جمهورلیک ریاستی بیرینچی اورین باسری امرالله صالح نینگ ایتیشیچه، اوتگن بیر ییل جریانیده شمال یولی آرقه‌لی کمیده ۸۰۰ میلیون دالر چیت‌ایللیک مملکت‌لرگه قاچاق قیلینگن.
اونینگ ایتیشیچه، آلتین و اسعار نینگ قاچاق ایتیلیشی کته معمالردن بیری دیر کیم اقتصادی جنایت‌نی کوچلی قیله‌دی.
جناب صالح گه کوره، اوتگن ییل چیت‌ایللیک مملکت‌لرگه اسعارنی قاچاق قیلگن کیشی‌لرنینگ فهرستی دولت اختیاریده قرار تاپگن.
بیراق، اونینگ کوپه‌یتیریشیچه، دولت نینگ وظیفه‌سی اوتگن ییل‌نی تصفیه قیلیش ایمس، بلکیم دوامی بولگن قاچاققه توسیق بولیش دیر.
بوگون “جمعه” جمهورلیک ریاستی بیرینچی اورین باسری نینگ فیسبوک صحیفه‌سیده یازیشیچه، بیرینچی امنیتی حوزه آمری مصادره قیلینگن آلتین و اسعارنی قیته‌دن بیریش اوچون بیرقطار سیاسی کیشی‌لر تامانیدن فشار آستیگه قرار بیریلگن. اونینگ تاکید قیلیشیچه، بوتوغریده بوتون امنیتی کوچلردن حمایت قیلینه‌دی و قاچاق ایتیلگن آلتین و اسعار محکمه نینگ طی مراحلی بولمه‌ی قیته‌دن بیریلمه‌یدی.
اونینگ ایتیشیچه، ایرته (شنبه) دن باشلب کابل شهری نینگ موتر ساتیش مرکزلری محاصره قیلینیب و تیکشیریله‌دی.
کابل شهریده جنایت‌لر کوپه‌یگنیدن سونگ، جمهور رئیس محمد اشرف غنی کابل شهری خوفسیزلیگی نی تامین‌لش مسوولیتی‌نی موقتی شکلده بیرینچی اورین باسری امرالله صالح گه تاپشیرگن.