عیاللردن کوپ قطاری اوچون رسمی تعلیمدن فایدهلنیلیشی آز بولگن لغمان ولایتیده، رادیو و تلویزیون ایکی اونملی تعلیمی و آگاهیلیک واسطهسی صفتیده مهم رول اوینش گه موفق بولگن. مذکور ییتکرمهلر، عیاللر گه نهفقط دینی، ساغلیقنی سقلش، تربیه و حقوقی معلوماتلرگه ایگه بولیش امکانیتینی بیرهدی، بلکیم اولرنینگ عایلهدهگی و جمعیتدهگی رولینینگ اوزگریشی همده مستحکملنیشیگه هم سبب بولگن.
بو توغریده لغمان یشاوچیسی بولمیش ۳۵ یاشر حلیمهنینگ ایتیشیچه: «مین کوپراق رادیو ایشیتهمن، ایرتنگدن آخشمگچه و اوی ایشلری بولسه هم رادیو ایشیتهمن. ساغلیقنی سقلش، بالهلر تربیهسی و دینی برنامهلردن خوشم کیلهدی. رادیو ذهننی آچهدی. رادیو آرقهلی بیلدیم که بیر عیال فقط اوی ایشی مسئولی ایمس، بلکیم بالهلر تربیهسی و اجتماعی اورینده هم حصه قوشه آلیشی کیرهک. قیز و اوغیل آرهسیده فرق قایل ایمسمین. هر ایکیسینی بیر رقم تربیه قیلهمن.»
لغمان ولایتی یشاوچیسی و یالغیز رادیو امکانیتیدن فایدهلنه آلگن ۲۶ یاشر زرمینهنینگ ایتیشیچه: «تورموش اورتاغیم تلویزیون آلیشگه رخصت بیرمهیدی؛ بیراق رادیو ایشیته آلهمیز. رادیو مینی اوچون بیر مکتب کبی دیر. آنهلر ساغلیگی، عیاللر حقوقی و تربیه مسئلهلرینی اورگندیم. بیلدیم که عیاللر اوزلریگه کوپراق ارزش بیرسینلر و اوز اورینلرینی عایلهده یخشی مدیریت قیلسینلر.»
شونینگدیک سوادسیز عیاللردن قطاری، تلویزیون دن اورگهنیش اوچون فایدهلی بیر وسیله صفتیده فایدهلنهدیلر. لغمان ولایتی قرغهای تومنی یشاوچیسی ۳۵ یاشر ناهیدهنینگ ایتیشیچه: «سوادیم یوق؛ بیراق تلویزیون مینی اوچون جودهیم فایدهلی دیر. تیکووچیلیک، آشپزلیک و دینی برنامهلرینی کوپ کورهمن. تلویزیون مینی سواد اورگهنیشیمگه سبب بولدی؛ حاضر اوقیب و یازه آلهمن. بوندن آلدین بیر عیال یالغیز اوی اویشلرینی قیلهدی دیب فکر قیلهر ایدیم؛ بیراق حاضر تلویزیون آرقهلی اورگندیم که بیر عیال بالهلر تربیهسیده، عایلهده قرار آلیش و حتا جمعیتده اورینی بولیش امکانیتیگه ایگه دیر.»
باشقه بیر تاماندن، تلویزیون و اجتماعی ترماقلردن کوپراق فایدهلنهدیگن یاشراق نسللر هم، تلویزیون برنامهلرینینگ ایجابی تاثیرلرینی بیان قیلهدیلر. لغمان مرکزی مهترلام شهری یشاوچیسی بولمیش ۱۸ یاشر شبنمنینگ ایتیشیچه: «اوییمیزده هم رادیومیز بار و هم تلویزیون؛ بیراق مین کوپراق تلویزیون کورهمن. تعلیمی، علمی، عایلهوی و انگیزه بیرووچی برنامهلردن قیزیقهمن. تلویزیون و بعضا رادیو آرقهلی کوپ نرسهلرنی اورگنگنمین؛ مثلا ساغلیقنی سقلش مسئلهلری، مطالعه اصولی، عیاللر حقوقی و جمعیتده اولرنینگ اورنی. زحمت قیلیش بیلن هر بیر قیزنینگ موفق بولیشیگه ایشانهمن. رواجلنیش برابریده هیچ بیر چیکلاو یوق، فقط اراده قیلیش کیرهک.»
