سیاسی ایش بیلرمان‌لردن بولمیش خلیل احمد نادم نینگ سلام‌وطندار گه ایتیشیچه، اسلامی امارت نینگ اوتگن ۱۱ آی ده اقتصاد و حکومتدارلیک ساحه‌لرده یخشی یوتوق‌لری یوق دیر.
جناب نادم گه کوره، افغانستان گه دنیا جماعه‌چیلیگی نینگ انسان پرورلیک یاردم‌لری، اسلامی امارت نینگ تعاملی گه باغلیق، بو تعامل قانیقرلی بولمه‌گن تقدیرده، دنیا همجمعیت افغانستان گه یاردم‌لرینی توخته‌تیشی ممکن. اونینگ ایتیشیچه: «افغانستان دنیا بیلن تعامل قیلیب و دنیا همجمعیت نینگ خواستینی قبول قیلیشی کیره‌ک، مثال صورتده قیزلر نینگ تحصیلی، خاتین قیزلر و بشر حقوقینی رعایت ایتیش‌لری درکار.»
باشقه تاماندن، سیاسی ایش بیلرمان‌لردن باشقه بیر قطاری نینگ ایتیشلریچه، اسلامی امارت اوتگن ۱۱ آی ده دنیا همجمعیت بیلن تعامل ده ناکام قالیب و یخشی یوتوق‌لری یوق دیر. ایش بیلرمانلر نینگ ایشانچی گه کوره، اسلامی امارت ییتکچیلری تامانیدن دنیا کنوانسیون‌لری و قانون قاعده‌لری رعایت ایتیلمسلیگی همده اولکه خلقی و دنیا جماعه‌چیلیگی نینگ خواهش_اراده‌لری نظرگه توتیلمسلیگی، افغانستان انزوا گه قرار تاپیشی گه سبب بولگن.
بیزلرنینگ فیسبوک صحیفه‌میزگه باش اورینگ!
سیاسی ایکی ایش بیلرمان عزیز معارج گه کوره: «اسلامی امارت افغانستان ده ۱۱ آی حاکمیت‌لریده تشقی سیاست و دنیا جماعه‌چیلیگی بیلن تعامل ده مطلقا ناکام دیر و هیچ بیر یوتوق‌لری یوق. یوتوق‌لری بولگنده ایدی حاضر رسمیت گه تانیلر ایدی.»
عین‌حالده، سلام‌وطندار بیلن صحبت اوتکزگن افغانستان عدالت و ترقیات حزب رهبری سیدجواد حسینی، اسلامی امارت نینگ دنیا بیلن تعامل قیلمسلیک عاقبت‌لریدن آگاه‌لنتیره‌دی. اونینگ ایتیشیچه: «دنیا جماعه‌چیلیگی بیلن مناسبت‌لر همده افغانستان خلقی نینگ اقتصادی و سیاسی وضعیتی اوستیگه تاثیر قیله‌دی.»
جناب حسینی نینگ ایشانچی گه کوره، اسلامی امارت نه فقط دنیا جماعه‌چیلیگی بلکه افغانستان خلقی بیلن یخشی یول بارمه‌گن. اونگه کوره، بشر حقوقی، خاتین قیزلر حقوقی، خاتین قیزلر نینگ تعلیمی و همه شمول حکومت، حقیقت ده اولکه خلقی نینگ اصلی خواست‌لریدن دیر که اسلامی امارت بونگه عمل قیلیشی کیره‌ک.
بیزلرنینگ توییترده هم تعقیب قیلینگ!
ایش بیلرمانلر عین‌حالده بونده‌ی سوز یورتماقده که اوتگن کون افغانستان ده بیرلشگن ملت‌لر تشکیلاتی نینگ اورین باسرلیک هیأت دفتری، قیزلر نینگ برچه مکتب‌لری آچیلیشی اوستیگه تأکیدلب ایتیشیچه، قیزلر نینگ مکتب‌لری آچیلمه‌گن تقدیرده، افغانستان گه دنیا جماعه‌چیلیگی نینگ یاردم‌لری کیسیلیشی ممکن.
