بیرلشگن ملتلر تشکیلاتینینگ مهاجرلر ایشلری بوییچه عالی کمیسیاری، جاپان مهاجرلرنی قوللب-قوتلش اوچون افغانستان گه ایکی میلیون دالر یاردم کورستگنیدن خبر بیردی.
اوشبو اداره، بوگون (۲۰ حوت/۱۱ مارچ، چهارشنبه) بیر بیانیه ترقهتیب، بو مقدار پول ایران و پاکستاندن قیتگن مهاجرلرنینگ احتیاجلرینی تأمینلش بولیمیده صرفلنیشینی معلوم قیلگن.
بیرلشگن ملتلر تشکیلاتی عالی کمیساری، جاپاننینگ بو یاردملری بیلن مملکت گه قیتگن عیاللر وبالهلر شامل ۱۱۶ مینگ کیشی نقد پول و باشپنه بیلن تأمینلنیشینی قوشیمچه قیلگن.
مذکور ادارهنینگ بیانیهسیده شوندهی کیلگن: «اوشبو یاردملر اساسیده بیز قریب ۲۳ مینگ قیتگن کیشی گه فوقالعاده یاردم بیرهمیز، تخمیناً ۱۱ مینگ خاتین-قیز گه جنس گه اساسلنگن زورهوانلیککه قرشی مخصوص قوللب-قوتلش خذمتلریدن، ۴۴۰۰ باله ایسه بالهلرنی حمایه قیلیش خذمتلریدن فایدهلنهدی.»
اوشبو نهادنینگ ایتیشیچه، جاپان یاردمی حمایه خوفلرینی کمهیتیریش گه، اجتماعی بیردملیکنی مستحکملش گه و قیتیب کیلووچیلرنی جمعیت گه قوشیش گه یاردم بیرهدی.
بیرلشگن ملتلر تشکیلاتینینگ معلوماتیگه کوره، اوتگن میلادی ییلده ایکی میلیون ۸۰۰ مینگ کیشی ایران و پاکستاندن افغانستان گه قیتگن – اولرنینگ اکثریتی باشپنه، آزیق-آوقت و باشقه ضروری خذمتلر گه محتاج دیر.
جاپان بوندن آلدین هم، افغانستانده جبرلنگنلر جملهدن بالهلر، قیتگنلر و زلزلهدن جبرلنگنلر گه یاردم کورستگن.
