پرواننینگ تاغلی منطقهلری اینیقسه درهی غوربند ده، محل یشاوچیلری اوتگن ییللردن بویان کسللیکلر دوالنیشی و کوندهلیک صرف-خرهجتلری اوچون «هنگ، یامه، اسپند، خینهکاه، سامانی، زرسرک، زرشک» کبی اوسیملیکلر و باشقه تورلیخیل اوسیملیکلردن فایدهلنهدیلر؛ بیراق حاضر ایسه مذکور اوسیملیکلردن قطاری یا کمیاب بولیب قالگن یا-ده یوق بولیش عرفهسیده دیر.
درهی غوربند ده تاغلی قیشلاقلردن بیرینینگ یشاوچیسی امرالله محمدگه کوره، محل یشاوچیلرینینگ آگاهیلیگی یوقلیگی و درست فایدهلنه آلمسلیگی، طبی اوسیملیکلرنینگ کمهیشی اصلی سببی دیر. او، مذکور اوسیملیکلرنینگ تانیش و سقلنیشی اوچون مسئول نهادلر آرقهلی عملی اقداملر بولینیشینی ایستهگن.
بیزلرنینگ «ایکس» ترماغی ده هم تعقیب قیلینگ!
امراللهنینگ کوپهیتیریشیچه: «سامانی آتیده بیر اوسیملیک بار که اوتمیشده اهالی اوندن دوالنیش اوچون فایدهلنهر ایدیلر؛ شونینگدیک شیرینبویه و زرشک بار. بو اوسیملیکلرنی تانیش اوچون بیر سروی قیلیشلری کیرهک و کیین ایسه مسجدلر آرقهلی اهالیگه آگاهیلیک بیرسینلر که مذکور اوسیملیکلرنینگ طبی ارزشی بار. اهالی خبری یوق و اوشبو طبی اوسیملیکلردن اویلرینی ایسیتیش اوچون فایدهلنهدیلر.»
محل یشاوچیلریدن باشقه بیری غلامنبینینگ اورغولشیچه، اهالی مذکور اوسیملیکلرنینگ طبی ارزشیدن خبر بولگنلری صورتده، اونی نه فقط حددن تشقری ییغهدیلر، بلکیم اوشبو طبیعی منبعلردن اوز یشش شرایطلرینی یخشیلش یولیده هم فایدهلنیشلری ممکن.
اونینگ ایتیشیچه: «تاغلریمیزده بو کبی اوسیملیکلر کوپ دیر؛ بیراق اهالی بیلمهیدی. زرک دیر، اوشلان دیر. دولتدن بیلرمان یوباریشی و اهالینینگ آگاه قیلیشینی ایستهیمیز. بو اوسیملیکلرنی اهالی آلیب کیتیب و یاقهدی، بیراق مذکور اوسیملیکلر ۴۰ رقم کسللیککه فایدهلی دیر.»
شوندهی بیرحالده، پروان بیلیم یورتینینگ اوسیملیکلر بیلیمی استادی سیداحمد ملکزاده، ناتوغری شکلده توپلنیش، حددن تشقیری قاچاق بولیشی، قوروقچیلیک و سقلش توغریسیده سیاستلر یوقلیگینی، مذکور اوسیملیکلرنینگ یوقالیش اصلی عامللریدن دیگن.
بیزلرنینگ فیسبوک صحیفهمیزگه باش اورینگ!
اونینگ ایتیشیچه: «پروان ولایتیده کوپینچه اوسیملیک بار. اولرنینگ دارویی اهمیتگه هم ایگه دیر. اولرنینگ اسملری کاکوتی، شیرینبویه، زوف، گُل گوسفند، هنگ، گل بزباش، سامانی یا جوره کنه، گل بابونه و پوپنه دیر. اولرنینگ یوقالیش عامللری طبیعتدن حددن تشقری ییغیلیشی و قاچاق بولیشی دیر. یوللردن بیری مذکور اوسیملیکلرنی تانیش دیر. بعضی اوسیملیکلر یوقاریش خوفی آستیده قرار تاپگن و بعضی اوسیملیک حتا یوقالگن دیر.»
باشقه بیرتاماندن، پروان ایکینچیلیک، سووغاریش و چاروهچیلیک ریاستینینگ ایکینچیلیک ایشلری بوییچه آمری نیازمحمد تایب، مذکور اوسیملیکلرنینگ بحرانی وضعیتینی تصدیقلب و ایتیشیچه، حاضر ایسه مذکور طبیعی منبعلرنی تیکلش بوییچه بیر قطار برنامهلری بار. «پروان ده ۱۰دن ۱۲ گه قدر طبی اوسیملیک ثبت بولگن که اولردن ۵-۶ توری یوقالماقده. قیغو بیلن اهالی اونی سقلشده ضعیف عمل قیلهدی؛ بیراق طبی اوسیملیکلرنی قیته ایکیلیشی اوچون پلانیمیز بار و سقلش برنامهلرنی قولگه آلگنیمیز.»
بیلرمانلرنینگ ایشانچیگه کوره، طبی اوسیملیکلرنی سقلش و تیکلش یالغیز دولتی نهادلر ایشی ایمس، بلکیم اهالی، ییتکرمهلر و محلی طبیبلرنینگ جدی شکلده شرکت قیلیشی و خلقارا نهادلرنینگ قوللب-قوتلشیگه نیازی بار؛ چونکه مذکور اوسیملیکلر نه فقط جسمی آغیریقلر داروسی، بلکیم محلی اهالی کیملیگی، بیلیمی و مدنیتینینگ بیر قسمی دیر.
