افغانستاننینگ اتاقلی ژورنالیست و اۉزبېک مطبوعاتینینگ اساسچیلریدن بۉلگن امانالله خلیلیار بوگون (۱۱-قوس/۲-دیسمبر، سهشنبه) کونی توشدن سۉنگ وفات اېتدی.
خلیلیارنینگ وفات اېتیشی تورلی مناسبتلر گه سبب بولدی. اۉزبېک خلقینینگ تنیقلی یازووچی و شاعری محمدحلیم یارقین، اوشبو مناسبت بیلن فیسبوک صحیفهسیده، خلیلیار اۉزبېک تیلینینگ سیسلی و تصویرلی یېتکرمهلر بوییچه فدایی خذمتچیسی و حامیسی بولگنینی اېتگن.
یارقین جنابلری، فیسبوک صحیفهسیده شوندهی یازگن: «رحمتلی خلیلیار عمری نینگ اساسی قسمینی افغانستان ملی رادیو-تلویزیونی اۉزبېک بۉلیمی و آیینه تلویزیونیده صرفلهدی. او، تیلیمیزنینگ سېسلی و تصویرلی یېتکرمهلری بۉییچه فدایی خذمتچیسی و حامیسی اېدی. اونینگ وفاتی ضیالیلریمیز گروهیده کته یۉقاتیش دیر.»
جمهوریت توزومیده دولت سابق ییریک عملدارلریدن بیری عنایتالله بابر فرهمند، خلیلیارنینگ وفاتینی کتته یوقاتیش و قیغولی واقعه دیب اتهگن.
شونینگدیک، سابق دولت ییریک عملدارلریدن باشقه بیری نقیبالله فایق، امانالله خلیلیارنینگ وفاتینی افغانستان تورکلری اوچون فرهنگی کتته یوتاقیش دیب اتهگن. او سۉزلری دوامیده، مرحومینینگ مهرلی، صبرلی، بیلیملی و غرورلی بویوک بیر انسان اېدی دیب یازگن. «استاد امانالله خلیلیار مهرلى، صبرلى، علملى و غرورلى بویوک بیر انسان ایدیلر. افغانستان تورکلری اوچون بو بیر کته فرهنگى یوقاتیش دیر.»
سابق سنا کینگشی وکیلی نبیه مصطفیزاده هم، فیسبوک صحیفهسیده خلیلیار حیاتی دوامیده تیل و مدنیت ساحهسیده تینیمسیز کورهشیب و اۉزیدن یخشی آت قالدیرگنینی معلوم قیلگن.
تنیقلی ژورنالیست صبغتالله سپهر، امانالله خلیلیارنینگ وفاتیگه مناسبت بیلدیریب، مملکت مطبوعاتی ساحهسینینگ پیشقدملریدن بیری وفات ایتیشی، افغانستان اۉزبېک خلقی اوچون کتته ضایعه دیگن.
مرحوم خلیلیار، یاش ژورنالیستلرنینگ ایش اورگهنیشی اوچون کوپینچه خذمت قیلگن دیب یازگن، ژورنالیست صبغتالله سپهر.
شو بیلن بیرگه، ژورنالیست و یازووچی محمدحسن تولقین، رحمتلی خلیلیار بوندن یریم عصر آلدین افغانستان ملی رادیو-تلویزیونیده اۉزبېک تیلیده گپیرگن بیرینچی خبرنگار و نطاقلردن بولیب و عمرینینگ ثمرهلی قسمینی اۉزبېک تیلی و فرهنگینی رواجلنتیریشگه اۉتکزگنینی بیلدیرگن.
تولقین جنابلری فیسبوک صحیفهسیده شوندهی دیب یازگن: «رحمتلی استاد بوندن یریم عصر آلدین افغانستان ملی رادیو تلویزیونیده اۉزبېک تیلیده گپیرگن بیرینچی خبرنگار و نطاقلردن حسابنلهدی. او کیشی عمرینینگ ثمرهلی قسمینی اۉزبېک تیلی و فرهنگینی رواجلنتیریشگه بغیشلهگن اېدی.»
خلیلیارنینگ وفاتیگه مناسبتلر دوامیده، اۉزبېک ژورنالیستلریدن عصمتالله صالح اوغلی گه کوره، مرحوم خلیلیار ادیبلر آرهسیده فکری و بیلیملی مکتب درجهسیده اېدی و افغانستان تورکلری هنوز خلیلیار کبی انسانلر گه محتاج و اونینگ یوقاتیلیشی هر بیر کیشینینگ ایزهدیگن آغریقلی بیر فاجعه بولگن. او شوندهی دیب یازگن: «استاد امانالله خلیلیار ادیبلر آرهسیده پارلاق یولدوز کبی فکری و بیلیملی بیر مکتب درجهسیده اېدی. افغانستان تورک جمعیتی هنوز استاد خلیلیار کبی انسانلر گه محتاج و اونینگ یوقاتیلیشی بیزنینگ هر بیریمیزنی ایزهدیگن آغریقلی بیر فاجعه بولدی.»
امانالله خلیلیار، حیاتی دوامیده افغانستان ملی رادیو-تلویزیونی اۉزبېک بولیمینینگ باشلیغی و آینه خلقارا تلویزیونینینگ نشرات باشلیغی صفتیده ایش بجرگن. او ۸۶ یاشیده یورهک کسللیگی بوییچه، ۱۴۰۴-ییل، ۱۱-قوس کابل شهری کسلخانهلریدن بیریده وفات اېتدی.
