سلام‌وطندار نینگ معلوماتی اساسیده، کابل ده پاکستان ایلچیخانه‌سی اوچ آی ده اوشبو مملکت نینگ ویزه طلبگارلری درخواست‌لرینی رد قیلیش بیلن قریب یریم میلیون دالر درآمد قیلگن.
«افغان‌تور» دولتی کمپنیه‌سی سلام‌وطندار گه بیرگن معلوماتی اساسیده، یالغیز کابل ده ۱۴۶۴ سیاحتی شرکت فعال دیر، مذکور کمپنیه نینگ عملیاتی اورین باسری عبدالغفور امانت نینگ معلوماتی گه کوره، اوشبو شرکت‌لر نینگ اکثریتی پاکستان ویزه‌سینی آلیش ایشلری بوییچه فعالیت قیله‌دیلر.
سلام‌وطندار نینگ تخمینی معلوماتی گه کوره، کابل ده پاکستان ویزه‌سینی آلیش ایشلری بوییچه فعالیتی بولگن بیرمینگ ۲۴ کمپنیه نینگ هر بیری اوچ آی ده اورته شکلده پاکستان ویزه‌سینی آلووچی ۹۰ درخواست نی ثبت نام قیلگنلر و اولردن ۵۷ ته‌سی نینگ طلبی رد ایتیلگن؛ اوشبو کیشی‌لر پاکستان ویزه‌سینی آلیش اوچون ۸.۱۸ دالر تولشگن.
سلام‌وطندار اوسبو مسئله‌نی اثباتلش اوچون پاکستان ویزه‌سی طلبگاری بولگن ۲۵ کیشی همده کابل، هرات، غزنی و بلخ ولایت‌لریده ۱۱ سیاحتی شرکت بیلن صحبت قیلگن، اولر نینگ برچه‌سی افغانستان ده پاکستان ایلچیخانه‌سی و قنسولگرلیک‌لرینی فساد گه متهم قیلگنلر. اولر نینگ ایتیشلریچه، افغانستان ده پاکستان ایلچیخانه‌سی و قنسولگرلیک‌لری پول آلیش دن کیین کوپ سانده ویزه طلب‌لرینی رد قیله‌دیلر.
اولر گه کوره، ایریم موردلرده بیر کیشی، پاکستان ویزه‌سینی آلیش اوچون مذکور مملکت ایلچیخانه‌سی گه نیچه مرته پول توله‌گن؛ بیراق هر مرته پولی قیتیریلمسدن ویزه طلبی رد ایتیلگن؛ حقوقدانلر نینگ ایشانچی گه کوره، اوشبو پول پاکستان ایلچیخانه‌سی تامانیدن جبران بولیشی کیره‌ک. پاکستان ویزه‌سینی آلووچیلر نینگ ایتیشلریچه، پاکستان ویزه‌سینی قانونی روشده آلیش احتمالی کم دیر. بو مسئله کمیشن‌کارلر بازارینی قیزدیرگن. اولر گه کوره، پاکستان ایلچخانه‌سی قانونی ویزه بیریشنی رد قیلیش بیلن، افغانستان یشاوچیلریدن پول آلیش اوچون فساد گه زمینه یره‌تگن.
بیزلرنینگ فیسبوک صحیفه‌میزگه باش اورینگ!
پاکستان نینگ ویزه طلبگارلریدن سهیلا گه کوره، مذکور مملکت نینگ ویزه‌سینی آلیش اوچون کوپ زمان کیره‌ک و پاکستان ویزه‌سینی آلیش اوچون او نینگ طلبی، اوشبو مملکت ایلچیخانه‌سی گه پول تولش دن کین رد بولگن. او نینگ کوپه‌یتیریشیچه: «ایلچیخانه رسمی‌لری کمیشن‌کارلر بیلن همکارلیک قیله‌دی. مین ایکی مرته نورمال روشده ثبت‌نام قیلدیم؛ لیکن رد بولدی. ایلچیخانه اوزی ناقانونی ایش قیلیب و فساد گه زمینه یره‌تگن.»
