر آرهسیده شورچاینینگ حضوری بیر آز سونیب بارگن بولسهده، بیراق حاضرگچه ساده اویلرده حیات کیچیرهدیگن کیشیلر آرهسیده اوز دوامینی سقلب قالگن و اولرنینگ دسترخوانلریگه ساده و صمیمی حیاتنینگ رنگینی بغیشلب کیلماقده.
