اسلام امیرلیگی تشقی ایشلر وزیرلیگینینگ اعلام قیلیشیچه، خوست و ننگرهار گه پاکستان حربیسینینگ هجوملریگه جواب اولهراق، کابل ده پاکستان ایلچیسینی چقیریب و اونگه ناراضلیک خطینی تاپشیرگن.
مذکور وزیرلیک، بوگون (۶-سنبله، پنجشنبه)، بیر بیانیه آرقهلی یازیشیچه، اوشبو ایکی ولایتده پاکستاننینگ اویوشتیرگن هجوملری نتیجهسیده، اوچ کیشی اولیب و باشقه ییتی کیشی یرهلنگن.
اسلام امیرلیگی تشقی ایشلر وزیرلیگی، تینچ اهالیگه اویوشتیریلگن بو هجوملر و بمباردماننی «افغانستان هوا حریمی نقضی» دیب و اونی قارهلگن. بیانیهده کیلیشیچه، «اسلام امیرلیگی بو اقداملرنی افغانستان حدودیگه بیللی نقض و پاکستان تامانیدن نادرست اقدام بیلهدی.»
شونینگدیک بیانیهنینگ بیر بولیمیده اورغولنیشیچه: «پاکستان تامانیگه بیللی بولدی که افغانستان توپراغینی سقلش اسلام امیرلیگی اوچون قیزیل خط دیر و بو رقم ناتوغری اقداملرنینگ عاقبتی بولیشی ممکن.»
بیزلرنینگ فیسبوک صحیفهمیزگه باش اورینگ!
بو موضوعلر، خوست و ننگرهار ده محلی رسمیلری، اوتگن کیچه پاکستان حربیسی آرقهلی تینچاهالی اویلریگه هوا هجومی اویوشتیریلگنینی تصدیق قیلگنیدن کیین صورت تاپگن.
خوست حاکمی سوزلاوچیسی مستغفر گربزنینگ ایتیشیچه، ۵-سنبله چهارشنبه کیچه ساعت ۱۰:۳۰ اطرافیده، دیورند چیزیغی یقینیده سپیره تومنیده بیر تینچ اهالینینگ اویی، پاکستاننینگ اوچووچیسیز اوچاغی آرقهلی بمباردمان بولگن.
گربزگه کوره، بو واقعهده نعیمگل آتلی خوست یشاوچیسی بولمیش بیر عایلهدن اوچ باله اولیب، عیاللر و بالهلر شامل بیش کیشی یرهلنگن.
شونینگدیک ننگرهار ولایت مقامینینگ ییتکرمهلر ادارهسینینگ اعلام قیلیشیچه، اوتگن کیچه شینوار تومنیده جایلشگن یشش بیر اویگه اویوشتیریلگن ایکی اوچووچیسیز اوچاق هجومی نتیجهسیده، تورت تینچ اهالی یرهلنگن. بو ادارهنینگ بیانیهسیده کیلیشیچه، یرهلنگنلر آرهسیده بیر عایلهدن اوچ باله و بیر عیال شامل دیر.
