مبارک رمضان آیی کیریب کیلیشی بیلن یشاوچیلر بو آینی معنوی شادلیک بیلن کوتیب آلدیلر. بعضی یشاوچیلر رمضان آیینی رحمت، برکت و گناهلر کیچیریلهدیگن آی دیب بیلیب، بو فرصتدن الله گه ینهده یقینلشیش و یخشی اخلاقنی مستحکملش اوچون فایدهلنیش حقیده تأکید ایتیشهدی.
یشاوچیلر گه کوره، بو آی دوامیده محتاجلر گه یاردم قولینی چوزیش و همجهتلیک همده اوزارا کمک آرقهلی قیینچیلیکده بولگن انسانلرنینگ معمالرینی کمهیتیریش لازم.
کابل شهری قلعه فتحالله یشاوچیسی توریالی، رمضان مبارک آیی ییتیب کیلیشیدن خورسندلیک قیلیب، روزه رحمت و برکت آیی دیر و بو آیده امکانیتی بولگنلر محتاجلر گه یاردم بیریشی کیرهک دییدی. اونگه کوره: «رمضان آیی برکتلی آی دیر و اوشبو آیده یخشی عبادت قیلیش گه حرکت قیلسک، بعضی وطنداشلریمیز بیکار، بایبهدولت و تجارلردن بو آیده محتاجلر گه یاردم بیریشلرینی ایستهی من.»
شونینگدیک، کابل شهری اونینچی ناحیه یشاوچیسی حاجی احمدشاه، رمضان آیی اهمیتیگه اشاره قیلیب، اوروش، جنجل و صبرسیزلیکدن اوزاقلشیش گه تأکیدلهیدی. او بو آیده آسایشتهلیکنی سقلش همده عایله و اوزارا قوشنیلر و وطنداشلر بیلن انسانی مناسبتده بولیش علیحده اهمیت گه ایگه ایکنینی ایتهدی.
او شوندهی دییدی: «رمضان آییده اوروش و جنجل قیلیش یامان دیر و پیغمبرص هم ایتگنلر روزه آلسنگیز بوتون تنهنگیز روزه بولسین، باشقهلر بیلن یخشی مناسبتده بولیب و شفقتلی بولینگلر.»
شو بیلن بیرگه، یشاوچیلردن بعضیلری اقتصادی و اجتماعی معمالر یوزهسیدن خواطر بیلدیرهدیلر. نرخ-نوانینگ آشیشی و مناسب ایش اورینلرینینگ یوقلیگی عایلهلرنینگ روزه توتیش همده ضرور احتیاجلرینی تأمینلش امکانیتیگه تأثیر کورسهتیشی ممکن بولگن معمالر دیر.
پنجشیر یشاوچیی فضلالدین و کارته چهار یشاوچیسی احمدشاه، رمضان مبارک آیی کیریب کیلیشیدن خورسند بولسه-لرده عایله احتیاجلرینی تأمینله آلمسلیکنی ایتیشهدی. اولر حکومتدن، عایله اعضالری اوچون یخشی امکانیت یرهتیب بیره آلیش مقصدیده نرخ-نوالر قیمتینی کمهیتیریشنی سورهیدیلر.
فضلالدین شوندهی دییدی: «هنوزگچه روزه اوچون هیچ نرسه آلگنیمیز یوق چونکی پول یوق و رمضان اوچون تیارگرلیک کورگنیمیز یوق، بیراق کیریب کیلگنیدن خورسندمیز چونکی بیر ییل دوامیده بیر مرته کیلهدی.»
شو بیلن بیرگه، احمدشاه گه کوره: «رمضان آییده نرخلر آشهدی و سوداگرلردن قیمتلرنی پسهیتیریشنی ایستهیمیز – یشاوچیلر امکانیتلریگه یرهشه نرسه ساتیب آلسینلر.»
شو بیلن بیرگه، دین عالملری مبارک رمضان آییده اخلاقلی و صبر-طاقتلی بولیشگه تأکیدلب، بو آی صبر-مهر-محبت و صمیمیتنی اورگهنیش اوچون مهم فرصت ایکنینی ایتهدیلر. اولر، آدملر بو آیده یخشیلیک قیلیش و باشقهلر گه یاردم بیریشگه علیحده اعتبار قرهتیشلری کیرهکلیگینی تأکیدلهیدیلر.
یشاوچیلرنینگ فکریچه، رمضان آیی همجهتلیک، باشقهلر گه یاردم بیریش و انسانی قدریتلرنی مستحکملش اوچون قولی فرصت دیر. اولر اخلاق و اجتماعی همکارلیکنی سقلش آرقهلی بو آی برکهلرینی حیاتلریده ینهده کوپراق حس قیلیشنی امید قیلهدیلر.
