بلخ معلومات و مدنیت ریاستیده مسئوللرنینگ ایتیشلریچه، ۱۲-عقرب ده یوز بیرگن زلزله نتیجهسیده اوشبو ولایت مرکزی مزارشریف شهریده جایلشگن روضهی شریفنینگ بوزیلگن بولیملرینی قیته تیکلش ایشی باشلنگن.
بلخ معلومات و مدنیت ریاستی صناعت و فرهنگ مسئولی ذبیحالله آریایینینگ ایتیشیچه، اوشبو تاریخی بنانینگ قیته قوریلیش ایشلری توغریسیده بیر کمیسیون آچیلگن. اونینگ کوپهیتیریشیچه: «روضهی شریفنینگ بیر قطار بولیملری یوز بیرگن سونگی زلزله نتیجهسیده زیان کورگن. خوشبختانه اوشبو تاریخی بنانینگ قیته تیکلش ایشی مملکت حج و اوقات وزیرلیگی آرقهلی قیته باشلنگن.»
مملکت شمالیده ۱۲-عقربده یوز بیرگن زلزله، جانی تلفات و مالی زیانلر یانیده شونینگدیک بلخ و سمنگان ولایتلریدهگی تاریخی بنالرگه هم زیان ییتیشتیرگن.
باشقه بیر تاماندن، مزارشریف یشاوچیلریدن قطاری، روضهی شریفنینگ قیته تیکلش ایشی باشلنگنیدن خورسندلیک بیلدیریب و ایتیشلریچه، تاریخی بنالرنینگ سقلهنیشی کیرهک.
مزارشریف یشاوچیلریدن سیدسجاد موسومینینگ ایتیشیچه، روضهی شریف بو شهرگه سیاحتچیلرنینگ کیلیش امکانیتینی یرهتیب و اونینگ قیته تیکلنیشی و تعمیرلنیشی کیرهک. «قدیمی و مقدس بیر جای دیر که ییلده ایچکی و تشقی مینگلرچه سیاحتچی توجهسینی اوزیگه قرهتهدی. بو جای شمال ولایتلرینینگ تاریخی کیملیگی بولیب و اونینگ یخشی شکلده قیته قوریلیشی کیرهک.»
مزارشریف یشاوچیلریدن باشقه بیری عبدالقدیرنینگ ایتیشیچه: «روضهی مبارکنینگ خراب بولگن بولیملری قیته تیکلنیش ایشی باشلنگنی اوچون جودهیم خوشمیز؛ چونکه تاریخی و ارزشلی بیر بنا دیر که کوپینچه سیاحتچی اونینگ کوریش اوچون کیلهدی.»
روضهی شریف، تیموری اسلوبیده کوک و فیروزه رنگلی گمبزلر و کاشیلر بیلن قوریلیب، افغانستاننینگ اینگ مهم تاریخی بنالریدن بیری حسابلنهدی.
