کابل شهری یشاوچیلری، اوشبو شهرنینگ تورلی حدودلری اینیقسه گوجوم جایلری، بازارلر، موتر بیکتلری، پارکلر، کسلخانهلر اطرافی و سودا مرکزیلریده، عمومی حاجتخانهلر یوقلیگیدن شکایت قیلهدیلر. اولر گه کوره، بو ییرلرده حاجتخانه بولسه-ده، بیراق نظارت رعایت قیلینمهیدی.
کابل شهری اونینچی ناحیه یشاوچیسی گلابالدین و کابل گه کیلگن نیمروز یشاوچیسی محمدآصف، کابل شهریده عمومی حاجتخانهلر یوقلیگیدن شکایت قیلیب و حکومتدن پایتختده حاجتخانهلرنی کوپهیتیریشنی ایستهیدیلر، چونکی اولرنینگ فکریچه، هر کونی کوپینچه آدملر ولایتلردن کابل گه کیلهدی و بو شهر یشاوچیلری هم کوپینچه قیینیچیلیک بیلن دوچ دیر.
گلابالدین شوندهی دییدی: «کابلده حاجتخانه آزلیگی جدی قیینچیلیک حسابلنهدی و عمومی جایلردن حاجت اوچون قوللنهدیگن کیشلر شونی ایتهمن کی نظافتنی رعایت قیلسینلر و شهرنی افلاسلنتیرمهسینلر.»
شونینگدیک، نیمروزدن کابل گه کیلگن محمدآصف، کابل شهریده عمومی حاجتخانهلر یوقلیگی حقیده شوندهی دییدی: «بعضی آدملر ولایتلردن کیلهدی و کوپینچه قیینچیلیک بیلن روپهره بولهدیلر و اوزیم شهر گه بلد ایمس ایدیم و قیینچیلیک بیلن دوچ بولدیم، حکومتدن شهر تورلی حدودلریده ایرکک و عیاللر اوچون عمومی حاجتخانه قوریشنی ایستهی من.»
کابل شهری خیرخانه یشاوچیلریدن بولمیش محمد، آز سانده بولگن حاجتخانهلرده هم نظافت رعایت قیلینمهی، اولرده سوو یوق بولیب و قوللنیب بولمسلیک درجهده ایکنینی بیلدیرهدی.
اونینگ فکریچه: «حاجتخانه آزلیگی اینیقسه کابل شهریده اساسی قیینچیلیکلردن حسابلنهدی، بعضی وطنداشلریمیز سرک یا کی کوچهلر چیکهسیدن حاجت اوچون قوللنهدی و حکومتدن کابل شهری تورلی حدودلریده حاجتخانه قوریشنی ایستهیمیز و حاجتخانهلرده نظافت رعایت قیلینیشینی سورهیمیز.»
شو بیلن بیرگه، یشش محیط بیلرمانلری، عمومی حاجتخانهلر آزلیگی تورلی کسللیکلر کوپهیشی، یشش محیط افلاسلنیشی و یشاوچیلرنینگ ناراضی لیگیگه سبب بولیشیگه ایشانهدیلر.
یشش محیط ایش بیلرمانلریدن بولمیش عبدالهادی اچکزی، بیرینچی آدیمده یشاوچیلر اوچون زمانهوی حاجتخانهلر قوریلیشی کیرهک و اونی یانیده آدملر گه شهرده قندهی یشش قاعدهلری حقیده خبردارلیک قیلینیشی لازم دییدی.
اونینگ ایتیشیچه: «کابل کبی بویوک شهرلرده حاجتخانهلر سانی آز و آدملر سرک و کوچهلر چیکهسیده حاجت قیلیشهدی، بو ایش هم شهر گوزهلیگینی بوزیب همده یشش محیطنی افلاسلنتیرهدی و نهایت آدملر اورتهسیده تورلی کسللیکلر کوپهیشیگه آلیب کیلهدی.»
شو بیلن بیرگه، کابل بلدیهسی گه کوره، کابل شهری تورلی حدودلریده ۴۰ حاجتخانه قوریلگن و اوشبو ییل فایدهلنیشگه تاپشیریلهدی و کیلهسی ییلده هم بوتوغریده ایریم ریجهلر بار.
کابل بلدیهسی سوزلاوچیسی نعمتالله بارکزی شوندهی دییدی: «شهرده حاجتخانه قوریش، کابل بلدیهسی تامانیدن قیلینهیاتگن خذمتلردن حسابلنهدی، کابل شهری بویلب ۴۰ دن آرتیق حاجتخانه فعال و بوتون مارکیتلرده حاجتخانه بار، بیراق آزلیگی حس بولهدی و کابل بلدیهسی اوشبو ییل اوچون ۴۰ حاجتخانه قورماقده و ایشلری توگهگن.»
کابل شهری تورلی حدودلریده عمومی حاجتخانهلر یوقلیگی، کابل یشاوچیلرینینگ اساسی قیینچیلیکلریدن حسابلنهدی و عمومی جایلردن قوللنیش آدملر اورتهسیده ناقولی مدنیت گه ایلنگن.