پاکستان ویزه‌سینی آلووچیلردن باشقه بیری فرهاد گه کوره، پاکستان ایلچیخانه‌سی نینگ ایشلاوچیلری کمیشن‌کارلر بیلن همکارلیک قیلیب ویزه‌لرنی یا رد قیله دیلر یا که کمیشن‌کارلر آرقه‌لی کوپ پول عوضی گه طلبگارلر گه ساته‌دیلر. او نینگ ایتیشیچه: «مملکت ده اوزگریش دن کیین، پاکستان ویزه‌سینی آلیش بولیمیده کوپ قیینچیلیک‌لر تاپیلگن و اساسی قیینچیلیک‌لردن بیری کمیشن‌کارلر کوپه‌یب و یشاوچیلر نینگ ایریم قیینچیلیک بیلن روپه‌ره قیلگن. اوتمیش ده آنلاین سایت آرقه‌لی ویزه آلر ایدیک؛ بیراق حاضر ایلچیخانه ایشلاوچیلری دن هر بیری نینگ علیحده کمیشن‌کاری بار و اولر بیلن ارتباط ده دیر.»
پاکستان ویزه‌سی طلبگارلری نینگ ایتیشلریچه، پاکستان ایلچیخانه‌سی پول آلیش دن کیین ویزه طلب‌لرینی رد قیلیش بیلن، طلبگارلر نینگ کوپ مقدار پولینی آلیب و ینه بیر تاماندن، یشاوچیلرنی قاره بازار دن کوپ پول عوضی گه ویزه ساتیب آلیش گه مجبور قیله‌دیلر.
اولر نینگ ایتیشلریچه، قاره بازار ده پاکستان نینگ شاشیلینچ ویزه‌سی قیمتی بیر مینگ دن ۱۵۰۰ دالر و عادی ویزه قیمتی ۸.۱۸ دالر دیر. پاکستان ویزه طلبگارلریدن باشقه بیری مصطفا نینگ ایتیشیچه: «بو ایش کمیشن‌کارلر گه زمینه یره‌تگن و بو شرایط نی پاکستان ایلچیخانه‌سی و اوشبو ایلچیخانه ایشلاوچیلری یره‌تگن؛ چونکه اولر کمیشن‌کارلر گه زمینه یره‌تیش اوچون عادی جریان نی باغله‌یدیلر.»
پاکستان ویزه‌سی طلبگارلریدن هاجره گه کوره، ایلچیخانه ایشلاوچیلری کمیشن‌کارلر بیلن همکارلیک قیله‌دیلر و ویزه‌نی اوشبو یول بیلن کوپ پول عوضی گه طلبگارلر گه ساته‌دیلر. او نینگ کوپه‌یتیریشیچه: «ایلچیخانه ایشلاوچیلری کمیشن‌کارلر بیلن مستقیم همکارلیک قیلیشه‌دی و ویزه ایلچیخانه ایچیدن یوقاری نرخ ده ساتیله‌دی. پاکستان ایلچیخانه‌سی، یشاوچیلر اوچون ویزه قاچاق بولیش زمینه‌سینی یره‌تگن و یشاوچیلر کمیشن‌کارلردن ویزه ساتیب آلیش گه مجبورلر.»
کابل، هرات، غزنی و بلخ ولایت‌لریده ۱۱ سیاحتی کمپنیه مسئوللری و کمیشن‌کارلردن بیرقطاری، افغانستان ده پاکستان ایلچیخانه‌سی و قنسولگرلیک‌لری پول آلیش دن کیین، کوپ سانده ویزه طلبگارلری نینگ طلبینی رد قیلیب و یشاوچیلرنی کمیشن‌کارلر گه مراجعت قیلیش گه مجبور قیلیشینی تصدیقله‌یدیلر. اولر گه کوره، پاکستان ایلچیخانه‌سی نینگ ایشلاوچیلریدن قطاری کمیشن‌کارلر و سیاحتی کمپنیه‌لر بیلن ارتباط ده بولیب و شاشیلینچ ویزه اوچون طلبگارلردن کوپ مقدار ده پول آله‌دیلر.
