سونگی آیلرده، مینگلب عایله پاکستان دن مملکت قیتیب و کنر ولایتینینگ تورلی منطقهلریگه بارگنلر. افغانستان گه قیتگن مذکور قاچقینلردن قطارینینگ ایتیشلریچه، کوپینچه طبی، اقتصادی و اجتماعی قیینچیلیکلر بیلن روپهره بولیب و عاجل یاردمگه نیازلری بار.
ینگیلیکده پاکستان دن قیتیب و تیریکچیلیک اوچون کنر ولایتی مانوگی تومنیگه بارگن گلالینینگ ایتیشیچه، حیات کیچیرهدیگنلری محلدن دوالنیش مرکزلر اوزاقلیگی و عیال شفاکارلر یوقلیگی، عیاللرنی جدی ساغلیقنی سقلش قیینچیلیکلری بیلن روپهره قیلگن. «کسلخانه گه بارگنیمیزده، او ییرده عیال شفاکارلر یوق. اهالیدن کوپ قطاری بیزلر کبی اوزاق منطقهلرده حیات کیچیرهدی که اولر هم شفاکار گه مراجعت قیله آلمهیدی.»
شونینگدیک مانوگی تومنیده حیات کیچیرهدیگن قاچقینلردن باشقه بیری لطیفالرحمان، حکومتدن قیتگن قاچقینلرگه طبی خذمتلر همده باشقه دستلبکی خذمتلردن فایدهلنیش امکانیتی یرهتیلیشینی سورهگن. «ساغلیقنی سقلش مرکزلر اوزاق دیر و مالی امکانیتیمیز یوق که او ییرگه کسلخانه گه باره آلسهک. افغانستان گه تورخم چیگره قتناو یولی آرقهلی کیلدیک و یالغیز ۱۲ مینگ افغانی یاردم بیردیلر.»
کنر ساغلیقنی سقلش ریاستی سوزلاچیسی ایازخان صافینینگ ایتیشیچه، بو ولایتنینگ اوزاق منطقهلر یشاوچیلری اوچون سیار تیملر، طبی اساسی مرکزلر و فرعی مرکزلر شامل قیقسه مدتلی لایحهلر آرقهلی ۷۰ گچه ساغلیقنی سقلش مرکزی منظور بولگن. «وزیرلیک پالیسیسی اساسیده، برچه ساغلیقنی سقلش مرکزلریده عیال خادملر حضوری بار.»
شونینگدیک کنر قاچقینلر ریاستی مسئوللری، مملکت گه قیتگن قاچقینلر قیینچیلیکلرینی تصدیقلب و ایتیشلریچه، مذکور قیینچیلیکلر حلی اوچون سعیوحرکتنینگ دوامی بار.
اوشبو ریاستنینگ فوقالعاده وضعیتلر بوییچه عمومی مدیری عزتالله احساسنینگ ایتیشیچه، سونگی آیلرده قریب ۴۳۰۰ افغانستانلیک پاکستان دن بو ولایت گه قیتیب و حاضر باشپنه و یشش محلی کملیگی بیلن روپهرهلر. «ساغلیق بولیمیده مملکت گه قیتگن قاچقینلر اوچون تورلیخیل موسسهلر بیلن هماهنگلیک قیلگنمیز؛ اولرنینگ قیینچیلیکلری بیراز حل بولگن. ساغلیقنی سقلش موسسهلر و سیار تیملر دایم ساحهلرگه باریب و اولرنینگ قیینچیلیکلرینی حل قیلهدیلر.»
بوندن آلدین، بیرلشگن ملتلر تشکیلاتی، مملکت گه قیتگنلردن یالغیز ۱۱ فایزینینگ ایش فرصتیدن فایدهلنه آلگنینی معلوم قیلگن ایدی. بو تشکیلاتگه تیگیشلی نهادلرگه کوره، ایش یوقلیگی، باشپنه قیینچیلیگی و اساسی خذمتلردن آزراق فایدهلنیش، مملکت گه قیتگن قاچقین عایلهلر برابریدهگی جدی قیینچیلیکلردن حسابلنهدی.
