قندوز ده‌گی دهقانلردن قطاری‌نینگ ایتیشلریچه، جاری ییل ایچیده ییرلریدن یخشی حاصل قولگه کیلتیرگنلری بیرحالده؛ بیراق ساووقخانه یوقلیگی سبب محصوللریدن کوپینچه‌سی خراب بولگن.
مذکور ولایت‌ده‌گی دهقانلردن بیری ذبیح‌الله‌نینگ ایتیشیچه، سبزه‌وات بولیمی‌ده ایکینچیلیک محصوللر کوپه‌یگنی بیلن، بیراق بازار یوقلیگی، اولرنینگ محصوللری خراب بولیشی‌گه سبب بولگن. اونینگ کوپه‌یتیریشیچه: «بو ییل بیر جریب ییر‌نی سبزه‌وات‌گه اختصاص بیردیم. حاضر بو ایش یخشی بولیب و سبزه‌وات قیمتی هم مناسب دیر؛ بیراق اونچه‌لیک بازار یوق.»
قندوز ده‌گی دهقانلردن باشقه بیر عبدالصبور، دهقانلرنینگ روپهره بولگن قیین‌چیلیکلرینی بیان قیلیب و محصوللری اوچون ساووقخانه قوریلیشینی ایسته‌گن. «دهقانلر دارو و سوو کم‌لیگی و باشقه بیر قطار قیین‌چیلیک‌لر بیلن روپهره دیر. قندوز‌ده‌گی دهقانلرنینگ ینه بیر قیین‌چیلیگی ساووقخانه کم‌لیگی دیر. بیران ساووقخانه قوریلسین که قندوز گه علاوه باشقه ولایت‌لر و حتا قوشنی مملکت‌لر گه محصول صادر قیله‌یلیک.»
بیزلرنینگ فیسبوک صحیفه‌میزگه باش اورینگ!
شونینگدیک بو لایت‌ده‌گی دهقانلردن باشقه بیری امین‌الله‌نینگ ایتیشیچه، محصوللری یخشی‌لنیشی توغریسیده یاردم بیرووچی نهادلر آرقه‌لی اولرگه همکارلیک بولمه‌گن. «یاردم بیرووچی نهادلر حاضرگچه هیچ نرسه بیرمه‌گن و دولت بیلن یاردم بیرووچی نهادلردن، دهقان‌لرگه همکارلیک بولینیشینی ایسته‌میز که یخشی‌راق حاصل قولگه کیلتیره‌یلیک.»
باشقه بیر تاماندن، ایکینچیلیک ایشلری بوییچه ایش بیلرمان گل‌آغا صادق‌نینگ ایتیشیچه، قندوز ولایتی ایکینچیلیک اینیقسه سبزه‌وات ایکیلیشی اوچون یخشی دیر و بو توغریده دهقانلر گه امکانیت و آسایشته‌لیک یره‌تیلگنی صورت‌ده، محصوللر‌نینگ سیزیلرلی درجه‌ده رواجلنیشی ممکن.
جناب صادق‌نینگ کوپه‌یتیریشیچه: «ییل‌نینگ تورلی ایکی موسومیده سبزه‌وات ایکیله‌دی. قیش موسومی‌گه عاید بولگن سبزه‌وات جوزا و اسد آی‌لریده ایکیله‌دی که حاصللری کوز و قیش موسومیده دوام قیله‌دی و اولرنینگ قیش موسومیده، نسبتا ساووق هوا‌‌ده مقاومتی بار.»
شونینگدیک قندوز ولایتی‌ده اقتصادی مسئله‌لر بوییچه ایش بیلرمان سید‌محب مدرس‌نینگ ایتیشیچه، سبزه‌وات تولید بولیشی آزیق-آوقت بولیمی‌ده اونملی حصه قوشه‌دی و اونینگ تولید بولیشی کوپه‌یگنی، محلی نیازمند‌لیکلرنینگ تامین‌له‌یدی. «سبزه‌وات تولید بولیشی عایله‌لر اقتصادی‌گه یاردم بیره‌دی، چونکه افغانستان یشاوچیلریدن کوپینچه ایکینچیلیک بیلن شغللنگن.»
بیزلرنینگ «ایکس» ترماغی ده هم تعقیب قیلینگ!
شونده‌ی بیرحالده، قندوز ولایتی ایکینچیلیک، سووغاریش و چاروه‌چیلیک ریاستی‌نینگ ایکینچیلیک ایشلری بوییچه آمری صلاح‌الدین واحدی، اوشبو ولایت‌ده ۴ مینگ ۵۰۰دن آرتیق هکتار ییرگه سبزه‌وات ایکیلگنی‌نی بیان قیلیب و ایتیشیچه، دهقان‌لرگه ایش اورگه‌تیش و حمایت قیلیش توغریسیده بیرقطار برنامه‌لری بار.
جناب واحدی‌گه کوره: «قندوز ده ۴ مینگ ۶۸۲ هکتار ییرگه سبزه‌وات ایکیلگن و بو ساحه‌لردن ۱۱۱ مینگ ۷۳۴ متریک تُن سبزه‌وات قولگه کیلیشی ممکن و شونینگدیک بو ولایت پمیداری جوده‌یم مشهور دیر.»
ایتیش کیره‌ک که، مملکت شمالی‌ده جایلشگن قندوز ولایتی‌ده تورلی‌خیل سبزه‌وات ایکیلیب و یشاوچیلریدن کوپینچه‌سی ایکینچیلیک بیلن عایله خره‌جتلرینی تامین قیله‌دیلر.