کابل ده مذکور کمپنیه‌لردن بیری نینگ مسئولی گه کوره، اوتگن اوچ آی ده کابل ده پاکستان ویزه‌سی طلبگاری بولگن ۸۰ کیشینی ثبت‌نام قیلگن؛ بیراق اولر نینگ ۶۰ دن آرتیغی نینگ طلبی پول تولش دن کیین رد بولگن.
او نینگ ایتیشیچه: «۸۰ فایز ویزه رد و ۲۰ فایز ویزه صادر بوله‌دی. اوزیم سونگی اوچ آی ده ۷۰ و ۸۰ کیشی نی ثبت‌نام قیلدیم و اولر ارا ۱۱ و ۱۲ کیشی نینگ ویزه‌سی صادر بولدی.»
سیاحتی کمپنیه‌لر مسئوللری نینگ سلام‌وطندار گه ایتیشلریچه، پاکستان نینگ ۲۴ ساعت ایچیده صادر بوله‌دیگن ویزه‌سی قیمتی قریب ۱۲۰۰ دالر دیر و طلبگارلردن کوپراق پول آلیش اوچون بو کبی ویزه عمدی روشده پاکستان ایلچیخانه‌سی ایشلاوچیلری تامانیدن صادر بوله‌دی.
سیاحتی کمپنیه‌لردن بیری نینگ مسئولی گه کوره، اولر پاکستان ویزه‌سی قیمتی باره‌سیده مقصر ایمس‌لر؛ بلکه ویزه صادر قیلووچی مسئوللر و پاکستان ایلچیخانه‌سی ایشلاوچیلری فساد گه زمینه یره‌تیشگن.
او نینگ ایتیشیچه: «پاکستان نینگ آلتی آی‌لیک ویزه‌سی ۲۴ ساعت ایچیده صادر بولیب و حاضرگی قیمتی ۱۲۰۰ دالر دیر. بو توغریده کمپنیه‌لر مقصر ایمس؛ بلکه اصلی مقصر ویزه صادر قیلووچی مسئوللر و پاکستان ایلچیخانه‌سی ایشلاوچیلری دیر. سیاحتی کمپنیه‌لر هر بیر ویزه ده نهایت ۵۰ دالر سود آلیشه‌دی؛ بیراق کوپ پول نی پاکستان ایلچیخانه‌سی ایشلاوچیلری آله‌دیلر.»
بیزلرنینگ توییترده هم تعقیب قیلینگ!
شونینگدیک، پاکستان ویزه‌سی کمیشن‌کارلریدن بیری، شاشیلینچ ویزه قنده‌ی صادر ایتیلیشی و قنده‌ی عملی بولیشی خصوصیده ایتیشیچه: «بیز ثبت‌نام و سیستم ده ثبت قیله‌میز. پاسپورت حجت‌لرینی یوله‌یمیز و اولر بیر کوندن کیین ویزه صادر قیله‌دیلر. اصلی کمیشن‌کارلر پاکستان‌لیک‌لر و پاکستان رسمی‌لری دیر، بیز واتسپ آرقه‌لی حجت‌لرنی یوباره‌میز و اصلی آدم کیم‌لیگینی بیلمه‌یمیز.»
باشقه تاماندن، هرات، بلخ و غزنی ولایت‌لریده سیاحتی شرکت‌لر مسئوللری، افغانستان ده پاکستان ایلچیخانه‌سی و قنسولگرلیک‌لری تامانیدن ویزه طلبگارلری پول تولش دن کیین ویزه طلبی رد ایتیلیشینی تصدیقله‌یدیلر.
