مملکتنینگ تورلی ولایتلر یشاوچیلریدن قطارینینگ ایتیشلریچه، هوا حرارتی آشیشی بیلن بیرگه، اوزلری یا-ده عایله اعضالری ایسیق اورمه یا-ده موسومی کسللیکلرگه چلینگنلر.
کابل یشاوچیسی بولمیش زاهدنینگ ایتیشیچه، ایکی هفتهدن بویان باغیز آغریق بولیب و نیچه مرته شفاکار گه مراجعت قیلگن. اونینگ کوپهیتیریشیچه: «ایکی هفته آلدین باغیز و بورنیمده آغریقنی حس قیلدم. تورت کوندن کیین شفاکار گه باردیم و سببی نی ایسیق اورمه بیلن موسومی حساسیت دیدی.»
کابل یشاوچیلریدن باشقه بیری ثنانینگ ایتیشیچه، سونگی کونلر و هوا حرارتی آشیشیدن کیین ایکی بالهسی کسل بولگن. «ایکی بالهم بار بیرتهسی ۴ یاشر و باشقه بیرتهسی ایسه ۱ یریم یاشر دیر. ایکی هفتهدن بیری کسللر. شفاکار گه آلیب باردیم و شفاکار سببینی تنفسی یوللرینینگ میکروبی بولیشیگه چلینیش دیدی، لیکن مینیمچه سببی هوا ایسیقلیگی و هوا افلاسلیگی دیر.»
شونینگدیک بالهسی ایسیق اورمه طفیلی کسل بولگن تخار یشاوچیسی بولمیش سلیمهنینگ ایتیشیچه: «بالهم کسل بولگن و شفاکار گه آلیب بارگنیمده وضعیتی یخشی بولهدی و قیته اویگه بارگنیمده هوا ایسیقلیگی اوچون وضعیتی یامانلشهدی. شفاکارلر ایسیق اورمه دیهدیلر و ساووقراق جایلرگه بولیشی کیرهک دیهدیلر، لیکن برقیمیز اونچه یوق که پکهنی یاقسهی.»
فراه یشاوچیسی یوسفنینگ ایتیشیچه، هوا حرارتی آشیشی اونینگ بورنی قانیشی همده فشاری پس کیتیشیگه چلینتیرگن. یوسفنینگ کوپهیتیریشیچه: «بیر هفتهدن بیری ایسیق اورمه گه چلینگنمین. تشقریگه چیققنیمده بورنیم قانهیدی، فشاریم پس توشهدی و اوزیمنی حالسیز حس قیلهمن.»
شونینگدیک اسلام امیرلیگی ساغلیقنی سقلش وزیرلیگی ایسیقلیک طفیلی بیش یاشنی تولدیرمهگن بالهلر آرهسیده موسومی کسللیکلر کوپهیگنیدن خبر بیرگن. بو وزیرلیکنینگ معلوماتی اساسیده، جاری میلادی ییل باشلنگنیدن حاضرگچه، بیش یاشنی تولدیرمهگن ۶۴۴ مینگ باله، بو کسللیکلرگه چلینگنلر.
بو توغریده مملکت ساغلیقنی سقلش وزیرلیگی سۉزلاوچیسی شرافت زمان امرخیلنینگ ایتیشیچه: «اوتگن ییلگه قرهگنده موسومی کسللیکلر کوپ ایدی و سببی ایسه، زلزلهلر، ایچکی آوارهلیک، سوو تاشقینلر، ایچیملیک سوودن فایدهلنه آلمسلیک و ناتوغری آوقتلنیش دیر که بو کسللیکلر کوپهیگن، لیکن الحمدالله کسللر قیینچیلیکلری حل بولیب و جدی قیینچیلیکلر بیلن روپهره بولمهدیک.»
ایسیقلیک طفیلی موسومی کسللیکلرگه چلینیشدن یشاوچیلرنینگ خواطرلنیشی یانیده، شفاکارلردن قطارینینگ ایتیشیچه، هوا ایسیق بولیشی یشاوچیلر اینیقسه بالهلر سلامتلیگینی خوف بیلن روپهره قیله آلهدی.
عمومی ایچکی کسللیکلر متخصصی فرهاد وزیرینینگ ایتیشیچه، شخصی و یشش محیط نظافتی رعایت بولمسلیگی، آزیق-آوقت مادهلرینینگ ناتوغری فایدهلی و جوده ساووق سوولردن فایدهلنیش، تنهنینگ مقاومتی کمهیشی و موسومی کسللیکلرگه چلینیش عامللریدن دیر. «هوا ایسق بولیشی بیلن ایسیق اورمه، ایچ کیتمه، ملاریا و محرقه کبی کسللیکلر کوپهیهدی. مذکور کسللیکلر نشانهلری ایسه، ایسیتمه، جان آغریق، باش آغریق، فشار تغییر قیلیشی و کما دیر. شونینگدیک تنفسی سیستمی قیینچیلیکلری هم کوپهیگن.»
شونینگدیک ایچکی کسللیکلر متخصصلریدن باشقه بیری عبیدالله رسولینینگ ایتیشیچه، سویوقلیکلردن فایدهلنیش، محافظتی کلاه بیلن کتهراق کییم کییش و ویتامین سیگه ایگه آوقتلردن فایدهلنیش، تنهنینگ کوچلنیشی و موسومی کسللیکلرگه چلینیشنینگ کمهیشیگه یاردم بیره آلهدی. «بو کسللیک آلدی آلینیشی اوچون آچیق رنگلی کییملر کییلیش، کوپراق سویوقلیکلر، محافظتی کلاهلر و سی ویتامینی بولگن آوقتلردن فایدهلنیش کیرهک. کسللیکلر آلدی آلینیشی اوچون شخصی نظافتنی رعایت قیلیش همده قوللرنی یوویش هم مهم دیر.»
حادثهلرگه قرشی کورهش ملی ادارهسی اوتگن کونی، ولایتلردن قطاریده هوا حرارتینینگ ۴۵ درجه سانتی گراددن آشیشینی معلوم قیلگنی بیرحالده، یشاوچیلر ایسیقلیک طفیلی کسللیکلرگه چلینیشدن خواطر بیلدیرماقدهلر.
