بلخ ولایتی مارمل تومنی اهالیسی و زلزلهدن جبرلنگنلر، طبی خذمتلردن آز فایدهلنماقدهلیکلری و بو تومنده فقط بیر دولت کلینیکی و ایکی داروخانه فعالیت آلیب بارماقدهلیگینی ایتهدیلر. اولر سلاموطندار بیلن صحبتده شوندهی دیېدی، اهالینینگ کوپلیگی و احتیاجلریگه قرهگنده، بو کلینیک برچه احتیاجلرینی حل قیله آلمهیدی و اولر کسللرینی دوالش اوچون بیر ساعت یول یوریشدن سۉنگ بلخ مرکزی مزارشریف شهریگه آلیب باریشگه مجبورلر.
مارمل تومنی یشاوچیلری، مسئوللردن کلینیکلر سانی آشیریلیشینی اېستهیدیلر. مارمل تومنی یشاوچیلریدن بولمیش محمدعارف شوندهی دیېدی: «کلینیک بار جوده هم ضعیف؛ فقط نیچه دانه قرص و تابلیت بیرهدی و بعضی کسللرنی دوالهیدی؛ اگر احواللری آغیر بولسه مزارشریف گه یوللـهیدیلر. یوللریمیز بوزوق، حتا کسللریمیز یولده وفات ایتهدی. سرک خامه و باشقه بیر کلینیکنینگ قوریلیش ایشی یریم قالگن.»
مارمل تومنی یشاوچیلریدن باشقه بیری شیرمحمدنینگ ایتیشیچه: «قریب ۹۰ فایز اهالینینگ طبی مشکلی بار. یخشی شفاکاریمیز یوق. زمانهوی داروخانهمیز یوق. احوالی آغیر کسللر مزارشریف گه یوللنهدی. قیینچیلیک کوپ و ساغلیق بوییچه مسئلهلریمیز حل بولمهیدی.
شو بیلن بیرگه، مارمل تومنی «هاشمآباد» قیشلاغی وکیلی حمیدالله، اوشبو تومن اهالیسینینگ طبی خذمتلر یېتیشمسلیک قیینچیلیگی حقیده شوندهی دیېدی: «خصوصی کسلخانه یوق، فقط بیر دولت کلینیکی بار، او هم یالغیز ۴۵ فایز خذمت کورستهدی و اوندن آرتیققه قوربی یېتمهیدی.»
سۉنگی زلزلهدن جبرلنگن مارمل تومنی یشاوچیلری، دولتدن بو تومنده ایشی یریم قالگن ۳۰ یاتاقلی بیر کسلخانهنینگ قوریلیش ایشینی تیزلیک بیلن باشلشینی سورهیدیلر. بو کسلخانهنینگ قوریلیش ایشی اوتگن حکومتده ۳ فایز گچه توگهگن اېدی؛ بیراق نامعلوم دلیللر طفیلی توختهب قالگن.
مارمل تومنی «راحتآباد» قیشلاغی یشاوچیلریدن بولمیش محمدنادرنینگ ایتیشیچه: «بو ییرده بیر کلینیک بار و خذمت کورستماقده بیراق اهالینینگ احتیاجلرینی قاندیره آلمهیدی. اوشبو کسلخانه گه بیریلهدیگن دارولر اوچ آی کیچیکیشی بیلن یېتهدی و اهالی کوپلیگی اوچون برچهنینگ احتیاجلری حل بولمهیدی. آدملر قیینچیلیکنی تن آلیب شهر [مزارشریف] گه باریش اوچون مجبور. اسلام امیرلیگیدن ایشی یریم قالگن ۳۰ یاتاقلی کسلخانهنینگ ایشینی تیزلیک بیلن باشلشنی اېستهیمیز.»
مارمل تومنی «لبحوض» قیشلاغی یشاچیسی قربان گه کوره: «مارمل تومنیده دستلبکی بیر کلینیک بار آدملرنینگ برچه قیینچیلیکلرینی حل قیله آلمهیدی. مزارشریف یونهلیشی جوده بوزوق، کسللرنی قیینچیلیک بیلن مزارشریف گه آلیب بارهمیز مارمل تومنیده ۳۰ یاتاقلی کسلخانه یریم قالگن ایشینی تیزلیک بیلن باشلنیشنی اېستهیمیز.»
شفاکارلر هم، مارمل تومنیده شفاکار آزلیگی و طبی خذمت کم کورسهتیلیشینی تصدیقلهیدی. مارمل تومنی کلینیک آمری ذبیحالله اخترینینگ ایتیشیچه، بیر هفته ایچیده قریب ۵۰۰ کسل بو کلینیک که مراجعت قیلگن و اولر گه طبی خذمت کورسهتیلگن. او شوندهی دیېدی: «اېنگ کوپ بیش یاشنی تولدیرمهگن بالهلر گه خذمت کورسهتیلهدی؛ توغیش خذمتلری کورسهتیلهدی؛ بالهلرنینگ توییب آوقتلنیشی بولیمیده طبی خذمت کورسهتیلهدی و اېنگ مهمی واکسین مسئلهسی دیر. بونگه قوشیمچه، برچه ساحهلرده ایرکک و عیال گه خذمت کورسهتیلماقده.»
بلخ ساغلیقنی سقلش مسئوللری، برچه یشاوچیلر گه تولیق طبی خذمت کورسهتیلیشی اوچون سعی-حرکت قیلهیاتگنلرینی ایتهدیلر. اولر یقین ارهده بلخ بوتون تومنلریده زمانهوی جهازلر بیلن ینگی طبی مرکزلر قوریلیش ایشانچینی بیرهدیلر.
بلخ ساغلیقنی سقلش ریاستی سۉزلاوچیسی کمالخان زدران شوندهی دیېدی: «مارمل تومنیدهگی مرکزده شفاکارلر خذمت کورستماقده؛ شو سببلی اولرنینگ احتیاجلرینی تأمینلش گه حرکت قیلهیپمیز و طبی خذمتلردن فایدهلنه آلمهیاتگنلر فایدهلنیشی اوچون تلاش قیلهیپمیز. بلخ ساغلیقنی سقلش ریاستی هردایم ساغلیق مرکزی بولمهگن حدودلرده ساغلیق مرکز قوریلیب و اهالی گه طبی خذمت کورسهتیلیشی اوچون سعی-حرکت قیلیب کیلگن. یقین کېلهجکده بلخ بوتون تومنلریده زمانهوی ساغلیق مرکزلری قوریلیشی اوچون تلاش قیلماقدهمیز.»
مارمل تومنی مسئوللرینینگ معلوماتیگه کوره، بو تومننینگ ۳۱ قیشلاغی و قریب ۱۷ مینگ اهالیسی بار، سۉنگی زلزلهده بو تومننینگ ۳ قیشلاغیده ۱۴۶ عایله جبرلنگن.