غزنی ده سیاحتی کمپنیه‌لر اتفاقی باشلیغی سمیع همت نینگ ایتیشیچه: «ویزه سیستم ده ثبت بولگندن کیین کوپ وقت آله‌دی و ۹۹ فایز ویزه رد بوله‌دی؛ بیراق سببینی هم بیللی قیلمه‌یدیلر و تولنگن پول نی قیتیریب بیرمه‌یدیلر.»
بلخ ده سیاحتی کمپنیه‌لردن بیری نینگ مسئولی گه کوره، پاکستان نماینده‌لیک‌لری کوپراق ویزه طلب‌لرینی رد قیلیب و ویزه اوچون تولنگن پول نی قیتیریب بیرمه‌یدیلر.
او نینگ کوپه‌یتیریشیچه: «سیستمی مغلق دیر و کوپ سانده ویزه‌لر رد بولیب و تولنگن پول نی قیته دن بیرمه‌یدیلر.»
شونینگدیک، هرات ده سیاحتی کمپنیه‌لردن بیری نینگ مسئولی گه کوره: «قیمت ۱۵۰۰ دیر و هیچ کیم قیمت نی تعیین قیله آلمه‌یدی. ویزه صادر بولمسلیگی یا که کوپ زمان سوریشی اساسی مشکل دیر.»
برچه‌سی بیلن، خلق‌ارا مناسبت‌لر ایش بیلرمان‌لری و حقوقدانلر، ایچیلخانه‌لر تامانیدن فساد و کمیشن‌کارلر گه زمینه یره‌تیلیشینی خلق‌ارا کنوانسیون‌لر قاعده‌لری گه قرشی دیب ایتیشلریچه، اسلام امیرلیگی کابل ده پاکستان ایلچیخانه‌سی نینگ ناقانونی ایشلرینی آلدینی آلیب و قانونی و دیپلوماتیک اقدام قیلیشی کیره‌ک.
سیاسی مسئله‌لر ایش بیلرمانی و سابق دیپلومات عزیز معارج نینگ ایتیشیچه: «اسلام امیرلیگی بیرینچیدن دیپلوماتیک یول بیلن آگاه‌لنتیریشی کیره‌ک و ایکینچی دن یاپیش گه اقدام قیلیشی کیره‌ک. بو کبی ایشلر فساد و پاره‌خوارلیککه زمینه یره ته‌دی. بو اقدام‌لر نتیجه بیرمه‌گن تقدیرده، پاکستان تشقی ایشلر وزیرلیگی رسمی‌لری بیلن شریک قیلیشی لازم. عکس‌حالده، بو کبی ایشلرنی قیله‌دیگن دیپلومات‌لر، ۴۸ ساعت ایچیده مملکت دن چیقریلیشی لازم.»
حقوق‌دان نورآقا شعیب نینگ ایتیشیچه: «حکومت ویزه میکانیزمی انیق و قانونی بولیشی اوچون پاکستان ایلچیخانه‌سی بیلن رسمی روشده صحبت قیلیشی کیره‌ک. افغانستان ده پاکستان دولتی و ایلچیخانه‌سی فساد گه سبب بولگن بولسه، تشقی ایشلر وزیرلیگی تامانیدن پاکستان ایلچیسی جوابگرلیک اوچون چقیریلیشی لازم.»
اوشبو گزارش ده افغانستان تشقی ایشلر وزیرلیگی مسئوللری و اسلام امیرلیگی سوزلاوچیلری نینگ فکر_ملاحظه‌سینی اورگه‌نیش اوچون تلاش قیلدیک؛ لیکن کیتمه_کیت قونغراق‌لر بیلن موفق بولمه‌دیک.
ایتیش کیره‌ک که بوندن آلدین، نیچه مرته پاکستان ایلچیخانه‌سیده کمیشن‌کارلر بازاری قیزیق‌لیگی باره‌سیده گزارش‌لر ترقه‌لگن؛ بیراق کابل ده مذکور مملکت ایلچیخانه‌سی هردایم بو ادعالرنی رد قیلگن.