۲۹–میزان اوزبیک تیلی ملی کونی مناسبتی بیلن، امریکانینگ پنسیلوانیا ایالتی «فیلادلفیا» شهریده، «تیمور» فرهنگی و اجتماعی انجمنی تامانیدن طنطنهلی شکلده بیر احتفال اوتکزیلگن.
آنه تیلی اهمیتی و افغانستان ده اوزبیک تیلی اورنی توغریسیدهگی اوشبو احتفال مدنیتچیلر، اجتماعی فعاللر، عیاللر، صناعتچیلر همده امریکا ده حیات کیچیرهدیگن افغانستانلیکلردن قطارینینگ حضوری بیلن اوتکزیلگن.
«تیمور» فرهنگی و اجتماعی انجمنی مسئوللرینینگ ایتیشلریچه، اوشبو احتفالنینگ اوتکزیلگنیدن مقصد، تیلنی رواجلنتیریش، اوزبیک خلقینینگ اصیل فرهنگی و قدریتلرینی باشقهلرگه تانیتیش همده مهاجر ملکده توغیلگن نسلگه مذکور تیلنی تیریک سقلش دیر.
شونینگدیک بو احتفالده اوزبیک خلقینینگ تنیقلی اشولهچیلریدن خیرمحمد چاووش و کبیر کمال آرقهلی قوشیقلر اوقیلیب همده اوزبیک تیلینینگ ملی کونی مناسبتی بیلن اوتکزیلگن اوشبو احتفالده، اوزبیک خلقیگه عاید طعاملر هم نمایشگه قوییلگن.
شوندهی بیرحالده، مذکور احتفال گه قتنشگن کیشیلر، بو کبی برنامهلر اوتکزیلیشیدن خورسندلیک بیلدیریب، سوداگرلر، مدنیتچیلر و علمی نهادلردن، اوزبیک تیلی رواجلنیشی توغریسیده، درسی کتابلر چاپ ایتیلیشی و بو تیلده علمی و فرهنگی اثرلر یرهتیلیشی اوچون جدی شکلده یاردم بیریلیشینی سورهگنلر.
