۱۵۰ ییل قدامتی بولگن حضرت خلیفه دارالامان جامع مسجدی و خانقاه، سمنگان ولایتی نینگ خرم و سارباغ تومنی «ده‌اصل» قیشلاغیده جایلشیب و مملکت نینگ فرهنگی میراث‌لری‌دن سنله‌دی. اوشبو تاریخی بنا حضرت خلیفه دارالامان نبیره‌سی صلاح‌الدین خان بویروغی بیلن قوریلیب و بیزه‌لتیریش ایش‌لری بخارا نینگ مشهور معمارلری تامانیدن عملگه آشیریلگن.
۸۲ یاشر غلام‌غوث، مذکور بنا نینگ تاریخی قدامتی حقیده ایتیشیچه: «انقلاب دن آلدین مملکت گه کیلدیک. او زمان بو خانقاه ذکر پروگرامی و مدرسه ایدی و بویوک‌لر تامانیدن باشقریلر ایدی و برچه جای‌لر بیلن علاقه‌لری بار ایدی. خانقاه گه اوزگرگنیدن قریب ۱۵۰ ییل اوتماقده.»
بیزلرنینگ فیسبوک صحیفه‌میزگه باش اورینگ!
خرم و سارباغ تومنی «ده‌اصل» قیشلاغی یشاوچیلریدن سیدذاکر سادات گه کوره، اوشبو خانقاه سمنگان نینگ تاریخی آبده‌لریدن سنله‌دی. او نینگ کوپه‌یتیریشیچه: «حضرت صاحب دارالامان خانقاه‌سی نینگ تمل تاشی ۱۵۳ ییل آلدین حضرت صاحب دارالامان نبیره‌سی سیدصلاح‌الدین خان نینگ بویروغی بیلن قوییلگن. اوشه زمان بخارا ده ایشله‌یدیگن رضا یا خلیفه رضا تامانیدن عملگه آشیریلگن و بو سمنگان نینگ تاریخی آبده‌لریدن بیری سنله‌دی.»
۳۶۴ عایله نینگ عبادت‌گاهی بولگن اوشبو مسجد لای دن ایشلنگن شونی اوچون طبیعی حادثه‌لر برابری ده قوله‌ش احتمالی موجود دیر. مذکور مسجد ده نماز اوقیدیگنلر سرپرست حکومت دن بو تاریخی بنا نینگ قوریقلش و بوزیلگن جای‌لرینی قیته تیکله‌شینی سوره‌یدیلر.
سیدذاکر سادات نینگ کوپه‌یتیریشیچه: «قیته توزه‌تیلیشیدن آلدین بوزوق‌‌لیگی کوپ ایدی. الحمدلله معلومات و مدنیت وزیرلیگی مسئوللری نینگ سعی‌وحرکتی طفیلی تعمیرلندی؛ بیراق بو ییل زلزله می یا که باشقه نرسه بیر ستونی درز قیلگن و یشاوچیلر تشویش ده دیر.»
بیزلرنینگ «ایکس» ترماغی ده هم تعقیب قیلینگ!
سمنگان معلومات و مدنیت ریاستی نینگ فرهنگی میراث‌لرنی قوریقلش مدیری محمدامین عزیزی گه کوره، اوشبو ولایت ده‌گی خانقاه و باشقه فرهنگی آبده‌لرنی قیته تیکلش مقصدیده سعی‌وحرکت قیلماقده‌لر.
عزیزی جنابلری نینگ کوپه‌یتیریشیچه: «خانقاه کبی مقدس و مشهور مکان‌لر فرهنگی میراث‌لرنی قوریقلش مدیریتی ده ثبت دیر. سابق اساسی شکلده تعمیرلنگن ایدی؛ بیراق حاضر معلومات و مدنیت ریاستی بو بنا نینگ بوزیلگن جای‌لرینی توزه‌تیش اوچون امکانیتی یوق بیراق برنامه‌میز بار.»
ایتیش کیره‌ک که، «خانقاه خرم» گه مشهور حضرت خلیفه دارالامان جامع مسجد و خانقاه، سمنگان نینگ تاریخی مکان‌لری‌دن بیری سنله‌دی. بو مسجد قدیمی معمارلیک اسلوبی ده قوریلگن، ۱۷ متر اوزون‌لیگی و توقیز متر هم اینی دیر، محل یشاوچیلری گه کوره، مذکور مسجد ده بیر وقت ده ۳۰۰ نماز اوقووچی سیغه‌دی.
