پروان ولایتی نینگ بگرام تومن یشاوچی‌لریدن یوزلرچه‌سی مذکور تومن پولیس قومندانی ایشدن آلینگنی گه عکس‌العمل کورسه‌تیب ناراضلیک نمایش یولگه قوییشگن. اولرنینگ ایتیش‌لریچه، جمهوررئیس غنی نماینده‌لر کینگشی باشلیغی میررحمان رحمانی دن انتقام آلیش دوامیده بو تومن نینگ ناتینچ قیلیش اوچون سعی و حرکت قیلماقده.
بگرام تومنی نینگ مجاهدلر کینگش اعضاسی فاروق ملک‌زاده نینگ ایتیشیچه، ویس‌الله تاج ایچکی ایشلر وزیرلیگی نینگ افسرلریدن بیری دیر کیم مأموریتی نینگ کم زمانیده مذکور تومن ناتینچلیک‌لرینی کنترول قیلگن، بیراق سیاسی بیر توطئه آرقه‌لی جمهوررئیس تامانیدن چیکلنتیریلگن.
بگرام تومن مجاهدلر کینگش باشلیغی شاه‌جان نینگ ایتیشیچه، جمهوررئیس غنی امنیت تأمین ایتیلیشی نی ایسته‌گن بیرحالده، ویس‌الله تاج بو تومن امنیتی نی تأمین ایتیش اوچون یخشی بیر گزینه ایدی و شونینگدیک اهالی هم اوندن راضی ایدی. اونگه کوره، جمهوررئیس نماینده‌لر کینگش باشلیغی دن انتقام آلیش اوچون ویس‌الله تاج نی ایشدن آلگن.
پروان ولایتی کینگش اعضاسی شمس‌الحق شیخانی نینگ آگاه‌لنتیریشیچه، ویس‌الله تاج نینگ چیکلنتیریلیشی اوچون آلینگن قرار گه اوزگریش‌لیک کیلمه‌گن صورتده، کینگ ناراضلیک نمایش یولگه قوییش بیلن کابل-شمال قتناو یولی نی باغله‌شلری ممکن.
جناب شیخانی نینگ ایتیشیچه، حکومت رهبرلیگی نینگ سیاسی بهانه‌لری اهالی نینگ اساسی حق‌لری نی اَیاق آستی قیلگن و بو اهالی تامانیدن قبول قیلینمه‌یدی.
پروان ولایتی بگرام تومن پولیس قومندانی ویس‌الله تاج، کمیده بیر ییل بو تومن پولیس قومندانی صفتیده ایش قیلگن، بیراق ینگی‌لیکده نابیللی دلیللر بیلن ایچکی ایشلر وزیرلیگی تامانیدن چیکلنتیریلگن.
بو توغریده پروان پولیس قومندانی نینگ فکری نی آلیش ایسته‌دیک؛ بیراق موفق بولمه‌دیک.
