کابل ده عایلهلردن کوپ قطارینینگ اقتصادی وضعیتی قیینچیلیکلر بیلن روپهره بولگنی بیرحالده، ایسکی بویوملر، آز و اورته درآمدی بولگن کیشیلر اوچون اساسی ساتیب آلیش یوللریدن بیریگه اَیلنگن.
شوندهی بیرحالده، ایسکی بویوم ساتووچیلردن قطاریگه کوره، ییلنینگ کوپینچه کونلریده ساتیشلری میزانی آز بولیب و یالغیز بیر قطار مناسبتلرده بیراز یخشیراق بولهدی. ییتی ییلدن بیری کابلنینگ بهارستان منطقهسیده ایسکی بویوملرنی ساتیب و حیات خرهجتلرینی بو یول آرقهلی تامین قیلهدیگن احمدشاهنینگ ایتیشیچه، اورتچه آیلیک سودا حجمی ۳۰ دن ۵۰ مینگ افغانیگچه بولیب و کوپراق هییت عرفهسی همده قیش باشیده ساتیش بازاری یخشیراق بولهدی.
اونینگ کوپهیتیریشیچه: «قیشکی کییملر، بوت، ایسیتغیچ، برقی نرسهلر، کمپل و اوی اوسکونهلرینینگ کوپراق مشتریسی بار، چونکه قیمتلری مناسبراق دیر و ینگی نرسهلرگه قرهگنده ارزانراق دیر. قیمتلر ایسه صفت، برند، فایدهلنیش میزانی و بازار نرخیگه قرهلیب تعیینلنهدی.»
احمدشاهنینگ گه کوره، دکان کرایهسی یوقاریلیگی، مشتری آزلیگی و اقتصادی وضعیتنینگ تغییر قیلیشی، اولرنینگ اصلی قیینچیلیکلریدن دیر. اونینگ ایتیشیچه، اوتگن ییللرده اهالی ایسکی بویوملرنی ساتیب آلیشگه اونچه قیزیقمس ایکن، بیراق حاضر ایسه اقتصادی وضعیت سبب، بو بویوملر ساتیب آلینیشی کوپهیگن.
شوندهی بیرحالده، بازار وضعیتی توغریسیده ایسکی بویوم ساتووچیلردن احمدضیاءنینگ ایتیشیچه: «ساتیش بازاری وضعیتی اونچه یخشی ایمس و کوپراق هییت عرفهسیده بازارلر یخشی بولهدی. مشتریلریدن کوپ قطارینی آز و اورته درآمد گه ایگه بولگن کیشیلر تشکیل بیرهدی.»
شونینگدیک او، بو بویوملرنینگ تیارلنیشی توغریسیده شوندهی دیدی: «پول کیرهک بولگن کیشیلر، نیازلریگه قرهب اوی وسیلهلرینی ساتهدیلر و بیزلر اولرنی آلهمیز و کیین ایسه اولرگه بیر قیمت تعیین قیلهمیز.»
باشقه بیر تاماندن، ساتیب آلووچیلردن قطاری ایسکی بویوملرنی صفتلی و اقتصادی تنلاو دیهدیلر. ایسکی بویوم ساتیب آلووچیلردن بیری شکیبنینگ ایتیشیچه: «یخشیراق صفتی و اقتصادی بولگنی اوچون ایکینچی قول بویوملرینی ساتیب آلهمن. کوپراق کرمچ و موبایل آلهمن. قولیمدهگی موبایلدن ایکی ییل بولهدی که فایدهلنمهمن. اقتصادیمیز یخشی بولگنیده هم بلکیم ینه شو ییردن کیلیب نرسه آلسم. چونکه صفتی یخشی و قیمتی مناسب دیر.»
بیراق کابل یشاوچیلریدن باشقه بیری شریفه، اونینگ اوچون ایسکی بویوملرنی تنلش کوپراق ضرورت سبب بولگنینی بیان قیلگن. «بو نرسهلردن اقتصادی بولگنی اوچون فایدهلنهمن. ینگی نرسه ساتیب آلماقچین بولسم، قیمتراق دیر و ساتیب آلالمهیمن. ایسکی بویوملر ساتیلهدیگن بازارلردن آلهدیگنیم نرسهلر کوپراق یخچال، جاروبرقی و کمپیوتر کبی برقی اوسکونهلر دیر. اقتصادیم یخشیراق بولگنیده ایسه ینگی نرسهلردن ساتیب آلهمن. برقی اوسکونهلر، کییم، اوی وسیلهلری کبی نرسهلرنی بیرینچیده اوزیم فایدهلنیشنی ایستهیمن.»
فرقلی قرهشلر بولگنی بیلن، دکاندارلر و مشتریلرنینگ سوزلریگه کوره، باشقه وقتلرگه قرهگنده ایسکی بویوملر اهالینینگ اقتصادی وضعیتیگه باغلنگن. بو بازار بیر قطار کیشی اوچون تجاری بیر امکانیت و باشقه بیر قطار اوچون، حیاتنینگ دستلبکی نیازلرنی تامینلش یولی دیر.