روانشناس و بیلیم یورت استادلریدن محمدرسول نظرینینگ ایتیشیچه، رادیو و تلویزیون اینیقسه عیاللر آرهسیده آگاهیلیک اوچون بیر وسیله دیر که اونینگ آرقهلی بیرینچیده آگاهیلیک قولگه کیلتیریب و کیین ایسه عایله و حیات برابریده فکر لرینی اوزگرتیره آلهدیلر. اونینگ بو توغریده کوپهیتیریشیچه: «رادیو و تلویزیون جمعیت اینیقسه رسمی تعلیم امکانیتیدن فایدهلنه آلمهگن عیاللر آرهسیده کوپ کوچلی تربیه و روحی اورینگه ایگه بوله آلهدی. بیر عیال حقوق و اوز مسئولیتلرینی بیلگنی پیتده، اوزی، عایلهسی و جمعیتیگه قرشی فکرلری اوزگرهدی. مذکور آگاهیلیک، اوزون مدتده عایلهوی زورهوانلیک کمهیشی و کیلهسی نسل تربیهسی رواجلنیشیگه سبب بوله آلهدی.»
شونینگدیک بو توغریده ییتکرمهلر ایشلری بوییچه ایش بیلرمان رفیعالله کوچینینگ ایتیشیچه: «رادیو عیاللر اوچون جودهیم اونملی دیر و شونینگدیک تلویزیونلر هم کوپ اهمیتگه ایگه دیر. عیاللر بیر برنامهنی کورگنلری یا-ده ایشیتگنلریده، یخشی شکلده درک قیله آلهدیلر. شونینگدیک رادیو ساده، ارزان و هر ییرده ایشیتیلیشی ممکن دیر. اوزاق منطقهلرده اهالی تلویزیوندن فایدهلنه آلمهیدیلر و رادیو آرقهلی تعلیمی و ساغلیق برنامهلرنی ایشیته آلهدیلر. مینیمچه، رادیو لغمان ده اینیقسه عیاللر اوچون جودهیم فایدهلی بیر وسیله دیر؛ چونکه بو ییرده تلویزیونلردن قطاری فعال ایمس.»
لغمان ده عیاللر تجربهسی گه قرهگنده، رادیو و تلویزیون ساده بیر وسیله؛ بیراق فایدهلی بولیب، رسمی تعلیمدن محروم بولگن کیشیلر اینیقسه عیاللر گه آگاهیلیک، اورگهنیش و کوچلهنیش یولینی آچه آلگن. مذکور ییکرمهلر نهفقط عیاللر آگاهیلیگینی کوپهیتیرگن، بلکیم عایله و جمعیتده اولرنینگ اورنینی مستحکملنتیرگن.
ایش بیلرمانلرنینگ ایشانچیگه کوره، ییتکرمهلردن یخشی شکلده فایدهلنیش عایلهوی زورهوانلیکلر کمهیشی، سواد رواجلنیشی و روحی همده اجتماعی وضعیت یخشیلنیشیگه یاردم بیرهدی. حاضرگچه منطقهلردن قطاریده برق یوقلیگی، قشاقلیک یا-ده فرهنگی چیکلاولر کبی قیینچیلیکلر بار؛ لیکن لغمان دهگی عیاللر تجربهسی گه کوره، ییتکرمهلردن حتا آزراق فایدهلنیش هم اوزگریش اوچون یولنی آچه آلهدی.
